Baa ŋ nɔ pa tiindaŋndo maa o nɛi sakpoo choo Chɛhowa kialu yamɛi teleŋ o teleŋ ni? Ei. Mi Ebilaham bii bila maa, Chɛhowa cho walaŋ, nduyɛ o nɔ taasioo o hiou wana o wana. Ndu cho ‘Wana Kialaa Ŋyama inyiɛɛyo le chieeŋndo kpou’ ni. O pɛɛku Po ndɔɔ le waŋnda yamaŋ kilullo, nduyɛ mbo ke ndu dioo le keŋ tosaa. (Chɔŋ 5:22) Mi Chiisu nda Finya ndɔ kpou che nyɛ cho waŋndo o kɔllo. (Mat. 9:4) Lelaŋ, teleŋ o teleŋ nda kilul pɛ waŋndo yamɛi, o nɛi “kɛndɔɔ” choo nda kialu ndi ni. Maa ŋ kɛɛsiaŋ o kɔl le tiindaŋndo dɔwɔɔ o Chