Gɔd in Spirit ɛn Wi Yon Spirit De Tɔk di Sem Tin

1-3. Wetin-ɛn-wetin bin apin we mek Pɛntikɔs spɛshal de? Aw di tin dɛn we bin apin gri wit wetin di Skripchɔ bin dɔn se? (Luk di pikchɔ nia dis atikul in taytul.)

NA BIN Sɔnde mɔnin na Jerusɛlɛm. Dis de ya bin spɛshal ɛn bɔku pipul dɛn gladi. Di pipul dɛn bin de sɛlibret Pɛntikɔst. Pɛntikɔst na bin wan oli fɛstival we dɛn kin sɛlibret we dɛn bigin fɔ avɛst wan it we dɛn kɔl wit. Da mɔnin de insay di tɛmpul, di ay prist bin mek di nɔmal sakrifays dɛn we i fɔ mek. Dɔn arawnd nayn oklɔk, i sakrifays tu bred dɛn we gɛt yist. Na di fɔs wit we dɛn avɛst dɛn yuz fɔ mek dɛn bred ya. Di ay prist wev di tu bred dɛn fɔ gi dɛn to Jiova. Na bin Pɛntikɔst insay di ia 33.—Lɛvitikɔs 23:​15-20.

² Fɔ lɔng lɔng tɛm, di ay prist kin wev dis sakrifays ɛni ia. Dis tin we di prist kin du bin gɛt sɔntin fɔ du wit wan tin we bin rili impɔtant we apin insay Pɛntikɔs insay di ia 33. Ɛn i bin apin to 120 pan Jizɔs in disaypul dɛn we bin de ɔp wan rum na Jerusɛlɛm de pre togɛda. (Di Apɔsul Dɛn Wok [Akt] 1:​13-15) Et ɔndrɛd ia bifo dis tɛm, di prɔfɛt Joɛl bin dɔn rayt bɔt dis tin we apin. (Joɛl 2:​28-32; Di Apɔsul Dɛn Wok [Akt] 2:​16-21) Wetin bin apin we rili impɔtant?

³ Rid Di Apɔsul Dɛn Wok [Akt] 2:​2-4. Insay Pɛntikɔs insay di ia 33, Gɔd bin anɔynt dɛn Kristian dɛn de wit in oli spirit. (Di Apɔsul Dɛn Wok [Akt] 1:​8) Dɔn bɔku bɔku pipul dɛn bigin fɔ gɛda rawnd dɛn, ɛn di disaypul dɛn bigin fɔ tɔk bɔt di wɔndaful tin dɛn we dɛn jɔs dɔn si ɛn yɛri. Di apɔsul Pita bin ɛksplen wetin bin jɔs apin ɛn wetin mek i rili impɔtant. Dɔn, i tɛl di pipul dɛn se: “Una ɔl fɔ lɛf dɛn bad tin we una de du ɛn kam to Gɔd. Mek dɛn baptayz una wit Jizɔs Krays in nem; Gɔd go padin una fɔ di bad tin dɛn we una de du ɛn i go gi una in Spirit.” Da de de, na bin lɛk 3,000 pipul dɛn bin baptayz, ɛn dɛnsɛf bin gɛt di oli spirit.—Di Apɔsul Dɛn Wok [Akt] 2:​37, 38, 41.

 4. (a) Wetin mek wi want fɔ no bɔt wetin bin apin insay Pɛntikɔst? (b) Trade trade, us ɔda impɔtant tin go dɔn apin da sem de de? (Luk di ɛndnot ɔnda di las paregraf.)

