Du Tin dɛn we Go Sho se Wi Lɛk Pipul dɛn fɔ Tru

 1. Wetin na di lɔv we pas ɔl? Aw yu go ɛksplen am? (Luk di pikchɔ nia dis atikul in taytul.)

NA FRƆM Jiova lɔv kɔmɔt. (Jɔn In Fɔs Lɛta 4:​7) Di lɔv we pas ɔl na di wan we kɔmɔt na Gɔd in Wɔd. Di Grik wɔd we dɛn yuz insay di Baybul fɔ dis kayn lɔv na a·gaʹpe. Dis kayn lɔv nɔto jɔs di we aw wi de fil. Wi kin sho dis lɔv bay we wi nɔ jɔs de bisin bɔt wisɛf nɔmɔ bɔt na we wi de du tin fɔ bɛnifit ɔda pipul dɛn. Na lɔv we de mek wi du gud tin dɛn fɔ ɔda pipul dɛn. Dis kayn lɔv de mek wi gladi ɛn i de gi wi layf minin.

2, 3. Aw Jiova dɔn sho se i rili lɛk mɔtalman?

² Jiova sho se i lɛk mɔtalman ivin bifo in mek Adam ɛn Iv. I mek di wɔl di kayn we we go mek wi gɛt ɔl wetin wi nid fɔ kɔntinyu fɔ liv. Wetin pas ɔl na dat, i mek di wɔl di kayn we we wi go de de ɛn rili ɛnjɔy layf. Jiova nɔ du dɛn tin ya fɔ insɛf. Na fɔ wi i du am. We i dɔn fɔ mek di wɔl, i mek mɔtalman ɛn gi dɛn di op fɔ de sote go na Paradays.

³ Leta, Jiova bin sho se i lɛk mɔtalman di kayn we we pas ɔl. Pan ɔl we Adam ɛn Iv bin tɔn dɛn bak pan Jiova, i bin stil biliv se sɔm pan dɛn pikin dɛn go lɛk am. Na dat mek i arenjmɛnt fɔ mek in Pikin kam day fɔ sev dɛn pikin dɛn. (Jɛnɛsis 3:​15; Jɔn In Fɔs Lɛta 4:​10) Frɔm di tɛm we Jiova prɔmis fɔ mek in pikin kam day, to am i bin tan lɛk se i dɔn mek di sakrifays. Dɔn, afta 4,000 ia, Jiova gi in wangren Pikin fɔ kam day fɔ mɔtalman. (Jɔn 3:​16) Wi rili gladi fɔ di lɛk we Jiova lɛk wi!

 4. Aw wi no se mɔtalman we nɔ pafɛkt kin ebul fɔ rili sho se i lɛk ɔda pipul dɛn?

⁴ Yu tink se wi go ebul fɔ sho se wi nɔ jɔs bisin bɔt wisɛf pan ɔl we wi nɔ pafɛkt? Yɛs, wi go ebul. Jiova mek wi lɛk aw i tan. We min se wi ebul fɔ falamakata am. I nɔ kin izi fɔ rili lɛk ɔda pipul dɛn ɔltɛm, bɔt i pɔsibul. Ebɛl bin sho se i rili lɛk Gɔd bay we i bin gi am in bɛst. (Jɛnɛsis 4:​3, 4) Noa bin sho se i nɔ jɔs bisin bɔt insɛf nɔmɔ bay we i kɔntinyu fɔ prich Gɔd in mɛsej fɔ lɔng tɛm pan ɔl we di pipul dɛn nɔ bin de lisin. (Pita In Sɛkɛn Lɛta 2:​5) Ebraam bin sho se i lɛk Gɔd pas ɛni ɔda tin bay we i gri fɔ sakrifays in pikin we i lɛk, we na Ayzak. (Jems 2:​21) Jɔs lɛk dɛn fetful man dɛn ya, wisɛf go want fɔ sho lɔv pan ɔl we i nɔ kin izi.

