Udat Na Jizɔs?

Bɔku pipul dɛn sabi Jizɔs in nem bɔt dɛn nɔ rili no bɔku tin bɔt am. Sɔm ɔda pipul dɛn gɛt difrɛn aydia bɔt udat Jizɔs rili bi. Wetin di Baybul se bɔt Jizɔs?

1. Udat na Jizɔs?

Jizɔs na pawaful enjɛl we de na ɛvin. Di Baybul se na in “fɔs Gɔd mek bifo ɛni ɔda tin.” (Koloshians 1:​15) Di Baybul tɔk bak se Jizɔs na di “wangren Pikin we [Gɔd] insɛf sɛf mek.” (Jɔn 3:​16) Jizɔs bin de wok wit in Papa, we na Jiova, ɛn i ɛp Am fɔ mek ɔl di ɔda tin dɛn. (Rid Prɔvabs 8:​30.) Jizɔs kɔntinyu fɔ ɛnjɔy tayt padi biznɛs wit Jiova. I bin fetful fɔ tɛl pipul dɛn Gɔd in mɛsej ɛn tɛl dɛn wetin Gɔd want dɛn fɔ du, na dat mek dɛn kɔl am “di Wɔd.”​—Jɔn 1:​14.

2. Wetin mek Jizɔs bin kam na di wɔl?

Na lɛk 2,000 ia dɔn pas we Jiova bin pafɔm wan mirekul. I bin yuz in oli spirit fɔ transfa Jizɔs in layf frɔm ɛvin to wan yɔŋ vajin uman in bɛlɛ, ɛn di uman in nem na Meri. Na dat mek dɛn bin bɔn Jizɔs as mɔtalman. (Rid Lyuk 1:​34, 35.) Jiova bin sɛn Jizɔs fɔ kam na di wɔl fɔ bi di Mɛsaya ɔ Krays, ɛn fɔ sev mɔtalman.a Jizɔs bin du ɔl wetin di Baybul bin dɔn tɔk se di Mɛsaya go du, ɛn dat bin mek pipul dɛn ebul fɔ no se in na “di Krays, di Gɔd we de alayv in Pikin.”​—Matyu 16:​16.

3. Usay Jizɔs de naw?

Afta we Jizɔs bin day as mɔtalman, Gɔd bin gi am layf bak as enjɛl ɛn i bin go bak na ɛvin. We i go na ɛvin, “Gɔd gi am pozishɔn we ay pas di wan we i bin gɛt.” (Filipians 2:​9) Rayt naw, Jizɔs na pawaful enjɛl; na Jiova nɔmɔ gɛt pawa pas am.

4. Jizɔs nɔto Ɔlmayti Gɔd

Di Baybul tich se pan ɔl we Jizɔs na pawaful enjɛl na ɛvin, i stil de obe in Gɔd ɛn Papa, we na Jiova. Wetin mek wi se so? Ple di VIDIO fɔ si wetin di Baybul tich bɔt aw Jizɔs difrɛn frɔm Gɔd Ɔlmayti.

VIDIO: Jizɔs Krays Na Gɔd? (3:​22)

Di skripchɔ dɛn we de dɔŋ go ɛp wi fɔ ɔndastand di difrɛns bitwin Jiova ɛn Jizɔs. We una rid ɛni skripchɔ, una tɔk bɔt di kwɛstyɔn we de nia am:

Rid Lyuk 1:​30-32.

• Wetin di enjɛl bin tɔk bɔt Jizɔs ɛn Jiova Gɔd we na “di Wan we De Pantap Ɔlman”?

Rid Matyu 3:​16, 17.

• We Jizɔs bin de baptayz, wetin di vɔys frɔm ɛvin bin se?

• Udat yu tink se bin de tɔk?

Rid Jɔn 14:​28.

• Bitwin papa ɛn in bɔypikin, udat na di big wan ɛn udat gɛt mɔ pawa?

• Wetin Jizɔs bin min we i kɔl Jiova in Papa?

Rid Jɔn 12:​49.

• Yu tink se Jizɔs bin fil se in ɛn in Papa na di sem pɔsin? Wetin yu tink?

5. Wetin pruv se na Jizɔs na bin di Mɛsaya?

VIDIO: Jizɔs Bin Du Ɔl Wetin di Prɔfɛsi dɛn Se bɔt Am (3:​03)

Rid di Baybul prɔfɛsi dɛn, dɔn una tɔk bɔt di kwɛstyɔn dɛn:

Rid Mayka 5:​2 fɔ lan usay di Mɛsaya bin fɔ bɔn.b

• Yu tink se dis prɔfɛsi bin kam tru di tɛm we dɛn bin bɔn Jizɔs?​—Matyu 2:​1.

Rid Sam 34:​20, NWT ɛn Zɛkaraya 12:​10 fɔ si wetin di Baybul bin dɔn tɔk bɔt di tɛm we di Mɛsaya go day.

• Yu tink se dɛn prɔfɛsi dɛn ya bin kam tru?​—Jɔn 19:​33-​37.

• Yu tink se na Jizɔs bin du sɔntin fɔ mek dɛn prɔfɛsi dɛn ya kam tru?

• Wetin dis pruv to yu bɔt Jizɔs?

WETIN YU DƆN LAN?

Jizɔs na pawaful enjɛl. In na Gɔd in Pikin ɛn in na di Mɛsaya.

Rivyu

• Wetin mek di Baybul se na Jizɔs “fɔs Gɔd mek bifo ɛni ɔda tin”?

• Wetin Jizɔs bin de du bifo i kam na di wɔl?

• Aw wi no se Jizɔs na di Mɛsaya?

DU MƆ RISACH

Lan mɔ bɔt aw wi no se Jizɔs na di Mɛsaya.

“Di Prɔfɛsi dɛn we Tɔk bɔt di Mɛsaya Pruv se Jizɔs Na di Mɛsaya?” (Atikul na di wɛbsayt)

Lan mɔ fɔ si if di Baybul tich se Gɔd bɔn Jizɔs di sem we aw mɔtalman kin bɔn pikin.

“Wetin Mek Dɛn Kɔl Jizɔs Gɔd in Pikin?” (Atikul na di wɛbsayt)

Lan bɔt wetin mek di Triniti nɔto sɔntin we di Baybul de tich.

“Jizɔs Na Gɔd?” (Di Wachtawa, Epril 1, 2009)

Rid bɔt aw wan uman in layf bin chenj afta we i lan wetin di Baybul se bɔt Jizɔs.

“Wan Ju Uman Ɛksplen Wetin Mek I Chɛk Wetin I Bin Biliv” (Awek!, Me 2013)