⁴ Udat di ay prist ɛn di sakrifays we i kin mek ɛni Pɛntikɔst tinap fɔ? Di ay prist bin tinap fɔ Jizɔs. Di bred dɛn bin tinap fɔ Jizɔs in anɔyntɛd disaypul dɛn. Na frɔm mɔtalman dɛn we de sin Gɔd bin dɔn pik dɛn disaypul ya ɛn “na dɛn fɔs” i pik. (Rɛvɛleshɔn 14:​4) Gɔd dɔn tek dɛn pipul ya as in pikin dɛn ɛn i dɔn pik dɛn fɔ rul wit Jizɔs as kiŋ dɛn na ɛvin insay In Kiŋdɔm. (Pita In Fɔs Lɛta 2:​9) Jiova go yuz in Kiŋdɔm fɔ blɛs ɔl di wan dɛn we de obe am. So ilɛksɛf na ɛvin wi go de wit Jizɔs ɔ Paradays na dis wɔl, Pɛntikɔst insay di ia 33 rili impɔtant to wi ɔl.^[1] —Rid di ɛndnot ɔnda di las paregraf.

 5. Aw wi no se nɔto ɔl di wan dɛn we Gɔd anɔynt, i anɔynt di sem we?

⁵ Di disaypul dɛn we bin de ɔp da rum de nɔ go ɛva fɔgɛt da de de. Dɛn ɔl bin gɛt sɔntin we fiba lɛk faya ɔp dɛn ed. Jiova bin mek dɛn ebul fɔ tɔk difrɛn langwej. Dɛn nɔ bin gɛt wan dawt se Gɔd dɔn anɔynt dɛn wit oli spirit. (Di Apɔsul Dɛn Wok [Akt] 2:​6-12) Bɔt dis wɔndaful tin nɔ kin apin to ɔl di Kristian dɛn we Gɔd de anɔynt. Fɔ ɛgzampul, da sem de de, we arawnd tri tawzin pipul dɛn bin baptayz na Jerusɛlɛm, di Baybul nɔ tɛl wi se sɔntin lɛk faya bin de ɔptɔp dɛn ed. Jiova anɔynt dɛn di tɛm we dɛn baptayz. (Di Apɔsul Dɛn Wok [Akt] 2:​38) Bɔt nɔto ɔlman we na Kristian Jiova bin anɔynt di tɛm we dɛn baptayz. Lɛk di Samɛritan dɛn so, i bin tek sɔm tɛm afta we dɛn baptayz bifo Jiova anɔynt dɛn. (Di Apɔsul Dɛn Wok [Akt] 8:​14-17) Ɛn wan ɔda tɛm, Jiova bin anɔynt Kɔnilyɔs ɛn di wan dɛn we de na in os bifo dɛn baptayz.—Di Apɔsul Dɛn Wok [Akt] 10:​44-48.

 6. Wetin ɔl di anɔyntɛd wan dɛn kin gɛt? Aw dis kin afɛkt dɛn?

⁶ Wi dɔn si klia wan se Kristian dɛn kin kam fɔ no difrɛn we dɛn se Jiova dɔn anɔynt dɛn. Sɔm go dɔn no wantɛm wantɛm se Jiova anɔynt dɛn. Fɔ ɔda wan dɛn, i go tek sɔm tɛm bifo dɛn no. Bɔt di apɔsul Pɔl bin tɔk bɔt wetin kin apin to dɛn ɔl. I bin se: “Wɛn una biliv Krays, Gɔd gi una in Spirit we i bin dɔn prɔmis wi, dat na di mak fɔ sho se wi na Gɔd yon pipul. Na Gɔd in Spirit wi fɔ abop pan fɔ no se wi go gɛt wetin Gɔd bin dɔn prɔmis fɔ gi in pipul dɛn.” (Lɛta Fɔ Ɛfisɔs 1:​13, 14) So Jiova kin yuz in oli spirit fɔ sho dɛn Kristian dɛn ya klia wan se i dɔn pik dɛn fɔ go de na ɛvin. Di oli spirit kin mek dɛn “no se” ɔ pruv to dɛn se tumara bambay dɛn go de na ɛvin sote go, nɔto dis wɔl dɛn go de.—Rid Sɛkɛn Lɛta Fɔ Kɔrint 1:​21, 22; 5:​5.

