Fɔ se Jiova Go Ansa Mi Prea Dɛn?

1-2. Wetin mek sɔntɛnde wi kin fil lɛk se Jiova nɔ de ansa wi prea dɛn?

“ƐNJƆY fɔ sav PAPA GƆD [“Jiova,” NWT], ɛn i go gi yu wetin yu want.” (Sam. 37:4) Dis na wɔndaful prɔmis! Bɔt fɔ se wi fɔ tink se Jiova go gi wi ɔl wetin wi aks fɔ wantɛm wantɛm? Wetin mek dat na fayn kwɛstyɔn fɔ aks wisɛf? Lɛ wi tɔk bɔt dɛn ɛgzampul dɛn ya. Wan sista we nɔ mared pre fɔ lɛ Jiova ɛp am so dat i go atɛnd di Skul fɔ Pipul dɛn We De Prich bɔt Gɔd in Kiŋdɔm. Bɔt dɛn stil nɔ invayt am yet pan ɔl we lɔng tɛm dɔn pas. Wan yɔŋ brɔda we bin sik siriɔs wan pre to Jiova fɔ lɛ i wɛl so dat i go ebul du mɔ na di kɔngrigeshɔn. Bɔt i stil nɔ wɛl yet. Mama ɛn papa we na Kristian kin pre fɔ mek dɛn pikin kɔntinyu fɔ de na di trut, bɔt di pikin disayd fɔ lɛf fɔ sav Jiova.

² Sɔntɛm yusɛf dɔn pre to Jiova fɔ sɔntin, bɔt yu stil nɔ gɛt am yet. Bikɔs ɔf dis, sɔntɛm yu go de tink se Jiova kin ansa ɔda pipul dɛn prea bɔt i nɔ de ansa yu yon. Ɔ sɔntɛm yu go tink se na bikɔs yu dɔn du sɔntin we nɔ fayn. Na dis sem we wan sista we nem Janis b bin de fil. In ɛn in man bin pre to Jiova bikɔs dɛn bin rili want fɔ wok na Bɛtɛl. I tɔk se: “A bin biliv se insay shɔt tɛm dɛn go tek wi fɔ wok na Bɛtɛl.” Bɔt lɔng tɛm pas ɛn dɛn stil nɔ bin invayt dɛn fɔ wok na Bɛtɛl. Janis tɔk se: “Mi at bin pwɛl ɛn a bin kɔnfyuz. A bin de tink bɔt wetin a go dɔn du Jiova we mek i vɛks pan mi. A bin dɔn pre bɔku tɛm bɔt fɔ go na Bɛtɛl, wetin mek i nɔ ansa mi prea?”

 3. Wetin wi go tɔk bɔt insay dis atikul?

³ Sɔntɛnde, wi go de wɔnda if Jiova de lisin to wi prea dɛn. Ivin ɔda fetful man dɛn we bin de trade dɔn tink bɔt dis sem tin. (Job 30:20; Sam. 22:2; Aba. 1:2) Wetin go mek yu biliv se Jiova de lisin to wi prea dɛn? (Sam. 65:2) Fɔ mek wi ansa da kwɛstyɔn de, fɔs wi nid fɔ ansa dɛn kwɛstyɔn dɛn ya: (1) Wetin wi fɔ ɛkspɛkt Jiova fɔ du? (2) Wetin Jiova de ɛkspɛkt wi fɔ du? (3) Wetin mek sɔntɛnde wi go nid fɔ ajɔst di tin dɛn we wi de aks Jiova fɔ?

 4. Akɔdin to Jɛrimaya 29:​12, wetin Jiova prɔmis fɔ du?

⁴ Jiova prɔmis fɔ lisin to wi prea dɛn. (Rid Jɛrimaya 29:12.) Wi Gɔd lɛk wi bikɔs wi de sav am fetful wan. So i go lisin to wi prea dɛn ɔltɛm. (Sam 10:17; 37:28) Bɔt dis nɔ min se i go gi wi ɔl wetin wi aks fɔ ɔltɛm. Sɔntɛm wi go nid fɔ wet fɔ di nyu wɔl fɔ gɛt sɔm pan di tin dɛn we wi de pre to am fɔ.

 5. Wetin Jiova kin tink bɔt we i de lisin to wi prea dɛn? Ɛksplen.

⁵ Jiova kin tink bɔt aw wetin wi want gɛt sɔntin fɔ du wit wetin in want. (Ayz. 55:​8, 9) Wan pan di tin dɛn we i want na fɔ mek di wan ol wɔl ful-ɔp wit pipul dɛn we gladi fɔ obe am as dɛn Rula. Bɔt Setan dɔn tɔk se mɔtalman go gladi mɔ if dɛn de rul dɛnsɛf. (Jɛn. 3:​1-5) Jiova dɔn alaw mɔtalman fɔ rul dɛnsɛf fɔ pruv se wetin Setan tɔk na lay. Bɔt di rul we mɔtalman de rul dɛnsɛf dɔn mek bɔku prɔblɛm dɛn de tide. (Ɛkli. 8:9) Wi no se Jiova nɔ go pul ɔl di prɔblɛm dɛn rayt naw. Bikɔs if i du dat, sɔm pipul dɛn go tink se mɔtalman ebul rul dɛnsɛf, ɛn dɛn ebul sɔlv ɔl di prɔblɛm dɛn we de tide.

 6. Wetin mek wi nid fɔ biliv se Jiova de ansa wi prea dɛn ɔltɛm di kayn we we de sho se i lɛk wi ɛn i de du wetin rayt?

⁶ Sɔntɛnde Jiova go ansa di sem prea difrɛn we dɛn. Fɔ ɛgzampul, we Kiŋ Ɛzikaya bin sik bad bad wan, i bin beg Jiova fɔ mek i wɛl. Jiova ansa in prea bay we i mek i wɛl. (2 Kiŋ 20:​1-6) Bɔt we apɔsul Pɔl bin beg Jiova fɔ mek i pul in “chukchuk na [in] bɔdi,” we sɔntɛm go dɔn bi siknɛs, Jiova nɔ bin mek i wɛl. (2 Kɔr. 12:​7-9) Lɛ wi tɔk bak bɔt apɔsul Jems ɛn Pita dɛn ɛgzampul. Kiŋ Ɛrɔd bin want fɔ kil dɛn. Di kɔngrigeshɔn bin pre fɔ Pita, ɛn sɔntɛm dɛn bin pre fɔ Jems bak. Bɔt dɛn bin kil Jems, ɛn wan enjɛl bin sev Pita. (Akt 12:​1-11) Sɔntɛm dis go mek wi wɔnda, ‘Wetin mek Jiova bin sev Pita bɔt i nɔ sev Jems?’ Di Baybul nɔ tɛl wi wetin mek i apin da we de.c Bɔt wi shɔ se Jiova nɔ de “ɛva du tin we nɔ rayt.” (Dyu. 32:4) Ɛn wi no se Jiova bin lɛk Pita ɛn Jems. (Rɛv. 21:14) Sɔntɛnde, Jiova nɔ kin ansa wi prea dɛn di we aw wi de ɛkspɛkt. Bɔt bikɔs wi biliv se Jiova de ansa wi prea dɛn di rayt we ɛn di kayn we we de sho se i lɛk wi, dat de mek wi nɔ kɔmplen bɔt aw i de ansa wi prea dɛn.—Job 33:13.

 7. Wetin wi nid fɔ avɔyd? Wetin mek?

⁷ Wi fɔ avɔyd fɔ kɔmpia wetin de apin to wi wit wetin de apin to ɔda pipul dɛn. Fɔ ɛgzampul, sɔntɛm wi dɔn pre to Jiova fɔ wan patikyula tin, bɔt wi nɔ gɛt wetin wi pre fɔ. Leta, wi kam fɔ no se ɔda pɔsin bin pre fɔ di sem tin, ɛn i tan lɛk se Jiova bin ansa in prea. Na dis sem tin bin apin to wan sista we nem Ana. I bin pre to Jiova fɔ mek in man we nem Matyu wɛl bikɔs i bin gɛt kansa. Da sem tɛm de, tu sista dɛn we bin dɔn ol bin gɛt kansa. Ana bin rili pre fɔ mek Matyu ɛn di tu sista dɛn wɛl. Di tu sista dɛn bin wɛl, bɔt Matyu bin day. Fɔs, Ana bin de wɔnda if na Jiova ɛp di sista dɛn fɔ wɛl. Ɛn if na Jiova ɛp dɛn fɔ wɛl, wetin mek i nɔ bin ansa in prea fɔ mek in man wɛl? Na tru se wi nɔ no wetin mek di tu sista dɛn wɛl, bɔt wi no se Jiova go mek ɔl di tin dɛn we de mek wi sɔfa nɔ de igen, ɛn i rili want fɔ gi layf bak to in padi dɛn we dɔn day.—Job 14:15.

 8. (a) Akɔdin to Ayzaya 43:​2, aw Jiova de sɔpɔt wi? (b) Aw prea go ɛp wi di tɛm we wi gɛt prɔblɛm dɛn? (Luk di vidio we gɛt di taytul Prea De Ɛp Wi fɔ Bia.)

⁸ Jiova go sɔpɔt wi ɔltɛm. As Papa we lɛk wi, Jiova nɔ want wi fɔ sɔfa. (Ayz. 63:9) Bɔt dat nɔ min se i go mek ɔl wi prɔblɛm dɛn we kin tan lɛk faya ɛn riva nɔ mit wi. (Rid Ayzaya 43:2.) Bɔt i dɔn prɔmis wi se i go ɛp wi fɔ “pas” dɛn. Ɛn ilɛk uskayn prɔblɛm mit wi naw, i go mek shɔ se wi sav am ɔltɛm. Jiova dɔn gi wi bak in pawaful oli spirit we go ɛp wi fɔ bia. (Lyuk 11:13; Fil. 4:13) Dis dɔn mek wi biliv tranga wan se i go gi wi wetin wi nid ɔltɛm fɔ bia ɛn kɔntinyu fɔ fetful to am.d

 9. Akɔdin to Jems 1:​6, 7, wetin mek wi nid fɔ biliv se Jiova go ɛp wi?

⁹ Jiova de ɛkspɛkt wi fɔ abop pan am. (Ibru. 11:6) Sɔntɛnde, wi kin fil lɛk se wi prɔblɛm dɛn tu at fɔ bia. Sɔntɛm wi kin ivin dawt if Jiova go ebul fɔ ɛp wi. Bɔt di Baybul mek wi no se Gɔd in pawa kin mek wi “ebul fɔ klem ay wɔl.” (Sam 18:29) So, bifo wi alaw wisɛf fɔ kɔntinyu fɔ dawt, wi fɔ gɛt strɔng fet we wi de pre ɛn biliv se Jiova go ansa wi prea dɛn.—Rid Jems 1:​6, 7.

10. Gi wan ɛgzampul bɔt aw fɔ du sɔntin we gri wit wi prea dɛn.

¹⁰ Jiova de ɛkspɛkt wi fɔ du sɔntin we gri wit wi prea dɛn. Fɔ ɛgzampul, sɔntɛm wan brɔda go pre to Jiova fɔ mek i ɛp am so dat i go tɔk to in bɔsman na in wokples fɔ mek i go alaw am fɔ atɛnd di kɔnvɛnshɔn. Aw Jiova de ansa da kayn prea de? Sɔntɛm i go mek di brɔda gɛt maynd fɔ tɔk to in bɔsman. Bɔt di brɔda go stil nid fɔ go to in bɔs ɛn tɔk to am. Sɔntɛm i go nid fɔ tɔk am bɔku tɛm. I go ivin nid fɔ tɔk to wan pan in wokmet dɛn fɔ wok fɔ am da de de, dɔn i go wok fɔ in wokmet ɔda tɛm. Ɛn if i kam pan kam, sɔntɛm i go se mek dɛn nɔ pe am fɔ di de we i nɔ de wok.

11. Wetin mek wi nɔ fɔ taya fɔ pre bɔt di tin dɛn we impɔtant to wi?

¹¹ Jiova de ɛkspɛkt wi fɔ kɔntinyu fɔ pre to am bɔt di tin dɛn we impɔtant to wi. (1 Tɛs. 5:17) Frɔm wetin Jizɔs bin tɔk, Jiova nɔ go gi wi di tin dɛn we wi de pre to am fɔ wantɛm wantɛm. (Lyuk 11:9) So nɔ giv-ɔp! Pre wit ɔl yu at ɛn nɔ taya fɔ pre. (Lyuk 18:​1-7) We wi kɔntinyu fɔ pre to Jiova bɔt sɔntin, wi de sho am se da tin de rili impɔtant to wi. Dɔn bak, wi de sho am se wi gɛt fɛt se i ebul fɔ ɛp wi.

12. (a) Wetin na wan pan di kwɛstyɔn dɛn we wi fɔ aks wisɛf bɔt wi prea dɛn? Wetin mek? (b) Aw wi go sho se wi rɛspɛkt Jiova we wi de pre? (Luk di bɔks we gɛt di taytul “Di Tin dɛn we A De Pre fɔ De Sho se A Gɛt Rɛspɛkt fɔ Jiova?”)

¹² If wi nɔ gɛt wetin wi pre fɔ, sɔntɛm i go fayn fɔ mek wi aks wisɛf tri kwɛstyɔn dɛn. Di fɔs kwɛstyɔn na, ‘A de pre fɔ di rayt tin?’ Bɔku tɛm, wi kin tink se wi no wetin gud fɔ wi. Bɔt as tɛm de go, di tin dɛn we wi kin aks fɔ nɔ kin bɛnifit wi. If wi de pre bɔt wan patikyula prɔblɛm, sɔntɛm ɔda we go de fɔ sɔlv di prɔblɛm we bɛtɛ pas di wan we wi de pre fɔ. Ɛn sɔm pan di tin dɛn we wi kin aks fɔ nɔ kin gri wit wetin Jiova want. (1 Jɔn 5:14) Fɔ ɛgzampul, lɛ wi tɔk bɔt di ɛgzampul bɔt da mama ɛn papa we wi bin dɔn tɔk bɔt. Dɛn bin pre to Jiova fɔ mek dɛn pikin kɔntinyu fɔ de na di trut. Dat luk lɛk fayn prea. Bɔt, Jiova nɔ go fos ɛnibɔdi fɔ wɔship am. I want mek wi ɛn ivin wi pikin dɛn fɔ disayd fɔ wɔship am fɔ wisɛf. (Dyu. 10:​12, 13; 30:​19, 20) So di mama ɛn papa kin aks Jiova fɔ ɛp dɛn so dat dɛn go ebul fɔ tɔk to dɛn pikin di kayn we we go rich in at, so dat i go lɛk Jiova ɛn bi In padi.—Prɔv. 22:6; Ɛfi. 6:4.

13. Akɔdin to Ibruz 4:​16, ustɛm Jiova kin ɛp wi? Ɛksplen.

¹³ Di sɛkɔn kwɛstyɔn na, ‘Na di rayt tɛm dis fɔ mek Jiova ansa mi prea?’ Sɔntɛnde wi kin fil se Jiova nid fɔ ansa wi prea dɛn wantɛm wantɛm. Bɔt fɔ tru, Jiova no ustɛm fɔ ɛp wi. (Rid Ibruz 4:16.) Sɔntɛnde, we Jiova nɔ ansa wi prea wantɛm wantɛm, wi kin tink se in ansa to wi prea na ‘Nɔ.’ Bɔt in ansa kin bi ‘Nɔto naw.’ Fɔ ɛgzampul, lɛ wi tink bak bɔt da yɔŋ brɔda we bin pre fɔ mek i wɛl. If Jiova fɔ dɔn pafɔm mirekul ɛn mek i wɛl, Setan fɔ dɔn tɔk se na bikɔs Jiova dɔn mek di brɔda wɛl nain mek i de kɔntinyu fɔ sav am. (Job 1:​9-11; 2:4) Dɔn bak, Jiova dɔn ɔlrɛdi sɛt tɛm fɔ pul ɔl kayn sik. (Ayz. 33:24; Rɛv. 21:​3, 4) Ɛn te da tɛm de kam, wi nɔ fɔ ɛkspɛkt se Jiova go yuz mirekul fɔ mek wi wɛl. So di brɔda kin pre to Jiova fɔ mek i ɛp am fɔ gɛt trɛnk ɛn kolat so dat i go ebul fɔ bia di sik ɛn kɔntinyu fɔ sav Gɔd fetful wan.—Sam 29:11.

