Aw fɔ Rɛdi fɔ Baptayz?

1-2. If yu nɔ rɛdi yet fɔ baptayz, wetin mek yu nɔ fɔ pwɛlat? (Luk di pikchɔ na di frɔnt pej.)

IF YU go lɛk fɔ baptayz, dat na fayn gol we yu dɔn sɛt fɔ yusɛf. Yu dɔn rɛdi fɔ baptayz naw? If yu biliv se yu dɔn rɛdi fɔ baptayz ɛn di ɛlda dɛn gri, nɔ fred fɔ baptayz di nɛks chans we yu gɛt. If yu du dat, Jiova go blɛs yu fɔ we yu disayd fɔ sav am.

² Bɔt pɔsin dɔn ɛva tɛl yu se yu nid fɔ du mɔ bifo yu baptayz? Ɔ na yusɛf tink so? If na so i bi, mek yu at nɔ pwɛl. Yu go ebul mek yu padi biznɛs wit Jiova go bifo ɛn baptayz, ilɛk yu yɔŋ ɔ ol.

 3. Wetin wan Itiopian bigman bin aks Filip? Us kwɛstyɔn dis de mek wi aks? (Akt 8:​36, 38)

³ Rid Akt 8:​36, 38. Wan Itiopian bigman bin aks Filip, we na pɔsin we de prich di gud nyuz se: “Wetin mek a nɔ fɔ baptayz?” Di Itiopian man bin rili want fɔ baptayz, bɔt fɔ se i bin rili dɔn rɛdi fɔ du da impɔtant tin de?

 4. Aw di Itiopian man bin sho se i rɛdi fɔ kɔntinyu fɔ lan?

⁴ Di Itiopian man “bin go na Jerusɛlɛm fɔ go wɔship Gɔd.” (Akt 8:​27) So i go bi se i bin dɔn jɔyn di Ju rilijɔn. Wan dawt nɔ de se i bin dɔn lan bɔt Jiova frɔm di oli tin dɛn we dɛn rayt na di Ibru Skripchɔ dɛn. Bɔt stil, i bin rili want fɔ lan mɔ. Infakt, we Filip mit di Itiopian bigman na rod, wetin Filip si di man de du? I bin de rid wetin prɔfɛt Ayzaya bin dɔn rayt na di skrol. (Akt 8:​28) Dat na bin dip tin dɛn we de na di Baybul. Di man nɔ bin jɔs want fɔ lan sɔm pan di men tin dɛn we di Baybul de tich; i bin want fɔ kɔntinyu fɔ lan.

 5. Wetin di Itiopian man bin du bɔt di tin dɛn we i lan?

⁵ Di man na bin impɔtant ɔfisa we bin de wok fɔ di Itiopian dɛn kwin we na Kandesi; na dis man bin “de in chaj ɔf ɔl di kwin in jɛntri.” (Akt 8:​27) So i go bi se in na bin bizi man we bin gɛt bɔku wok dɛn fɔ du. Bɔt stil, i bin mek tɛm fɔ wɔship Jiova. I nɔ bin jɔs satisfay fɔ lan di tru tin dɛn, bɔt i bin du di tin dɛn we i de lan. Na dat mek i travul frɔm Itiopia we bin de fa say fɔ go wɔship Jiova na di tɛmpul na Jerusɛlɛm. Di patrol go dɔn mek i yuz bɔku tɛm ɛn mɔni, bɔt di man bin rili want fɔ wɔship Jiova, ilɛk wetin i gɛt fɔ du.

6-7. Aw di Itiopian man in lɔv fɔ Jiova bin kɔntinyu fɔ gro?

⁶ Di Itiopian man bin lan sɔm tru tin dɛn frɔm Filip we bin impɔtant ɛn nyu to am, we wan pan dɛn na bɔt udat na di Mɛsaya. (Akt 8:​34, 35) Dis Itiopian bigman bin rili gladi fɔ lan bɔt wetin Jizɔs dɔn du fɔ am. Wetin i du afta i lan dɛn tin dɛn ya? I fɔ dɔn kɔntinyu fɔ de lɛk aw i bin de, dat na lɛk pɔsin we jɔyn di Ju rilijɔn we dɛn rɛspɛkt. Bɔt i nɔ du dat. Bifo dat, i bin kam fɔ lɛk Jiova ɛn in Pikin mɔ ɛn mɔ. Dis bin muv am fɔ disayd fɔ du di impɔtant tin we na fɔ baptayz ɛn bi Jizɔs Krays in disaypul. We Filip si se di man dɔn rɛdi, i baptayz am.

⁷ If yu falamakata da Itiopian man de in ɛgzampul, yusɛf go ebul rɛdi fɔ baptayz. Yusɛf go ebul tɔk wit rial kɔnfidɛns se, “Wetin mek a nɔ fɔ baptayz?” Lɛ wi tɔk bɔt aw yu go falamakata di sem tin dɛn we di Itiopian man bin du: I bin kɔntinyu fɔ lan, i du di tin dɛn we i lan, ɛn i kɔntinyu fɔ lɛk Gɔd mɔ ɛn mɔ.

 8. Wetin Jɔn 17:​3 se yu fɔ du?

⁸ Rid Jɔn 17:​3. Na dɛn wɔd dɛn ya we Jizɔs bin tɔk bin ɛp yu fɔ disayd fɔ stɔdi di Baybul? Na so i bi fɔ bɔku pan wi. Bɔt fɔ se dɛn sem wɔd ya de tɛl wi bak fɔ kɔntinyu fɔ lan? Yɛs. Wi go “kɔntinyu fɔ lan bɔt . . . di wangren tru Gɔd” ɔltɛm. (Ɛkli. 3:​11, NWT; Jɔn 17:​3 ɛn futnot) Wi go lan sote go. Di mɔ we wi de lan, na di mɔ wi go kam nia Jiova.—Sam 73:​28.

 9. Wetin wi nid fɔ du afta wi dɔn lan di men tin dɛn we di Baybul de tich?

⁹ We wi bigin fɔ lan bɔt Jiova, na di men tin dɛn nɔmɔ we di Baybul de tich wi de lan. Insay apɔsul Pɔl in lɛta to di Ibru Kristian dɛn, i bin kɔl dɛn men tichin dɛn ya as “pikin pikin tin dɛn.” I nɔ bin de tɔk se dɛn “tichin dɛn we wi fɔs lan” nɔ impɔtant. Bifo dat, i bin sho se dɛn tan lɛk milk we de mek yɔŋbebi in bɔdi fayn. (Ibru. 5:​12; 6:​1) Bɔt i bin ɛnkɔrej ɔlman bak we na Kristian fɔ kɔntinyu fɔ lan tin we pas di men tichin dɛn ɛn fɔ lan di dip tin dɛn we de insay Gɔd in Wɔd. Yu rili want fɔ lan di dip tichin dɛn na di Baybul? Yu rɛdi fɔ kɔntinyu fɔ gro, fɔ kɔntinyu fɔ lan bɔt Jiova ɛn di tin dɛn we i want fɔ du?

10. Wetin mek i nɔ izi fɔ sɔm pipul dɛn fɔ stɔdi?

¹⁰ Bɔt fɔ bɔku pan wi, i nɔ kin izi fɔ mek wi stɔdi. Aw yu de fil bɔt fɔ stɔdi? Yu bin lan fɔ rid ɛn stɔdi fayn fayn wan na skul? Yu bin de ɛnjɔy fɔ stɔdi ɛn fil se yu dɔn lan bɔku tin? Ɔ yu bin tink se yu ed nɔ kam fɔ lan buk? If na so i bi, nɔto yu wan de fil da we de. Bɔt Jiova go ɛp yu. I pafɛkt, ɛn in na di bɛst Ticha.

