Na Ɔl Sɛlibreshɔn dɛn De Mek Gɔd Gladi?

Jiova want wi fɔ ɛnjɔy layf ɛn fɔ ivin gladi-gladi sɔntɛnde. Bɔt na ɔl sɛlibreshɔn ɛn ɔlide dɛn de mek i gladi? Aw wi go sho se wi lɛk Jiova we i kam pan sɛlibreshɔn dɛn?

1. Wetin mek bɔku sɛlibreshɔn dɛn nɔ de mek Jiova gladi?

Yu go sɔprayz fɔ no se bɔku sɛlibreshɔn dɛn kɔmɔt frɔm tichin dɛn we nɔ de na di Baybul ɔ frɔm pegan dɛn. Dɛn kayn sɛlibreshɔn dɛn de kin gɛt sɔntin fɔ du wit lay lay rilijɔn. Dɛn kin gɛt sɔntin fɔ du wit juju biznɛs ɔ di biliv fɔ se di sol nɔ de day. Sɔm sɛlibreshɔn dɛn gɛt sɔntin fɔ du wit sɔm lay lay tin dɛn we pipul dɛn biliv ɔ i gɛt sɔntin fɔ du wit gud lɔk. (Ayzaya 65:​11, NWT) Jiova wɔn di wan dɛn we de wɔship am se: “Una nɔ gɛt ɛnitin fɔ du wit . . . tin we dɔti.”​—2 Kɔrintians 6:​17.a

2. Aw Jiova de fil bɔt sɛlibreshɔn dɛn we de gi ɔnɔ to mɔtalman dɛn we dɛn nɔ fit fɔ gɛt?

Jiova wɔn wi nɔ fɔ “abop pan mɔtalman.” (Rid Jɛrimaya 17:​5.) Sɔm ɔlide dɛn de ɔnɔ rula dɛn ɔ sojaman dɛn. Ɔda wan dɛn de ɔnɔ tin dɛn we tinap fɔ di kɔntri ɔ indipɛndɛns. (1 Jɔn 5:​21) Ɔda wan dɛn de mek pipul dɛn sɔpɔt pɔlitiks ɔ ɔganayzeshɔn dɛn. Aw yu tink se Jiova go fil if wi gi ɔnɔ to pɔsin ɔ ɔganayzeshɔn we i nɔ fit fɔ gɛt, mɔ di wan dɛn we de sɔpɔt tin dɛn we de agens wetin I want?

3. Wetin kin apin na sɔm sɛlibreshɔn dɛn we de mek i nɔ fayn?

Di Baybul kɔndɛm fɔ ‘drink pasmak, fɔ miks pan dɛn wayl pati, ɛn dɛn pati dɛn fɔ drink pasmak.’ (1 Pita 4:​3) Na sɔm sɛlibreshɔn dɛn, pipul dɛn nɔ kin ebul kɔntrol dɛnsɛf ɛn dɛn de du ɔlkayn bad tin. Fɔ kɔntinyu fɔ bi Jiova in padi, wi nid fɔ avɔyd ɛnitin we gɛt fɔ du wit dis kayn dɔti we aw pipul dɛn de liv.

LAN MƆ

4. Nɔ put an pan sɛlibreshɔn dɛn we nɔ de ɔnɔ Jiova

Rid Ɛfishians 5:​10, dɔn una tɔk bɔt dɛn kwɛstyɔn dɛn ya:

• Wetin wi nid fɔ mek shɔ ɔf we wi de disayd if wi fɔ sɛlibret ɛni ɔlide?

• Us ɔlide dɛn kɔmɔn na di say we yu de?

• Yu tink se dɛn ɔlide dɛn ya de mek Jiova gladi?

Fɔ ɛgzampul, yu dɔn ɛva wɔnda wetin Gɔd tink bɔt batde? Di Baybul nɔ ɛva tɛl wi se pipul dɛn we bin de wɔship Jiova sɛlibret dɛn batde. Bɔt i tɛl wi bɔt tu batde dɛn we pipul dɛn we nɔ de sav Jiova bin mek. Rid Jɛnɛsis 40:​20-​22 ɛn Matyu 14:​6-​10. Dɔn una tɔk bɔt dɛn kwɛstyɔn dɛn ya:

• Wetin bin apin pan ɔltu dɛn batde dɛn de?

• Frɔm dɛn stori dɛn ya na di Baybul, aw yu tink se Jiova de fil bɔt batde?

Stil yu go de wɔnda, ‘Fɔ se i rili impɔtant to Jiova if a tek pat pan batde ɔ ɔda sɛlibreshɔn dɛn we nɔ de na di Baybul?’ Rid Ɛksodɔs 32:​1-8. Dɔn ple di VIDIO ɛn una tɔk bɔt di kwɛstyɔn dɛn we de dɔŋ.

VIDIO: Ɔlide ɛn Sɛlibreshɔn dɛn we Gɔd Nɔ Lɛk (5:​07)

• Wetin mek wi nid fɔ no wetin Jiova want?

