Aw Jizɔs in Day Go Sev Wi?

Wi de sin, sɔfa, ɛn day bikɔs di fɔs man ɛn uman we na Adam ɛn Iv, nɔ bin obe Gɔd.a Bɔt dat nɔ min se wi nɔ gɛt op. Jiova dɔn mek we fɔ fri wi frɔm sin ɛn day tru in Pikin, Jizɔs Krays. Di Baybul tich se Jizɔs bin gi in pafɛkt layf as di prayz fɔ fri wi frɔm sin ɛn day. (Rid Matyu 20:​28.) Jizɔs bin gɛt di rayt fɔ liv sote go na di wɔl, bɔt i bin gri fɔ day so dat i go opin di we bak fɔ mek wi gɛt ɔl wetin Adam ɛn Iv bin dɔn lɔs. Jizɔs bin sho bak se in ɛn Jiova rili lɛk wi. Dis lɛsin go ɛp yu fɔ gladi mɔ fɔ Jizɔs in day.

1. Aw wi kin bɛnifit frɔm Jizɔs in day tide?

Bikɔs wi de sin, wi kin du bɔku tin dɛn we kin mek Jiova nɔ gladi. Bɔt if wi rili sɔri fɔ wi sin dɛn ɛn wi beg Jiova fɔ fɔgiv wi tru Jizɔs Krays, ɛn if wi du wi bɛst nɔ fɔ ripit dɛn mistek dɛn de, wi go gɛt tayt padi biznɛs wit Gɔd. (1 Jɔn 2:​1) Di Baybul tɔk se: “Na wan tɛm nɔmɔ Krays day fɔ sin, pɔsin we de du wetin rayt day fɔ di wan dɛn we nɔ de du wetin rayt, so dat i go kɛr una go to Gɔd.”​—1 Pita 3:​18.

2. Aw wi go bɛnifit frɔm Jizɔs in day tumara bambay?

Jiova bin sɛn Jizɔs fɔ gi in pafɛkt layf “so dat ɛnibɔdi we sho se i gɛt fet pan am Gɔd nɔ go dɔnawe wit am, bɔt i go gɛt layf we go de sote go.” (Jɔn 3:​16) Wi gladi fɔ wetin Jizɔs bin du, bikɔs i nɔ go te igen Jiova go pul ɔl di bad tin dɛn we de apin bikɔs ɔf Adam in trangayes. Dis min se if wi sho se wi gɛt fet pan Jizɔs in sakrifays, wi go gɛt di chans fɔ ɛnjɔy layf sote go na Paradays na dis wɔl!​—Ayzaya 65:​21-​23.

LAN MƆ

3. Jizɔs in day fri wi frɔm sin ɛn day

VIDIO: Wetin Mek Jizɔs Bin Day?​—Pat 1 (2:​01)

• Us chans Adam bin lɔs we i nɔ obe Gɔd?

Rid Romans 5:​12, dɔn una tɔk bɔt dis kwɛstyɔn:

• Aw Adam in sin dɔn afɛkt yu layf?

Rid Jɔn 3:​16, dɔn una tɔk bɔt dis kwɛstyɔn:

• Wetin mek Jiova sɛn Jizɔs fɔ kam na di wɔl?

1. Adam na bin pafɛkt man we nɔ bin obe Gɔd, ɛn i mek ɔlman bigin fɔ sin ɛn day

2. Jizɔs na bin pafɛkt man we bin obe Gɔd, ɛn i gi ɔlman di chans fɔ pafɛkt ɛn gɛt layf we go de sote go

4. Jizɔs in day kin bɛnifit ɔlman

VIDIO: Wetin Mek Jizɔs Bin Day?​—Pat 2 (2:​00)

• Aw wan man in day go bɛnifit ɔlman?

Rid 1 Timoti 2:​5, 6, dɔn una tɔk bɔt dis kwɛstyɔn:

• Adam na bin pafɛkt man we mek ɔlman bigin fɔ sin ɛn day. Jizɔs insɛf na bin pafɛkt man. Aw i “pe di ɛgzakt prayz fɔ fri ɔlman”?

5. Jizɔs in day na Jiova in gift to yu

Jiova in padi dɛn de si Jizɔs in day as gift to dɛn. Fɔ ɛgzampul, rid Galeshians 2:​20, dɔn una tɔk bɔt dis kwɛstyɔn:

• Aw di apɔsul Pɔl bin sho se i de si Jizɔs in day as gift to am?

We Adam bin sin, in ɛn ɔl in pikin dɛn bin fit fɔ day. Bɔt Jiova bin sɛn in Pikin fɔ day so dat yu go gɛt di chans fɔ ɛnjɔy layf we go de sote go.

As yu de rid dɛn vas dɛn ya, tray fɔ imajin aw Jiova bin fil we in Pikin bin de sɔfa. Rid Jɔn 19:​1-7, 16-​18, dɔn una tɔk bɔt dis kwɛstyɔn:

• Aw yu fil bɔt wetin Jiova ɛn Jizɔs du fɔ yu?

WETIN YU DƆN LAN

Jizɔs in day mek am pɔsibul fɔ lɛ Jiova fɔgiv wi sin dɛn, ɛn i gi wi di chans fɔ ɛnjɔy layf we go de sote go.

Rivyu

• Wetin mek Jizɔs bin day?

• Aw Jizɔs in pafɛkt layf na di ɛgzakt prayz fɔ fri wi?

• Aw Jizɔs in day go bɛnifit yu?

DU MƆ RISACH

Lan wetin mek Jizɔs in pafɛkt layf na di prayz fɔ bay wi frɔm sin ɛn day.

“Aw Jizɔs in Day De Fri Bɔku Pipul Dɛn?” (Atikul na di wɛbsayt)

Lan wetin wi nid fɔ du fɔ mek wi sev frɔm sin ɛn day.

“Aw Jizɔs De Sev?” (Atikul na di wɛbsayt)

Yu tink se Jiova kin fɔgiv siriɔs sin dɛn?

“Di Baybul in Ansa to Sɔm Kwɛstyɔn Dɛn” (Di Wachtawa, Me 1, 2013)

Lan aw Jizɔs in sakrifays bin ɛp wan man fɔ chenj in abit dɛn.

“Mi Nɔto Slev to Fɛt-fɛt Igen” (Atikul na di wɛbsayt)