11. Aw Jiova pruv se in na di “Ticha we Pas Ɔl Ɔda Ticha Dɛn”?

¹¹ Jiova de kɔl insɛf “[yu] Ticha we Pas Ɔl Ɔda Ticha Dɛn.” (Ayz. 30:​20, 21, NWT) In na Ticha we peshɛnt, i gud, ɛn i de ɔndastand. I de wach fɔ di gud we in studɛnt dɛn de du. (Sam 130:​3) Ɛn i nɔ de ɛva ɛkspɛkt wi fɔ du pas wetin wi ebul du. Mɛmba se na in mek yu bren, we na wɔndaful gift. (Sam 139:​14) Jiova mek wi fɔ mek wi want fɔ lan. Di Wan we mek wi want fɔ mek wi kɔntinyu fɔ lan sote go ɛn ɛnjɔy fɔ du so. So i mek sɛns fɔ “gɛt apitayt” fɔ lan Baybul trut naw. (1 Pit. 2:​2) Sɛt gol dɛn we yu go ebul fɔ rich, ɛn go de rid ɛn stɔdi di Baybul ɔltɛm. (Jɔs. 1:​8) Wit Jiova in ɛp, yu go lan fɔ ɛnjɔy fɔ rid ɛn lan bɔt am mɔ ɛn mɔ.

12. Wetin mek wi fɔ stɔdi bɔt Jizɔs in layf ɛn prichin wok?

¹² Go de spɛn tɛm fɔ de tink gud wan bɔt Jizɔs in layf ɛn prichin wok. I impɔtant fɔ mek wi falamakata Jizɔs in ɛgzampul gud gud wan if wi want fɔ sav Jiova, mɔ insay dis tɛm we tin nɔ izi. (1 Pit. 2:​21) Jizɔs bin tɛl in disaypul dɛn se dɛn go gɛt prɔblɛm dɛn. (Lyuk 14:​27, 28) Bɔt stil, i bin gɛt kɔnfidɛns se in tru tru disaypul dɛn go kɔntinyu fɔ fetful to Gɔd, jɔs lɛk am. (Jɔn 16:​33) Stɔdi bɔt Jizɔs in layf, ɛn sɛt gol dɛn fɔ falamakata am ɛvride.

13. Wetin yu fɔ kɔntinyu fɔ aks Jiova fɔ? Wetin mek?

¹³ I nɔ jɔs du fɔ sabi sɔntin. Di men rizin we mek yu nid fɔ sabi di tru tin dɛn na fɔ mek yu lan mɔ bɔt Jiova ɛn gɛt kwaliti dɛn lɛk lɔv fɔ am ɛn fɔ put fet pan am. (1 Kɔr. 8:​1-3) As yu de kɔntinyu fɔ lan, na fɔ go de aks Jiova fɔ ɛp yu fɔ gɛt mɔ fet. (Lyuk 17:​5) I kin gladi fɔ ansa dɛn kayn prea dɛn de. We wi rili gɛt fet bikɔs ɔf di tru tin dɛn we wi de lan bɔt wi Gɔd, dat go ɛp wi fɔ go bifo pan Gɔd biznɛs.—Jems 2:​26.

14. Aw apɔsul Pita bin tɔk mɔ bɔt wetin mek i impɔtant fɔ du wetin wi de lan? (Luk bak di pikchɔ.)

¹⁴ Apɔsul Pita bin tɔk mɔ bɔt wetin mek i rili impɔtant fɔ mek Jizɔs Krays in disaypul dɛn kɔntinyu fɔ du wetin dɛn de lan. I bin tɔk bɔt di Baybul akawnt bɔt Noa. Jiova bin tɛl Noa se I go yuz ebi ebi ren fɔ dɔnawe wit di wikɛd pipul dɛn we bin de da tɛm de. Nɔto jɔs bikɔs Noa ɛn in famili bin no se ebi ebi ren go kam go mek dɛn sev. Mɛmba se Pita bin de tɔk bɔt di tɛm bifo di Ebi Ebi Ren kam ɛn “we dɛn bin de bil di ak.” (1 Pit. 3:​20) Noa ɛn in famili bin du wetin dɛn lan frɔm Gɔd bay we dɛn bil wan ak, we na big bot. (Ibru. 11:​7) Pita bin kɔmpia wetin Noa bin du to baptizim, we i rayt se: “Na so baptizim bak tan, we insɛf de sev una naw.” (1 Pit. 3:​21) So wi go kɔmpia di wok we yu de du naw fɔ rɛdi fɔ baptayz to di wok we Noa ɛn in famili bin du fɔ lɔng tɛm fɔ bil di ak. Us wok yu nid fɔ du fɔ mek yu rɛdi fɔ baptayz?

