LƐSIN 53
Pik Ɛnjɔymɛnt we De Mek Jiova Gladi
Jiova na “di Gɔd we gladi.” (1 Timoti 1:11) I want wi fɔ gladi ɛn ɛnjɔy wi layf. I kin fil fayn fɔ si se wi de mek tɛm fɔ rɛst. Insay dis lɛsin, wi go si aw wi go yuz dɛn tɛm dɛn de fɔ rɛst di kayn we we wi go ɛnjɔy wisɛf, wi satisfay, ɛn mek Jiova gladi.
1. Wetin wi fɔ mɛmba we wi de pik tin dɛn fɔ ɛnjɔy wisɛf?
Wetin yu kin lɛk fɔ du we yu de rilaks? We sɔm pipul dɛn de rilaks, dɛn kin lɛk fɔ de kwayɛt wan na os de rid buk, lisin to myuzik, wach fim, ɔ wach sɔm tin dɛn na di Intanɛt. Ɔda wan dɛn nɔ kin lɛk fɔ spɛn am kwayɛt wan. Bifo dat, dɛn kin lɛk fɔ go fɛn dɛn padi dɛn, ple gem, ɔ go na bich. Ɔlman go gɛt wetin i lɛk fɔ du; bɔt stil, wi nid fɔ mɛmba se di tin dɛn we wi de pik fɔ ɛnjɔy wisɛf fɔ bi tin dɛn we di “Masta gri wit.” (Ɛfishians 5:10) I impɔtant fɔ mek wi ɔndastand dis bikɔs bɔku pan di tin dɛn we pipul dɛn kin yuz fɔ ɛnjɔy dɛnsɛf gɛt tin dɛn we Jiova et. Tin dɛn lɛk fɛt-fɛt, mami ɛn dadi biznɛs di we aw Gɔd nɔ want, ɔ juju biznɛs. (Rid Sam 11:5) Wetin go ɛp wi fɔ disayd fɔ du di rayt tin we wi de pik tin dɛn fɔ ɛnjɔy wisɛf?
If wi pik padi dɛn we lɛk Jiova, wi go gɛt dɛn gud abit dɛn ɛn wi go pik fayn tin dɛn fɔ ɛnjɔy wisɛf. Insay Lɛsin 48, wi bin lan se “di wan we de waka wit pɔsin we gɛt sɛns go gɛt sɛns.” Bɔt if ɔltɛm wi de spɛn tɛm wit pipul dɛn we nɔ de fala wetin Jiova se rayt ɔ rɔng, “bad tin go apin to” wi.—Prɔvabs 13:20, NWT.
2. Wetin mek i impɔtant fɔ kɔntrol ɔmɔs tɛm wi de spɛn pan tin dɛn we wi de yuz fɔ ɛnjɔy wisɛf?
Ilɛksɛf di tin dɛn we wi de pik fɔ ɛnjɔy wisɛf nɔ go ambɔg wi padi biznɛs wit Jiova, wi nid fɔ tek tɛm lɛ wi nɔ spɛn tumɔs tɛm pan dɛn. If nɔto dat, wi nɔ go gɛt bɛtɛ tɛm fɔ impɔtant tin dɛn. Di Baybul ɛnkɔrej wi fɔ “yuz [wi] tɛm di bɛst we.”—Rid Ɛfishians 5:15, 16.
LAN MƆ
Lan mɔ bɔt aw yu go disayd fɔ du di rayt tin we i kam pan di tin dɛn we yu de pik fɔ ɛnjɔy yusɛf.
3. Nɔ pik bad tin dɛn fɔ ɛnjɔy yusɛf
Wetin mek wi fɔ tek tɛm pik di tin dɛn we wi de yuz fɔ ɛnjɔy wisɛf? Ple di VIDIO, dɔn una tɔk bɔt di kwɛstyɔn dɛn we de dɔŋ.
Aw di gem dɛn we dɛn bin de ple na Rom trade fiba sɔm tin dɛn we pipul dɛn de yuz fɔ ɛnjɔy dɛnsɛf naw?
Insay di vidio, wetin Dani bin lan bɔt tin dɛn we pɔsin kin yuz fɔ ɛnjɔy insɛf?
Rid Romans 12:9, dɔn una tɔk bɔt dis kwɛstyɔn:
Aw dis vas fɔ afɛkt di tin dɛn we yu de pik fɔ ɛnjɔy yusɛf?