 5. Us we dɛn wi go sho se wi lɛk pipul dɛn fɔ tru?

⁵ Di Baybul tɛl wi se wi go sho se wi lɛk pipul dɛn fɔ tru bay we wi nɔ jɔs “de tɔk se wi lɛk wi kɔmpin, bɔt wi fɔ de du dɛn tin we go sho se wi lɛk dɛn fɔ tru.” (Jɔn In Fɔs Lɛta 3:​18) Fɔ se dis min se wi nɔ fɔ sho lɔv bay wetin wi de tɔk? Nɔ, nɔto dat i min. (Fɔs Lɛta Fɔ Tɛsalonayka 4:​18) I min se i nɔ jɔs du fɔ se, “A lɛk yu.” Wi nid fɔ sho se wi min wetin wi de tɔk. Fɔ ɛgzampul, if wi brɔda ɔ sista dɛn nɔ gɛt bɛtɛ tin fɔ it ɔ bɛtɛ klos fɔ wɛr, nɔto wetin wi de tɔk nɔmɔ dɛn nid. (Jems 2:​15, 16) Semweso, bikɔs wi lɛk Jiova ɛn wi kɔmpin dɛn, wi nɔ go jɔs pre fɔ mek bɔku pipul dɛn de fɔ prich wit wi bɔt wisɛf go want fɔ du mɔ na di prichin wok.—Matyu 9:​38.

6, 7. (a) Wetin i min fɔ “lɛk fɔ tru”? (b) Gi sɔm ɛgzampul dɛn bɔt pipul dɛn we bin de sho fek lɔv.

⁶ Di apɔsul Jɔn bin se wi fɔ “de du dɛn tin we go sho se wi lɛk dɛn fɔ tru.” So wi fɔ lɛk ɔda pipul dɛn ‘wit ɔl wi at,’ ɔ wi fɔ lɛk dɛn “fɔ tru.” (Lɛta Fɔ Rom 12:​9; Sɛkɛn Lɛta Fɔ Kɔrint 6:​6) Sɔntɛnde, pɔsin kin mek lɛk se i de sho lɔv. Bɔt na tru tru lɔv ɛn na wit ɔl in at? Wetin mek i de sho lɔv? Wi nɔ go mek ipokrit se wi lɛk pɔsin. Fek lɔv nɔ gɛt wan valyu.

⁷ Mek wi tɔk bɔt sɔm pipul dɛn we bin de sho fek lɔv. We Setan bin de tɔk to Iv na di gadin we bin de na Idɛn, di tin we i bin tɔk bin tan lɛk se i want wetin gud fɔ Iv. Bɔt di tin dɛn we i bin du bin sho se nɔto so i bi. (Jɛnɛsis 3:​4, 5) Di tɛm we Devid na bin Kiŋ, i bin gɛt wan padi we nem Aitofɛl. Bɔt Aitofɛl bin kɔmɔt biɛn Devid fɔ bɛnifit insɛf. Di tin dɛn we Aitofɛl bin du bin sho se in nɔto tru tru padi. (Sɛkɛn Samiɛl 15:​31) Tide, pipul dɛn we dɔn lɛf fɔ wɔship Jiova ɛn we de tɔk bad bɔt in pipul dɛn de yuz “swit mɔt ɛn dɛn kin tɔk fayn fayn” wan fɔ briŋ kɔnfyushɔn na di kɔngrigeshɔn. (Lɛta Fɔ Rom 16:​17, 18) Dɛn kin mek lɛk se dɛn bisin bɔt ɔda pipul dɛn, bɔt fɔ tru, na dɛnsɛf nɔmɔ dɛn bisin bɔt.

 8. Us kwɛstyɔn wi fɔ aks wisɛf?

⁸ Fek lɔv rili shemful bikɔs dɛn kin yuz am fɔ ful ɔda pipul dɛn. Wi go ebul fɔ ful mɔtalman, bɔt wi nɔ go ebul ful Jiova. Jizɔs bin se di wan dɛn we de mek ipokrit, Gɔd go pɔnish dɛn ‘bad bad wan.’ (Matyu 24:​51) As Jiova in savant dɛn, wi nɔ go ɛva want fɔ bi ipokrit. So wi fɔ aks wisɛf, ‘A lɛk pipul dɛn fɔ tru ɔ a jɔs bisin bɔt misɛf nɔmɔ ɛn a nɔ ɔnɛs?’ Lɛ wi tɔk bɔt nayn we dɛn we wi go sho lɔv ‘wit ɔl wi at.’