15. Aw wi go sho se wi dɔn ripɛnt wit ɔl wi at?

¹⁵ Wan pan di fɔs tin dɛn we wi nid fɔ du na fɔ ripɛnt fɔ wi sin dɛn wit ɔl wi at. (Akt 2:​37, 38) We wi ripɛnt wit ɔl wi at, dat go mek wi rili chenj. Yu dɔn stɔp fɔ du di tin dɛn we Jiova nɔ lɛk, lɛk fɔ du mami ɛn dadi biznɛs di we aw Gɔd nɔ want, fɔ smok, ɔ fɔ kɔs ɔ yuz bad bad wɔd dɛn? (1 Kɔr. 6:​9, 10; 2 Kɔr. 7:​1; Ɛfi. 4:​29) If yu nɔ du so yet, kɔntinyu fɔ tray fɔ mek chenj dɛn. Tɔk to yu Baybul ticha, ɔ aks di ɛlda dɛn na di kɔngrigeshɔn fɔ ɛp yu ɛn gayd yu. If yu yɔŋ ɛn yu de na os wit yu mama ɛn papa, kɔntinyu fɔ aks dɛn fɔ mek dɛn ɛp yu fɔ lɛf ɛni bad abit we de stɔp yu fɔ mek yu nɔ baptayz.

16. Wetin wi fɔ du if wi want fɔ wɔship Jiova ɔltɛm?

¹⁶ I impɔtant bak fɔ mek wi wɔship Jiova ɔltɛm. Dat min se wi fɔ du tin dɛn lɛk fɔ de atɛnd di mitin dɛn ɛn fɔ de gi kɔmɛnt. (Ibru. 10:​24, 25) Ɛn we yu kwalifay fɔ prich, mek shɔ se yu du am ɔltɛm. Di mɔ we yu de prich, na di mɔ yu go ɛnjɔy am. (2 Tim. 4:​5) If yu yɔŋ ɛn yu de wit yu mama ɛn papa, aks yusɛf dɛn kwɛstyɔn dɛn ya: ‘Fɔ se mi mama ɛn papa dɛn nid fɔ mɛmba mi fɔ atɛnd di mitin dɛn ɔ fɔ go prich? Ɔ na misɛf sɛf kin disayd fɔ du dat?’ We yusɛf sɛf disayd fɔ du dɛn tin dɛn de, yu de sho se yu gɛt fet, yu lɛk Jiova, ɛn yu gɛt tɛnki fɔ di tin dɛn we i de gi yu. Ɔl dis na tin dɛn we de sho se yu “fetful to Gɔd,” na yu gift dɛn we yu de gi Jiova. (2 Pit. 3:​11; Ibru. 13:​15) Ɔl di gift dɛn we wi de gi wit ɔl wi at de mek wi Gɔd gladi. (Luk 2 Kɔrintians 9:​7.) Wi de du dɛn tin dɛn de bikɔs wi de gladi we wi gi Jiova wi bɛst.

17-18. Us impɔtant kwaliti go ɛp yu fɔ go bifo fɔ baptayz? Wetin mek? (Prɔvabs 3:​3-6)

¹⁷ As yu de kɔntinyu fɔ go bifo fɔ baptayz, yu go gɛt prɔblɛm dɛn. Sɔm pipul dɛn go provok yu bikɔs ɔf yu nyu fet; sɔntɛm dɛn go ivin de agens yu ɔ mek yu sɔfa. (2 Tim. 3:​12) Sɔntɛm yu de tray tranga wan fɔ lɛ yu lɛf fɔ du sɔntin we yu no se bad, bɔt sɔntɛm wan wantɛm yu stil de du da bad tin de. Ɔ sɔntɛm yu jɔs nɔ want fɔ peshɛnt ɛn yu de fil bad bikɔs i tan lɛk se yu nɔ ebul fɔ rich yu gol. Wetin go ɛp yu fɔ bia? Na wan impɔtant kwaliti, we na lɔv fɔ Jiova.

