MƆ TIN DƐN FƆ NO
Wetin di Baybul Tɔk bɔt Mared Pipul dɛn We De Pat ɔ Dayvɔs?
Jiova want lɛ mared pipul dɛn du wetin dɛn bin vaw di tɛm we dɛn mared. We Jiova bin jɔyn di fɔs man ɛn uman pan mared, i bin se: “Man . . . go de wit in wɛf, ɛn dɛn tu go bi wan.” Leta, Jizɔs Krays insɛf tɔk se: “Mek nɔbɔdi nɔ pat man ɛn uman we Gɔd dɔn jɔyn lɛkɛ wan pɔsin.” (Jɛnɛsis 2:24; Matyu 19:3-6) So dis de sho wi se Jiova ɛn Jizɔs de si mared as sɔntin we fɔ de sote go pas if wan pan di pipul dɛn we mared, day. (Fɔs Lɛta Fɔ Kɔrint 7:39) Mared na tin we oli, so dayvɔs nɔto tin fɔ tek mek ple. Na dat mek Jiova et we pipul dɛn de dayvɔs fɔ rizin we nɔ de na di Baybul.—Malakay 2:15, 16.
Us rizin di Baybul gi fɔ dayvɔs? Jiova et we maredman ɔ mareduman de du mami ɛn dadi biznɛs wit ɔda pɔsin, ɛn we pipul dɛn we nɔ mared de du mami ɛn dadi biznɛs di we aw Gɔd nɔ want. (Jɛnɛsis 39:9; Sɛkɛn Samiɛl 11:26, 27; Sam 51:4) Bikɔs Gɔd rili et we mared pipul de liv fri layf, na dat mek i se na dis na di wangren tin we fɔ mek mared pipul dɛn dayvɔs. (If yu want fɔ no aw pɔsin kin liv fri layf, na fɔ rid Chapta 9, paregraf 7.) Jiova gi rayt to di maredman ɔ mareduman we nɔ liv fri layf, fɔ disayd if i want fɔ kɔntinyu fɔ de wit di wan we dɔn liv fri layf ɔ fɔ dayvɔs am. (Matyu 19:9) So if di wan we nɔ du bad disayd fɔ dayvɔs, Jiova nɔ et da dayvɔs de. Bɔt nɔbɔdi na di kɔngrigeshɔn nɔ fɔ ɛnkɔrej ɛnibɔdi fɔ dayvɔs in man ɔ in wɛf. Infakt, sɔm tin dɛn de we kin mek di wan we nɔ liv fri layf, disayd nɔ fɔ dayvɔs di wan we dɔn liv fri layf. Lɛk if i si se di pɔsin we dɔn liv fri layf rili fil sɔri fɔ wetin i dɔn du. Wan tin we wi fɔ mɛmba na dat, di wan dɛn we gɛt rizin fɔ dayvɔs lɛk aw di Baybul se, fɔ disayd fɔ dɛnsɛf ɛn rɛdi fɔ ɛnitin we go apin to dɛn.—Lɛta Fɔ Galeshya 6:5.
Sɔm bad bad tin dɛn kin apin we kin mek sɔm Kristian dɛn kin disayd fɔ pat ɔ dayvɔs, pan ɔl we di pɔsin we dɛn mared to nɔ liv fri layf. If dat apin, di Baybul tɔk klia wan se di pɔsin we de lɛf in kɔmpin “nɔ fɔ mared ɔda man [ɔ uman] ɔ i fɔ mek pis wit in maredman [ɔ mareduman].” (Fɔs Lɛta Fɔ Kɔrint 7:11) Di Kristian we lɛf in kɔmpin nɔ fɔ mared to ɔda pɔsin. (Matyu 5:32) Lɛ wi tɔk bɔt sɔm tin dɛn we kin mek mared pipul dɛn pat.