14. Wetin yu lan frɔm Janis in ɛkspiriɛns?

¹⁴ Tink bɔt Janis in ɛgzampul; i bin pre fɔ mek i go wok na Bɛtɛl. Na afta fayv ia, i kam fɔ ɔndastand aw Jiova bin ansa in prea. I tɔk se: “Jiova bin yuz da tɛm de fɔ tich mi tin dɛn ɛn ɛp mi fɔ bi gud Kristian. A bin nid fɔ abop pan am mɔ. Dɔn bak, a bin nid fɔ lan fɔ tek tɛm stɔdi di Baybul gud gud wan. Ɛn a bin nid fɔ lan se a kin gɛt gladi-at ɛnisay we a de if a de sav Jiova.” Leta, dɛn bin invayt Janis ɛn in man fɔ du di sakit wok. We Janis de tink bɔt wetin dɔn apin, i tɔk se: “Jiova bin ansa mi prea. Bɔt i bin ansa am di we we a nɔ bin de ɛkspɛkt. I bin tek lɔng tɛm fɔ mek a si di fayn we aw i bin ansa mi prea. Bɔt a gladi we a gɛt di chans fɔ fil se i lɛk mi ɛn i gud to mi.”

15. Wetin mek wi nɔ nid fɔ pre bɔt patikyula tin dɛn ɔltɛm? (Luk bak di pikchɔ dɛn.)

¹⁵ Di tɔd kwɛstyɔn na, ‘Fɔ se na wan patikyula tin a de pre fɔ nɔmɔ?’ I fayn we wi kin pre fɔ patikyula tin dɛn. Bɔt sɔntɛnde, i kin bɛtɛ fɔ lɛ wi nɔ tɔk bɔt patikyula tin dɛn na wi prea dɛn, so dat wi go ebul no wetin Jiova want fɔ wi. Lɛ wi tɔk bɔt da sista we nɔ mared in ɛgzampul; i bin pre fɔ mek Jiova ɛp am fɔ atɛnd di Skul fɔ di Wan dɛn We De Prich bɔt Gɔd in Kiŋdɔm. I want fɔ go na di skul so dat i go ebul go usay dɛn nid mɔ pipul dɛn fɔ prich. So as i de pre fɔ mek dɛn invayt am na di skul, i kin pre bak to Jiova fɔ ɛp am fɔ no ɔda we dɛn we i go ebul du mɔ pan di prichin wok. (Akt 16:​9, 10) Dɔn afta i dɔn pre, i kin tɔk to di sakit ovasia fɔ no if ɛni kɔngrigeshɔn de we nid mɔ payɔnia dɛn na in eria. Ɔ i kin rayt lɛta to di branch ɔfis fɔ aks dɛn usay dɛn nid mɔ pipul dɛn fɔ prich.e

16. Wetin wi fɔ biliv?

¹⁶ As wi dɔn lan, wi kin biliv se Jiova go ansa wi prea dɛn di kayn we we de sho se i lɛk wi ɛn i de du wetin rayt ɔltɛm. (Sam 4:3; Ayz. 30:18) Sɔntɛnde, wi nɔ kin gɛt di ansa we wi de ɛkspɛkt. Bɔt Jiova go lisin to wi prea dɛn ɔltɛm. I rili lɛk wi. Ɛn i nɔ go ɛva lɛf wi. (Sam 9:10) So kɔntinyu fɔ “abop pan am ɔltɛm.” Tɛl am ɔl wetin de na yu at we yu de pre to am.​—Sam 62:8.