 9. We wi sho se wi rili lɛk pipul dɛn, wetin dat go mek wi du?

⁹ Gladi fɔ wok fɔ ɔda pipul dɛn ilɛksɛf nɔbɔdi nɔ de notis wetin yu de du. Wi fɔ rɛdi fɔ du gud tin dɛn fɔ ɔda pipul dɛn, tin dɛn we no ɔda pɔsin nɔ go no bɔt. (Rid Matyu 6:​1-4.) Ananayas ɛn Safayra nɔ bin du dis. We dɛn bin de gi sɔntin fɔ ɛp dɛn brɔda dɛn, dɛn bin want mek ɔda pipul dɛn no bɔt wetin dɛn bin de du. So dɛn lay bɔt ɔmɔs dɛn de gi, ɛn Gɔd bin pɔnish dɛn fɔ we dɛn mek ipokrit. (Di Apɔsul Dɛn Wok [Akt] 5:​1-10) If wi rili lɛk wi brɔda dɛn, wi go gladi fɔ du gud tin fɔ dɛn, ɛn wi nɔ go want ɔda pipul dɛn fɔ no wetin wi dɔn du. Wi kin lan frɔm di brɔda dɛn we kin ɛp di Gɔvnin Bɔdi fɔ gi wi di tin dɛn we wi nid fɔ lan bɔt Gɔd. Dɛn nɔ de mek lɛ pipul dɛn pe atɛnshɔn to dɛn ɛn dɛn nɔ de mek lɛ pipul dɛn no us wok dɛn dɔn du.

10. Aw wi go sho ɔnɔ to ɔda pipul dɛn?

¹⁰ Sho ɔnɔ to ɔda pipul dɛn. (Rid Lɛta Fɔ Rom 12:​10.) Jizɔs bin sho ɔnɔ to in disaypul dɛn bay we i was dɛn fut. (Jɔn 13:​3-5, 12-15) Wi fɔ tray tranga wan fɔ put wisɛf dɔŋ lɛk Jizɔs ɛn wok fɔ ɔda pipul dɛn. Di apɔsul dɛn nɔ bin ɔndastand wetin Jizɔs bin du, pas te di tɛm we dɛn bin gɛt di oli spirit. (Jɔn 13:​7) Wi go sho ɔnɔ to ɔda pipul dɛn bay we wi nɔ de tink se wi bɛtɛ pas dɛn bikɔs wi lan buk pas dɛn, wi gɛt mɔni pas dɛn, ɔ wi gɛt spɛshal wok fɔ du. (Lɛta Fɔ Rom 12:​3) Wi nɔ de jɛlɔs we dɛn prez ɔda pipul dɛn, bɔt wi de gladi fɔ dɛn ilɛksɛf wi tink se wi fɔ gɛt sɔm pan di prez.

11. Wetin mek wi fɔ tɛl ɔda pipul dɛn tɛnki?

¹¹ Tɛl tɛnki wit ɔl yu at. Luk fɔ we dɛn fɔ tɛl ɔda pipul dɛn tɛnki. Wi ɔl no se fɔ tɛl tɛnki kin “ɛp ɔda pipul” dɛn. (Lɛta Fɔ Ɛfisɔs 4:​29) Bɔt wi want fɔ mek shɔ se wetin wi de tɔk de kɔmɔt na wi at nɔto fɔ mek di pɔsin in ed big. Wi nɔ fɔ tɔk sɔntin we wi nɔ min ɔ fɔ avɔyd di wok we wi gɛt fɔ advays di pɔsin. (Prɔvabs 29:​5) Wi go bi ipokrit if wi tɛl pipul dɛn tɛnki dɔn leta wi tɔk bad bɔt dɛn biɛn dɛn bak. Di apɔsul Pɔl bin lɛk pipul dɛn wit ɔl in at. We i bin de rayt to di Kristian dɛn na Kɔrint, i bin tɛl dɛn tɛnki fɔ di fayn tin dɛn we dɛn bin de du. (Fɔs Lɛta Fɔ Kɔrint 11:​2) Bɔt we nid bin de fɔ kɔrɛkt dɛn, i tek tɛm ɛksplen di rizin to dɛn klia wan.—Fɔs Lɛta Fɔ Kɔrint 11:​20-22.