We di man nɔ gri fɔ sɔpɔt ɔ kia fɔ in famili. Sɔm famili dɛn nɔ kin gɛt di tin dɛn we dɛn nid, bikɔs di man nɔ gri fɔ sɔpɔt dɛn pan ɔl we i ebul fɔ du so. Di Baybul se: “If ɛnibɔdi nɔ de mɛn in fambul dɛn, . . . da pɔsin de de du lɛkɛ se fɔ biliv pan Gɔd nɔ min natin, i wɔs pas pɔsin we nɔ biliv Gɔd wande.” (Fɔs Lɛta To Timoti 5:8) If dis kayn man nɔ chenj, in wɛf kin disayd fɔ kɔmɔt na di os so dat i go ebul fɔ kia fɔ insɛf ɛn di pikin dɛn. Bɔt if ɛni sista kam tɛl di ɛlda dɛn se in man nɔ de gri fɔ sɔpɔt in famili, di ɛlda dɛn fɔ tray tranga wan fɔ no if na so i rili bi. Di ɛlda dɛn kin ivin disfɛloship pɔsin we nɔ gri fɔ kia fɔ in famili.
We di man ɔ di uman de bit in kɔmpin bad bad wan. Di man ɔ di uman go de bit in kɔmpin te in kɔmpin nɔ gɛt bɛtɛ wɛlbɔdi ɔ put in layf pan denja. If di pɔsin we de trit in kɔmpin so na Kristian, di ɛlda dɛn fɔ tray tranga wan fɔ no if na so i de du. Dɛn kin ivin disfɛloship pɔsin we de vɛks tumɔs ɛn bit in kɔmpin.—Lɛta Fɔ Galeshya 5:19-21.
We maredman ɔ mareduman de mek in kɔmpin nɔ ebul fɔ wɔship Jiova. Sɔntɛnde, di maredman ɔ mareduman kin tray fɔ mek in kɔmpin nɔ wɔship Gɔd atɔl, ɔ fos am fɔ pwɛl Gɔd in lɔ. If dat apin, di wan we dɛn de du am to, go disayd if i fɔ pat wit in kɔmpin if i tink se na da we de nɔmɔ i go ebul ‘fɔ du wetin Gɔd tɛl am fɔ du, ɛn nɔ du wetin mɔtalman tɛl am fɔ du.’—Di Apɔsul Dɛn Wok [Akt] 5:29.
Pan ɔl di difrɛn difrɛn tin dɛn we wi dɔn tɔk bɔt, nɔbɔdi nɔ fɔ fos di maredman ɔ di mareduman fɔ pat, ɔ fɔ kɔntinyu fɔ de wit in kɔmpin. Ivin we ɛlda dɛn ɔ Kristian dɛn we gɛt ɛkspiriɛns go yuz di Baybul fɔ ɛp ɛn advays di mared pipul dɛn, dɛn nɔ go sabi ɔl wetin de apin bitwin di man ɛn in wɛf. Na Jiova nɔmɔ go no ɔl wetin de apin bitwin dɛn. Bɔt rili, di wɛf go sho se i nɔ gɛt wan rɛspɛkt fɔ Gɔd ɛn fɔ di vaw we i mek, if i tɔk sɔntin we de apin na dɛn os di we aw i nɔ bi, jɔs fɔ lɛ i lɛf in man, ɔ if di man du di sem tin, jɔs fɔ lɛ i lɛf in wɛf. Jiova no if ɛnibɔdi de fɛn kɔni we fɔ lɛf in man ɔ in wɛf, ilɛk aw i tray fɔ ayd am. Fɔ tru “natin nɔ de we ayd, we Gɔd nɔ de si; Gɔd de si ɔltin, ɛn na bifo am wi ɔl gɛt fɔ tinap bambay.” (Di Ibru Pipul Dɛn 4:13) Bɔt if di prɔblɛm kɔntinyu fɔ de, nɔbɔdi nɔ fɔ tɔk bad bɔt di man ɔ di uman we dɔn disayd fɔ pat wit in kɔmpin. Wi fɔ mɛmba se, “wi ɔl gɛt fɔ tinap bifo Gɔd we go jɔj wi.”—Lɛta Fɔ Rom 14:10-12.