 7. Wetin anɔyntɛd Kristian fɔ du fɔ gɛt di tin we Gɔd dɔn prɔmis am na ɛvin?

⁷ We Jiova anɔynt pɔsin, fɔ se natin nɔ go pwɛl am i go gɛt wetin Jiova dɔn prɔmis am? Nɔ, nɔto so i bi. Di pɔsin kin rili biliv se Jiova dɔn kɔl am fɔ go na ɛvin. Bɔt di wangren tin we go mek i gɛt wetin Jiova prɔmis am na we i kɔntinyu fɔ fetful to Jiova. Pita bin ɛksplen am dis we: “Mi Kristiɛn brɔda dɛn, na dat mek una fɔ tray fɔ du di wok we sho se Gɔd kɔl una ɛn pik una fɔ tru; if una du ɔl dɛn tin ya, una nɔ go lɛf fɔ biliv pan Gɔd ɛn tap fɔ waka wit Gɔd. Ɛn na di we dis we una fɔ pas fɔ mek una go go tret na di say we wi Masta Jizɔs, we dɔn sev wi, de rul sote go.” (Pita In Sɛkɛn Lɛta 1:​10, 11) So anɔyntɛd Kristian nɔ fɔ mek ɛnitin stɔp am fɔ sav Jiova. Pan ɔl we Jiova dɔn kɔl am fɔ go na ɛvin, if i nɔ kɔntinyu fɔ du wetin Jiova want, i nɔ go gɛt wetin Jiova dɔn prɔmis am.—Di Ibru Pipul Dɛn 3:​1; Rɛvɛleshɔn 2:​10.

8, 9. (a) Wetin mek i kin tranga fɔ lɛ plɛnti pipul dɛn ɔndastand wetin kin apin we Gɔd anɔynt pɔsin? (b) Aw pɔsin go no se Gɔd dɔn kɔl am fɔ go na ɛvin?

⁸ I kin tranga fɔ lɛ plɛnti pan Gɔd in savant dɛn tide ɔndastand wetin kin rili apin we Gɔd anɔynt pɔsin. Na so i kin bi, bikɔs dɛn nɔto anɔyntɛd. Gɔd mek mɔtalman fɔ liv na dis wɔl sote go, nɔto fɔ de na ɛvin. (Jɛnɛsis 1:​28; Sam 37:​29) Bɔt Jiova dɔn pik sɔm pipul dɛn fɔ bi kiŋ ɛn prist na ɛvin. So we i anɔynt dɛn, dɛn op ɛn di we aw dɛn de tink de chenj, so na ɛvin dɛn abop fɔ de naw.—Rid Lɛta Fɔ Ɛfisɔs 1:​18.

⁹ Bɔt aw pɔsin go no se Gɔd dɔn kɔl am fɔ go na ɛvin? Notis wetin Pɔl tɛl di anɔyntɛd brɔda dɛn na Rom we i kɔl di wan dɛn we Gɔd “dɔn kɔl fɔ bi in yon pipul.” I tɛl dɛn se: “Di Spirit we Gɔd gi una nɔ mek una bi slev ɛn i nɔ de mek una fred, bɔt i mek una bi Gɔd in pikin dɛn ɛn nain de mek wi se, ‘Papa, mi Papa,’ we wi de kɔl Gɔd. Gɔd in Spirit wit wi yon spirit de tɔk di sem tin se wi na Gɔd in pikin dɛn.” (Lɛta Fɔ Rom 1:​7; 8:​15, 16) Gɔd kin yuz in oli spirit fɔ mek pɔsin no klia wan se i dɔn kɔl am fɔ rul as kiŋ na ɛvin wit Jizɔs.—Fɔs Lɛta Fɔ Tɛsalonayka 2:​12.