12. Aw wi go sho se wi lɛk wi brɔda dɛn wit ɔl wi at we wi want fɔ du gud?

¹² Du gud. Jiova tɛl wi fɔ fri-an to wi brɔda ɛn sista dɛn. (Rid Jɔn In Fɔs Lɛta 3:​17.) Wi fɔ gɛt di rayt rizin fɔ du gud. Wi kin aks wisɛf dɛn kwɛstyɔn ya: ‘Na mi tayt padi dɛn ɔ na di wan dɛn we a tink se impɔtant na di kɔngrigeshɔn nɔmɔ a kin invayt fɔ kam na mi os? Na dɛn pipul dɛn nɔmɔ we a tink se go du sɔntin fɔ mi a kin invayt na mi os? Ɔ a kin sho fri-an to mi brɔda ɛn sista dɛn we a nɔ sabi bɛtɛ ɔ we nɔ go ebul du sɔntin fɔ mi?’ (Lyuk 14:​12-14) Tink bɔt dɛn tin ya: Wetin fɔ du if wan brɔda want wi fɔ ɛp am afta i disayd fɔ du sɔntin we nɔ mek sɛns? Ɔ wetin wi go du if wi invayt sɔmbɔdi na wi os ɛn di pɔsin nɔ ɛva tɛl wi tɛnki? Jiova tɛl wi se: “Una fɔ gladi wɛn una kɔmpin Kristiɛn dɛn kam fɛn una, una nɔ fɔ de grɔmbul wɛn dɛn kam.” (Pita In Fɔs Lɛta 4:​9) Wi go gladi we wi gi ɔda pipul dɛn fɔ di rayt rizin.—Di Apɔsul Dɛn Wok [Akt] 20:​35.

13. (a) Ustɛm wi rili nid fɔ peshɛnt wit wi brɔda ɛn sista dɛn? (b) Wetin wi go du fɔ ɛp di wan dɛn we wik?

¹³ Ɛp di wan dɛn we wik. Di Baybul tɛl wi fɔ “ɛp dɛn pipul we nɔ ɔndastand Gɔd biznɛs gud,” ɛn wi fɔ “bia wit ɔlman.” (Fɔs Lɛta Fɔ Tɛsalonayka 5:​14) Bɔku brɔda dɛn we bin wik bin kam gɛt strɔng fet leta. Bɔt wi nid fɔ kɔntinyu fɔ peshɛnt wit ɔda wan dɛn ɛn sho se wi lɛk dɛn we wi de ɛp dɛn. Aw wi go ɛp dɛn? Wi kin yuz di Baybul fɔ ɛnkɔrej dɛn, wi kin invayt dɛn fɔ mek wi prich togɛda, ɔ wi kin jɔs lisin to dɛn we dɛn de tɔk. Dɔn, wi nɔ fɔ jɔs de tink se wi brɔda dɛn “strɔng” ɔ “wik.” Bifo dat, wi fɔ no se wi ɔl gɛt say dɛn usay wi strɔng ɛn say dɛn usay wi wik. Ivin di apɔsul Pɔl bin gri se i wik. (Sɛkɛn Lɛta Fɔ Kɔrint 12:​9, 10) Wi ɔl nid ɛp ɛn wi ɔl nid pɔsin fɔ ɛnkɔrej wi.

14. Wetin wi fɔ rɛdi fɔ du fɔ mek pis kɔntinyu fɔ de bitwin wi ɛn wi brɔda dɛn?

¹⁴ Mek pis. Fɔ mek pis wit wi brɔda dɛn na tin we rili impɔtant. Ilɛksɛf wi fil se dɛn nɔ ɔndastand wi ɔ dɛn trit wi bad, wi fɔ du ɔl wetin wi ebul fɔ mek pis. (Rid Lɛta Fɔ Rom 12:​17, 18.) If wi bin dɔn mek pɔsin fil bad, wi nid fɔ tɛl am sɔri. Bɔt wi fɔ du am wit ɔl wi at. Fɔ ɛgzampul, bifo wi se, “A sɔri fɔ we yu fil da we de,” i go fayn fɔ gri se wi du bad bay we wi se, “A sɔri we yu fil bad fɔseka wetin a se.” Pis rili impɔtant insay mared-os. I bad fɔ mek maredman ɛn mareduman mek lɛk se dɛn lɛk dɛnsɛf we ɔda pipul dɛn de arawnd dɛn bɔt we na dɛn tu nɔmɔ de dɛn nɔ de gri fɔ tɔk to dɛnsɛf, dɛn de tɛl dɛnsɛf bad wɔd, ɔ dɛn de ivin fɛt.

