LƐSIN 48
Tek Tɛm Pik Yu Padi Dɛn
Wi tayt padi dɛn kin mek wi gladi we tin fayn, ɛn dɛn kin ɛnkɔrej wi di tɛm we tin tranga. Bɔt di Baybul wɔn wi se nɔto ɔlman na gud padi. So aw wi go ebul fɔ pik gud padi dɛn? Lɛ wi tɔk bɔt di kwɛstyɔn dɛn we de dɔŋ.
1. Aw di padi dɛn we yu de pik de afɛkt yu?
If wi de spɛn bɔku tɛm wit sɔm patikyula pipul dɛn, ilɛksɛf wi de togɛda ɔ na soshial midia, wi kin bigin fɔ tink ɛn du tin lɛk dɛn pipul dɛn de. Di Baybul se “di wan we de waka wit pɔsin we gɛt sɛns go gɛt sɛns, bɔt di wan we de waka wit fulman [di wan we nɔ lɛk Jiova] bad tin go apin to am.” (Prɔvabs 13:20, NWT) Padi dɛn we lɛk Jiova ɛn we de wɔship am go ɛp yu fɔ kɔntinyu fɔ de nia am ɛn disayd fɔ du gud tin dɛn. Bɔt wi tayt padi dɛn we nɔ lɛk Jiova go mek wi kɔmɔt nia am. No wɔnda di Baybul ɛnkɔrej wi fɔ tek tɛm pik wi padi dɛn! We wi mek padi wit pipul dɛn we lɛk Gɔd, wi de bɛnifit ɛn dɛnsɛf de bɛnifit. Wi de ebul “kɔntinyu fɔ ɛnkɔrej [dɛn] . . . ɛn ɛp . . . dɛn.”—1 Tɛsalonians 5:11.
2. Aw di padi dɛn we yu de pik de afɛkt Jiova?
Jiova de tek tɛm pik in padi dɛn. “I de mek tayt padi biznɛs wit di wan dɛn we de du wetin rayt.” (Prɔvabs 3:32, NWT) Aw Jiova go fil if wi pik padi dɛn we nɔ lɛk am? Dat go mek i rili fil bad! (Rid Jems 4:4.) Bɔt Jiova go gladi, ɛn i go pik wi fɔ bi in padi dɛn if wi lɛf fɔ spɛn tɛm wit bad padi dɛn ɛn go nia am ɛn di wan dɛn we lɛk am.—Sam 15:1-4.
LAN MƆ
Lan wetin mek i impɔtant fɔ pik di rayt padi dɛn, ɛn aw yu go ebul fɔ gɛt padi dɛn we gud fɔ yu.
3. Tek tɛm mek yu nɔ pik bad padi dɛn
Pipul dɛn we nɔ lɛk Gɔd ɛn we nɔ de fala wetin i se rayt ɛn rɔng na bad padi dɛn. Ple di VIDIO, dɔn una tɔk bɔt di kwɛstyɔn we de dɔŋ.
Aw wi kin bigin spɛn tɛm wit bad padi dɛn we wi nɔ de ivin notis?
Rid 1 Kɔrintians 15:33, dɔn una tɔk bɔt dɛn kwɛstyɔn dɛn ya:
Uskayn pɔsin kin bi bad padi fɔ yu? Wetin mek?
Rid Sam 119:63, dɔn una tɔk bɔt dis kwɛstyɔn:
Wetin go sho se pɔsin na gud padi fɔ yu?
Wan rɔtin apul kin pwɛl ɔl di ɔda wan dɛn. Aw wan bad padi go afɛkt yu?
4. Pipul dɛn we difrɛn frɔm wi kin bi wi gud padi dɛn
Di Baybul tɔk bɔt Devid ɛn Jonɛtan, we na tu man dɛn we bin de na Izrɛl trade. Dɛn ɔltu nɔ bin ol di sem ej ɛn Jonɛtan na bin di kiŋ in pikin; bɔt stil, dɛn na bin tayt padi dɛn. Rid Fɔs Samiɛl 18:1, dɔn una tɔk bɔt dis kwɛstyɔn:
Wetin mek wi nɔ fɔ jɔs mek padi wit pipul dɛn we wi ɛn dɛn ol di sem ej, we gɛt mɔni ɔ lan buk lɛk wi?
Rid Romans 1:11, 12, dɔn una tɔk bɔt dis kwɛstyɔn:
Aw padi dɛn we lɛk Jiova go ɛnkɔrej dɛnsɛf?
Insay dis vidio, notis aw wan yɔŋ brɔda bin fɛn padi dɛn na ples dɛn we i nɔ bin de ɛkspɛkt. Ple di VIDIO, dɔn una tɔk bɔt di kwɛstyɔn dɛn we de dɔŋ.
Insay di vidio, wetin mek Akil in mama ɛn papa bin de wɔri bɔt in padi dɛn na skul?
Wetin mek Akil bin lɛk dɛn padi dɛn de?
Wetin bin ɛp am fɔ lɛf fɔ fil lɛk na in wan de?
5. Aw fɔ gɛt gud padi dɛn?
Lɛ wi tɔk bɔt aw fɔ fɛn gud padi dɛn ɛn aw yusɛf go bi gud padi. Ple di VIDIO.
Rid Prɔvabs 18:24 ɛn 27:17, dɔn una tɔk bɔt dɛn kwɛstyɔn dɛn ya:
Aw gud padi dɛn de ɛp dɛnsɛf?
Yu gɛt dɛn kayn gud padi dɛn de? If yu nɔ gɛt, aw yu go fɛn dɛn kayn padi dɛn de?
Rid Filipians 2:4, dɔn una tɔk bɔt dis kwɛstyɔn:
Fɔ gɛt gud padi dɛn, wisɛf nid fɔ bi gud padi. Aw yu go du dat?
Fɔ fɛn gud padi dɛn, yusɛf nid fɔ bi gud padi
SƆM PIPUL DƐN KIN SE: “I bɛtɛ fɔ gɛt ɛnibɔdi as yu padi pas fɔ de yu nɔ gɛt padi atɔl.”
Wetin yu go se?
WETIN YU DƆN LAN?
We wi tek tɛm pik wi padi dɛn, wi de mek Jiova gladi ɛn wisɛf de bɛnifit.
Rivyu
Wetin mek Jiova bisin bɔt di kayn pipul dɛn we wi de pik as padi?
Uskayn padi dɛn wi fɔ avɔyd?
Aw wi go gɛt tayt padi biznɛs wit di rayt pipul dɛn?
DU MƆ RISACH
Lan bɔt aw gud padi dɛn kin ɛp wi di tɛm we tin nɔ izi fɔ wi.
“Tray fɔ Gɛt Tayt Padi Biznɛs Wit Yu Brɔda ɛn Sista dɛn Bifo di Ɛnd Kam” (Di Wachtawa, Novɛmba 2019)
Lan bɔt sɔm tin dɛn we yu go du fɔ fɛn gud padi dɛn.
Wetin yu fɔ no bɔt padi dɛn na di Intanɛt?
Insay di stori we gɛt di taytul, “A Bin Rili Want Papa,” faynd awt wetin bin mek wan man tink bɔt di padi dɛn we i bin gɛt.