10. Wetin Jɔn In Fɔs Lɛta 2:​27 min we i se anɔyntɛd Kristian nɔ nid ɛni ɔda pɔsin fɔ tich dɛn?

¹⁰ Di wan dɛn we Gɔd dɔn kɔl nɔ nid ɛni ɔda pɔsin fɔ kam tɛl dɛn se Gɔd dɔn anɔynt dɛn. Jiova kin mek dɛn rili no se dɛn na anɔyntɛd. Di apɔsul Jɔn bin tɛl anɔyntɛd Kristian dɛn se: “Di oli wan dɔn anɔynt una, ɛn una ɔl no.” I tɛl dɛn bak se: “As fɔ una, di anɔynt we i dɔn anɔynt una go de pan una, ɛn una nɔ nid ɛnibɔdi fɔ tich una; bɔt di anɔynt we i dɔn anɔynt una de tich una ɔltin ɛn na tru, nɔto lay. Jɔs lɛk aw i dɔn tich una, una kɔntinyu fɔ de wit am.” (Jɔn In Fɔs Lɛta 2:​20, 27, NW) Lɛk ɛni ɔda pɔsin, anɔyntɛd Kristian dɛnsɛf nid Jiova fɔ tich dɛn. Bɔt dɛn nɔ nid ɛnibɔdi fɔ tɛl dɛn se dɛn na anɔyntɛd. Jiova dɔn yuz in oli spirit, we pawaful pas ɛnitin, fɔ mek am klia to dɛn se dɛn na anɔyntɛd.

11, 12. Wetin anɔyntɛd Kristian dɛn kin wɔnda bɔt? Wetin dɛn nɔ de ɛva dawt?

¹¹ We Jiova anɔynt Kristian dɛn wit oli spirit, dɛn kin rili chenj. Infakt, Jizɔs se dɛn dɔn “bɔn sɛkɛn tɛm.” (Jɔn 3:​3, 5) Jizɔs bin ɛksplen se: “Nɔ wɔnda we a tɛl yu se, una ɔl fɔ bɔn sɛkɛn tɛm. Briz de blo ɛni say we i lɛk; yu de yɛri di sawnd we i de mek, bɔt yu nɔ no usay i kɔmɔt, yu nɔ no usay i de go. Na di sem tin de bi wɛn Gɔd in Spirit gi pɔsin nyu layf.” (Jɔn 3:​7, 8) So wi dɔn si klia wan se i nɔ pɔsibul fɔ rili ɛksplen aw pɔsin we na anɔyntɛd kin fil to pɔsin we nɔto anɔyntɛd.^[2]—Rid di ɛndnot ɔnda di las paregraf.

¹² Sɔmbɔdi we Jiova dɔn anɔynt go de wɔnda ɛn aks insɛf dis kwɛstyɔn, ‘Wetin mek Jiova nɔ pik ɔda pɔsin, na mi i pik?’ I go ivin de wɔnda if i fit fɔ dis wok. Bɔt i nɔ de dawt se Jiova dɔn pik am. Bifo dat, i rili gladi ɛn i de tɛl Jiova tɛnki fɔ dis gift. Anɔyntɛd Kristian dɛn de fil lɛk aw Pita bin fil we i tɔk se: “Lɛ wi tɛl Gɔd, we na Masta Jizɔs Krays in Papa, tɛnki! Bikɔs Gɔd sɔri fɔ wi, i mek Jizɔs Krays rayz frɔm di grev fɔ gi wi nyu layf, na dat mek wi abop fɔ gɛt layf we go de sote go, ɛn so, wi abop fɔ gɛt di wɔndaful blɛsin dɛn we Gɔd bin dɔn prɔmis in pipul dɛn ɛn we i kip na ɛvin fɔ una. Dɛn blɛsin ya nɔ de pwɛl, dɛn nɔ de chenj ɛn dɛn go de sote go.” (Pita In Fɔs Lɛta 1:​3, 4) We anɔyntɛd Kristian dɛn rid dɛn wɔd ya, dɛn nɔ gɛt wan dawt se na dɛn Papa de tɔk to dɛn.