Wetin na sɔm tin dɛn we Jiova et? Rid Prɔvabs 6:16, 17 ɛn Galeshians 5:19-21. Afta una rid ɛni skripchɔ, una tɔk bɔt dis kwɛstyɔn:
Uswan pan di tin dɛn we de insay dɛn vas dɛn ya we kɔmɔn pan di we dɛn aw pipul dɛn de ɛnjɔy dɛnsɛf naw?
Wetin go ɛp yu fɔ tek tɛm pik di tin dɛn we yu de yuz fɔ ɛnjɔy yusɛf?
Aks yusɛf dɛn kwɛstyɔn dɛn ya:
Wetin? I gɛt ɛnitin fɔ du wit tin dɛn we Jiova et?
Ustɛm? I go ambɔg di tɛm we a de yuz fɔ du impɔtant tin dɛn?
Udat? I go mek a spɛn bɔku tɛm wit pipul dɛn we nɔ lɛk Jiova?
I bɛtɛ fɔ go fa frɔm denja. Na dat mek wi nɔ fɔ yuz ɛnitin fɔ ɛnjɔy wisɛf if wi notis se i nɔ go gud fɔ wi
4. Yuz yu tɛm di rayt we
Ple di VIDIO, dɔn una tɔk bɔt di kwɛstyɔn we de dɔŋ.
Pan ɔl we di brɔda we de na di vidio nɔ bin de wach ɛnitin we bad, aw di we aw i bin de yuz in tɛm bin de afɛkt am?
Rid Filipians 1:10, dɔn una tɔk bɔt dis kwɛstyɔn:
Aw dis vas go ɛp wi fɔ disayd ɔmɔs tɛm wi go spɛn pan tin dɛn we wi de yuz fɔ ɛnjɔy wisɛf?
5. Pik fayn tin dɛn fɔ ɛnjɔy yusɛf
Pan ɔl we bɔku pan di tin dɛn we de fɔ ɛnjɔy wisɛf kin mek Jiova nɔ gladi, bɔku ɔda wan dɛn de we wi kin ɛnjɔy fɔ du. Rid Ɛkliziastis 8:15 ɛn Filipians 4:8, dɔn una tɔk bɔt dis kwɛstyɔn:
Us fayn we yu kin lɛk fɔ ɛnjɔy yusɛf?
Yu go ebul fɔ fɛn fayn tin dɛn fɔ ɛnjɔy yusɛf
SƆM PIPUL DƐN KIN SE: “I nɔ bad fɔ mek a ɛnjɔy misɛf wit tin dɛn we gɛt fɛt-fɛt, mami ɛn dadi biznɛs di we aw Gɔd nɔ want, ɔ juju biznɛs, wans a nɔ de du ɛniwan pan dɛn tin dɛn de.”
Wetin yu go se?
WETIN YU DƆN LAN?
Jiova want wi fɔ gladi ɛn fɔ pik fayn tin dɛn fɔ ɛnjɔy wisɛf.
Rivyu
Uskayn tin dɛn Kristian fɔ avɔyd we i de pik tin dɛn fɔ ɛnjɔy insɛf?
Wetin mek wi fɔ tek tɛm wit ɔmɔs tɛm wi de spɛn pan tin dɛn we wi de yuz fɔ ɛnjɔy wisɛf?
Wetin mek yu go want fɔ pik tin dɛn fɔ ɛnjɔy yusɛf we go mek Jiova gladi?
DU MƆ RISACH
Lan udat fɔ disayd wetin yu de pik fɔ ɛnjɔy yusɛf.
Lan aw yu go disayd fɔ du di rayt tin we i kam pan di tin dɛn we yu de pik fɔ ɛnjɔy yusɛf.
“Di Tin dɛn we Yu De Pik fɔ Ɛnjɔy Yusɛf De Bɛnifit Yu?” (Di Wachtawa, Ɔktoba 15, 2011)
Insay di stori we gɛt di taytul “A Bin Ivin Lɛf fɔ Tink Bad bɔt Wetman Dɛn,” lan wetin mek wan man bin chenj di tin dɛn we i bin de yuz fɔ ɛnjɔy insɛf.
Lan aw wan mama bin disayd fɔ du di rayt tin we i kam pan ɛnjɔymɛnt we de sho wich biznɛs.