• Aw wi go du dat?

Aw wi go no us sɛlibreshɔn dɛn Gɔd nɔ lɛk?

• Di sɛlibreshɔn gɛt ɛnitin fɔ du wit tichin dɛn we nɔ de na di Baybul? Fɔ sabi di ansa, tray fɔ no usay di ɔlide kɔmɔt.

• Di sɛlibreshɔn dɛn de ɔnɔ mɔtalman, ɔganayzeshɔn, ɔ tin dɛn we tinap fɔ di kɔntri di kayn we we dɛn nɔ fit fɔ gɛt? Na Jiova wi de ɔnɔ pas ɔl ɛn na in wi abop pan fɔ sɔlv mɔtalman prɔblɛm dɛn.

• Di kɔstɔm dɛn ɛn di tin dɛn we dɛn de du de go agens di tin dɛn we di Baybul de tich? Wi nid fɔ avɔyd ɛnitin we go mek wi nɔ klin na Gɔd in yay.

5. Ɛp ɔda pipul dɛn fɔ rɛspɛkt wetin yu biliv

VIDIO: Tek Tɛm Ɛksplen Wetin Yu Biliv (2:​01)

Rid Matyu 7:​12, dɔn una tɔk bɔt dɛn kwɛstyɔn dɛn ya:

• Akɔdin to dis vas, yu tink se yu fɔ tɛl yu fambul dɛn we nɔ de sav Jiova se dɛn nɔ fɔ sɛlibret ɛni ɔlide?

• Wetin yu go du fɔ mek yu fambul dɛn no se pan ɔl we yu nɔ de jɔyn dɛn fɔ tek pat pan sɛlibreshɔn, yu stil lɛk ɛn valyu dɛn?

6. Jiova want wi fɔ gladi

Jiova want wi fɔ spɛn gud tɛm wit wi fambul ɛn padi dɛn. Rid Ɛkliziastis 8:​15, dɔn una tɔk bɔt dis kwɛstyɔn:

• Aw dis vas sho se Jiova want wi fɔ gladi?

Jiova want in pipul dɛn fɔ gladi ɛn ɛnjɔy dɛnsɛf. Ple di VIDIO fɔ si aw dis bin dɔn de apin na wi intanashɔnal kɔnvɛnshɔn dɛn.

VIDIO: Wi Brɔda ɛn Sista dɛn Kin Du Gud Na Wi Intanashɔnal Kɔnvɛnshɔn Dɛn (5:​40)

Rid Galeshians 6:​10, dɔn una tɔk bɔt dɛn kwɛstyɔn dɛn ya:

• Wi nid fɔ sɛlibret kɔmɔn ɔlide dɛn fɔ mek wi “du gud” to ɔda pipul dɛn?

• Wetin go mek yu gladi pasmak, na we yu gi bikɔs ɔf ɔlide ɔ na we yu gi bikɔs yu want fɔ gi?

• Sɔntɛnde, bɔku Jiova Witnɛs dɛn kin du sɔntin spɛshal fɔ dɛn pikin dɛn ɛn ivin sɔprayz dɛn wit gift. If yu gɛt pikin dɛn, wetin na sɔm spɛshal tin dɛn we yu go du fɔ dɛn?

WETIN YU DƆN LAN?

Jiova want wi fɔ spɛn tɛm wit wi fambul ɛn padi dɛn. Bɔt i want wi bak fɔ avɔyd sɛlibreshɔn dɛn we nɔ de mek i gladi.

Rivyu

• Us kwɛstyɔn dɛn wi fɔ tink bɔt fɔ no if wan patikyula sɛlibreshɔn nɔ de mek Jiova gladi?

• Aw wi go ɛp wi fambul ɛn padi dɛn fɔ ɔndastand wetin wi dɔn disayd bɔt ɔlide dɛn?

• Aw wi no se Jiova want wi fɔ gladi ɛn fɔ ɛnjɔy wisɛf?

DU MƆ RISACH

Tink bɔt sɔm patikyula ɔlide dɛn we Kristian dɛn nɔ de sɛlibret.

“Wetin Mek Jiova Witnɛs dɛn Nɔ De Sɛlibret Sɔm Ɔlide Dɛn?” (Atikul na di wɛbsayt)

Lan 4 rizin dɛn we mek wi biliv se batde sɛlibreshɔn nɔ de mek Gɔd gladi.

“Wetin Mek Jiova Witnɛs dɛn Nɔ De Sɛlibret Batde?” (Atikul na di wɛbsayt)

Wach aw yɔŋ wan dɛn we lɛk Jiova kin mek i gladi insay ɔlide tɛm.

Jiova Rili Valyu Yu (11:35)

Bɔku bɔku Kristian dɛn dɔn disayd nɔ fɔ sɛlibret Krismas. Aw dɛn fil bɔt wetin dɛn disayd?

“Dɛn Fɛn Sɔntin We Bɛtɛ pas Wetin Dɛn Bin Gɛt” (Di Wachtawa, Disɛmba 1, 2012)