¹⁸ Yu lɔv fɔ Jiova na fayn kwaliti, di bɛst kwaliti we yu gɛt. (Rid Prɔvabs 3:​3-6.) Di lɛk we yu rili lɛk Gɔd go ɛp yu fɔ bia ɛni prɔblɛm we go kam yu we. Bɔku tɛm, di Baybul tɔk bɔt Jiova in lɔv we nɔ de chenj fɔ in savant dɛn. Bikɔs Gɔd gɛt lɔv we nɔ de ɛva chenj, i min se i nɔ go ɛva lɛf in savant dɛn ɔ stɔp fɔ lɛk dɛn. (Sam 100:​5) Gɔd mek yu lɛk aw insɛf tan. (Jɛn. 1:​26) Aw yu go falamakata da kayn lɔv de?

19. Wetin go ɛp yu fɔ sho se yu gɛt tɛnki fɔ ɔl di tin dɛn we Jiova dɔn du fɔ yu? (Galeshians 2:​20)

¹⁹ Stat bay we yu de sho se yu gɛt tɛnki. (1 Tɛs. 5:​18) Ɛvride, aks yusɛf, ‘Aw Jiova dɔn sho se i lɛk mi?’ Dɔn mek shɔ se yu tɛl Jiova tɛnki we yu de pre to am; tɔk bɔt patikyula tin dɛn we i dɔn du fɔ yu. No se Jiova de du gud tin dɛn fɔ yu bikɔs i lɛk yu, jɔs lɛk aw apɔsul Pɔl bin kam fɔ no se Jiova lɛk am. (Rid Galeshians 2:​20.) Aks yusɛf dis kwɛstyɔn, ‘Misɛf go want fɔ sho am se a lɛk am?’ We yu lɛk Jiova, dat go ɛp yu fɔ kɔntinyu fɔ avɔyd tin dɛn we go mek yu sin ɛn fɔ bia prɔblɛm dɛn. I go muv yu fɔ kɔntinyu fɔ wɔship Jiova ɔltɛm ɛn sho yu Papa se yu lɛk am ɛvride.

20. Wetin yu fɔ du fɔ gi yu layf to Jiova? Wetin mek na impɔtant tin fɔ disayd?

²⁰ As tɛm de go, yu lɔv fɔ Jiova go muv yu fɔ pre wan spɛshal prea. Yu go gi yu layf to Gɔd. Mɛmba se we yu gi yu layf to Jiova, yu gɛt dis wɔndaful op: Yu go de fɔ am sote go. We yu gi yu layf to Jiova, yu prɔmis fɔ sav am di tɛm dɛn we tin fayn ɛn di tɛm dɛn we tin bad. Yu nɔ go ɛva nid fɔ ripit di sem prɔmis. Fɔ tru, we wi gi wi layf to Gɔd, na impɔtant tin wi de disayd. Bɔt tink bɔt dis: Yu go disayd fɔ du bɔku tin dɛn na yu layf, sɔm pan dɛn na gud tin dɛn, bɔt yu nɔ go ɛva disayd fɔ du sɔntin we bɛtɛ pas fɔ gi yu layf to Jiova. (Sam 50:​14) Setan go tray fɔ mek yu nɔ gɛt bɛtɛ lɔv fɔ yu Papa, i de op se yu nɔ go kɔntinyu fɔ fetful to Am. Nɔ ɛva alaw Setan fɔ win! (Job 27:​5) Di lɛk we yu rili lɛk Jiova go ɛp yu fɔ kip yu prɔmis fɔ sav am sote go ɛn kɔntinyu fɔ gɛt tayt padi biznɛs wit yu Papa we de na ɛvin.

21. Wetin mek wi go se we yu baptayz nɔ min se ɔltin dɔn dɔn, bɔt na di biginin?

²¹ Afta yu dɔn gi yu layf to Jiova, tɔk to di ɛlda dɛn na yu kɔngrigeshɔn bɔt fɔ du di nɛks tin we impɔtant. Bɔt mɛmba ɔltɛm se i nɔ min se we yu dɔn baptayz, ɔltin dɔn dɔn. Bɔt na di biginin fɔ sav Jiova sote go. So kɔntinyu fɔ lɛk yu Papa mɔ ɛn mɔ naw. Sɛt gol dɛn so dat ɛvride yu go lɛk am mɔ ɛn mɔ. Dat go muv yu fɔ baptayz. Da de de go bi wɔndaful de. Bɔt dis na jɔs di biginin. Mek yu lɔv fɔ Jiova ɛn fɔ in Pikin kɔntinyu fɔ gro sote go.