13. Aw di we aw pɔsin de tink kin chenj we Gɔd anɔynt am wit oli spirit? Wetin kin briŋ kam dis chenj?

¹³ Bifo Jiova kɔl dɛn Kristian dɛn ya fɔ go na ɛvin, dɛn bin gɛt di op fɔ liv na dis wɔl sote go. Dɛn bin de wet fɔ si di tɛm we Jiova go mek dis wɔl bi Paradays ɛn pul ɔl di bad bad tin dɛn we de apin. Sɔntɛm dɛn bin de imajin se dɛn go de na dis wɔl ɛn gladi fɔ si dɛn fambul dɛn ɔ padi dɛn we bin dɔn day. Ɛn dɛn bin de wet fɔ di tɛm we dɛn go bil dɛn yon os ɛn liv de ɔ plant tik dɛn ɛn it di frut dɛn. (Ayzaya 65:​21-23) Wetin mek dɛn bigin fɔ tink difrɛn we? Dɛn bin chenj bikɔs dɛn at pwɛl ɔ dɛn dɔn sɔfa pasmak? Dɛn jɔs grap wande ɛn se dɛn go gens fɔ liv na dis wɔl sote go ɛn dɛn nɔ go gɛt gladi at if dɛn de na dis wɔl? Ɔ dɛn jɔs want fɔ si aw i go bi lɛk fɔ de na ɛvin? Nɔ, nɔto so i bi. Bifo dat, na Gɔd insɛf sɛf de disayd dis fɔ dɛn. We Gɔd kɔl dɛn fɔ go na ɛvin, i de yuz in spirit fɔ chenj di we aw dɛn de tink ɛn di op we dɛn gɛt.

14. Aw anɔyntɛd Kristian dɛn de fil bɔt di layf we dɛn gɛt na dis wɔl?

¹⁴ Fɔ se dis min se anɔyntɛd Kristian dɛn want fɔ day? Pɔl bin tɛl wi aw anɔyntɛd Kristian dɛn kin fil. I kɔmpia dɛn mɔtalman bɔdi to “os” ɛn tɔk se: “Wɛn wi de insay wi os we de na dis wɔl, dat na wi bɔdi, wi de pini lɛkɛ se na ebi ebi lod wi tot; nɔto fɔ se wi want kɔmɔt insay di bɔdi we wi gɛt na dis wɔl, bɔt wi want mek Gɔd put di bɔdi we kɔmɔt ɛvin pan wi, so dat dis bɔdi ya we de day go gɛt layf we go de sote go.” (Sɛkɛn Lɛta Fɔ Kɔrint 5:​4) Dɛn Kristian ya nɔ want fɔ day. Dɛn de ɛnjɔy dɛn layf ɛn dɛn want fɔ yuz ɛni de fɔ sav Jiova wit dɛn fambul ɛn padi dɛn. Bɔt ilɛk wetin dɛn de du, dɛn de mɛmba wetin Gɔd dɔn prɔmis dɛn tumara bambay.—Fɔs Lɛta Fɔ Kɔrint 15:​53; Pita In Sɛkɛn Lɛta 1:​4; Jɔn In Fɔs Lɛta 3:​2, 3, NW; Rɛvɛleshɔn 20:​6.

15. Wetin nɔ de sho se Jiova dɔn anɔynt pɔsin wit in oli spirit?

¹⁵ Sɔntɛm yu go de wɔnda if Jiova dɔn kɔl yu fɔ go de na ɛvin. If yu fil se Jiova dɔn du dat, tink bɔt dɛn impɔtant kwɛstyɔn ya: Yu de fil se yu rili gɛt zil fɔ du di prichin wok? Yu de rili ɛnjɔy fɔ stɔdi di Baybul ɛn lan “di dip tin dɛn bɔt Gɔd”? (Fɔs Lɛta Fɔ Kɔrint 2:​10, NW) Yu de fil se Jiova dɔn rili blɛs yu prichin wok? Yu kin want fɔ du wetin Jiova want pas ɛni ɔda tin? Yu rili lɛk ɔda pipul dɛn ɛn yu de fil se na yu wok fɔ ɛp dɛn fɔ sav Jiova? Yu dɔn si klia wan se Jiova dɔn ɛp yu pan bɔku bɔku tin dɛn na yu layf? If yu ansa to ɔl dɛn kwɛstyɔn dɛn ya na yɛs, fɔ se dis min se Jiova dɔn kɔl yu fɔ go de na ɛvin? Nɔ, nɔto so i bi. Wetin mek? Na bikɔs ɔl Gɔd in savant dɛn kin fil dis sem we, ilɛksɛf dɛn na anɔyntɛd ɔ nɔto anɔyntɛd. Ɛn Jiova kin yuz in oli spirit fɔ gi di sem pawa to ɛni wan pan in savant dɛn, i nɔ mata us op dɛn gɛt. Infakt, if yu de dawt if yu go go na ɛvin, dat min se Jiova nɔ kɔl yu. Di wan dɛn we Jiova dɔn kɔl nɔ de dawt! Dɛn no se Jiova dɔn kɔl dɛn!