15. Aw wi go sho se wi de fɔgiv wi kɔmpin dɛn wit ɔl wi at?

¹⁵ Fɔgiv wit ɔl yu at. If sɔmbɔdi du wi bad, wi fɔ fɔgiv am ɛn nɔ kip grɔj na wi at. Wi fɔ du dis ilɛksɛf di pɔsin nɔ no se i dɔn ɔfɛnd wi. Wi fɔ fɔgiv wit ɔl wi at bay we ‘de bia wit wi kɔmpin fɔ sho se wi lɛk dɛn. Wi fɔ tray ɔltɛm fɔ mek di wanwɔd we Gɔd in spirit de gi, nɔ dɔn, so dat wi nɔ go de mek plaba wit wi kɔmpin.’ (Lɛta Fɔ Ɛfisɔs 4:​2, 3) Fɔ mek wi fɔgiv wi kɔmpin dɛn wit ɔl wi at, wi fɔ stɔp fɔ de tink bɔt wetin di pɔsin dɔn du. Lɔv go mek wi ‘nɔ kip tin na wi at.’ (Fɔs Lɛta Fɔ Kɔrint 13:​4, 5) Infakt, if wi kip grɔj, wi go pwɛl wi padi biznɛs wit wi brɔda ɔ wi sista ɛn wit Jiova. (Matyu 6:​14, 15) Wi go sho se wi de fɔgiv wit ɔl wi at we wi pre fɔ di pɔsin we du wi bad.—Lyuk 6:​27, 28.

16. Aw wi fɔ fil bɔt di spɛshal wok dɛn we dɛn kin gi wi fɔ du fɔ Jiova?

¹⁶ Sakrifays tin dɛn we go bɛnifit yu. We wi gɛt spɛshal wok fɔ du fɔ Jiova, wi go pruf se wi lɛk am fɔ tru bay we wi ‘nɔ jɔs de luk fɔ wi yon bɛtɛ wan nɔmɔ, wi fɔ de tray fɔ mek bɛtɛ fala wi kɔmpin dɛn.’ (Fɔs Lɛta Fɔ Kɔrint 10:​24) Fɔ ɛgzampul, na di atɛndant dɛn fɔs de ɛnta di say we wi de ol wi asɛmbli ɛn kɔnvɛnshɔn dɛn ɛn sɔntɛm dɛn go want fɔ kip di bɛst sidɔm ples fɔ dɛnsɛf ɛn dɛn famili. Bɔt bɔku pan dɛn kin disayd fɔ pik sidɔm ples dɛn we nɔ tu fayn na di say dɛn we dɛn gi dɛn fɔ wok. We dɛn de du dat, dɛn de sho se dɛn bisin bɔt ɔda pipul dɛn ɛn dɛn nɔ jɔs bisin bɔt dɛnsɛf. Aw yu go falamakata dɛn fayn ɛgzampul?

17. If pɔsin we na Kristian du bad bad tin, wetin i go du fɔ sho se i rili gɛt lɔv?

¹⁷ Kɔnfɛs ɛn stɔp fɔ du bad na kɔna. Sɔm Kristian dɛn we dɔn du bad bad tin dɔn tray fɔ kip am sikrit. Sɔntɛm dɛn de shem ɔ dɛn nɔ want fɔ mek ɔda pipul dɛn fil bad. (Prɔvabs 28:​13) Bɔt di pɔsin we de ayd in sin de sho se i nɔ lɛk insɛf ɛn ɔda pipul dɛn. Aw? Jiova go stɔp fɔ blɛs di kɔngrigeshɔn wit in oli spirit, ɛn di kɔngrigeshɔn nɔ go gɛt pis. (Lɛta Fɔ Ɛfisɔs 4:​30) So if pɔsin we na Kristian rili gɛt lɔv, dat go mek i tɔk to di ɛlda dɛn ɛn dɛn go ɛp am.—Jems 5:​14, 15.

18. Wetin mek i rili impɔtant fɔ lɛk ɔda pipul dɛn fɔ tru?

¹⁸ Lɔv na di kwaliti we impɔtant pas ɔl. (Fɔs Lɛta Fɔ Kɔrint 13:​13) I de ɛp pipul dɛn fɔ si udat rili de fala Jizɔs, ɛn fɔ si udat rili de falamakata Jiova, we na frɔm am lɔv kɔmɔt. (Lɛta Fɔ Ɛfisɔs 5:​1, 2) Pɔl se if i nɔ lɛk ɔda pipul dɛn, in na natin. (Fɔs Lɛta Fɔ Kɔrint 13:​2) Lɛ wi ɔl kɔntinyu fɔ sho se wi lɛk ɔda pipul dɛn nɔto bay wetin wi “jɛs de tɔk” bɔt bay we wi “de du dɛn tin we go sho se wi lɛk dɛn fɔ tru.”