16. Aw wi no se nɔto ɔl di wan dɛn we Gɔd dɔn gi in oli spirit, i kɔl fɔ go de na ɛvin?

¹⁶ Insay di Baybul, wi gɛt bɔku ɛgzampul bɔt fetful pipul dɛn we Jiova bin gi in oli spirit, bɔt we nɔ bin go na ɛvin. Wan ɛgzampul na Jɔn we bin de baptayz pipul dɛn. Jizɔs bin se no mɔtalman nɔ de we pas Jɔn, bɔt igen, i se Jɔn nɔ gɛt fɔ rul wit am as kiŋ na ɛvin. (Matyu 11:​10, 11) Jiova bin de yuz in oli spirit fɔ gayd Devid. (Fɔs Samiɛl 16:​13) Di oli spirit bin ɛp Devid fɔ ɔndastand dip tin dɛn bɔt Jiova ɛn ɛp am bak fɔ rayt sɔm pat dɛn na di Baybul. (Mak 12:​36) Pan ɔl dat, di apɔsul Pita bin tɔk se Devid “nɔ bin go ɔp na ɛvin.” (Di Apɔsul Dɛn Wok [Akt] 2:​34) Jiova bin yuz in oli spirit fɔ gi dɛn pipul ya pawa fɔ du wɔndaful tin dɛn, bɔt i nɔ bin yuz am fɔ kɔl dɛn fɔ go liv na ɛvin. Fɔ se dat min se dɛn nɔ rili fetful ɔ dɛn nɔ fit fɔ rul na ɛvin? Nɔ, nɔto so i bi. I jɔs min se Jiova go gi dɛn layf bak fɔ liv na Paradays na dis wɔl.—Jɔn 5:​28, 29; Di Apɔsul Dɛn Wok [Akt] 24:​15.

17, 18. (a) Us op we bɔku pan Gɔd in savant dɛn gɛt? (b) Us kwɛstyɔn dɛn wi go tɔk bɔt insay di nɛks atikul?

¹⁷ Bɔku pan Gɔd in savant dɛn tide nɔ gɛt fɔ go na ɛvin. Jɔs lɛk Ebraam, Devid, Jɔn we bin de baptayz pipul dɛn, ɛn plɛnti ɔda man ɛn uman dɛn we bin de di tɛm we dɛn bin de rayt di Baybul, dɛn de wet fɔ di tɛm we dɛn go liv na dis wɔl ɔnda Gɔd in gɔvmɛnt. (Di Ibru Pipul Dɛn 11:​10) Na 144,000 pipul dɛn go rul wit Jizɔs na ɛvin. Bɔt di Baybul tɔk bɔt di “ɔda” anɔyntɛd wan dɛn we stil de na di wɔl insay dis tɛm we di wɔl want dɔn. (Rɛvɛleshɔn 12:​17) So bɔku pan di 144,000 pipul dɛn dɔn ɔlrɛdi day ɛn dɛn de na ɛvin.

¹⁸ Bɔt if sɔmbɔdi se in na anɔyntɛd, aw di wan dɛn we gɛt di op fɔ de na dis wɔl fɔ si da pɔsin de? If sɔmbɔdi na yu kɔngrigeshɔn bigin fɔ it di bred ɛn drink di wayn na di Mɛmorial, aw yu fɔ trit am? If di wan dɛn we de se dɛn na anɔyntɛd de bɔku mɔ ɛn mɔ, yu fɔ wɔri bɔt dat? Wi go ansa dɛn kwɛstyɔn ya insay di nɛks atikul.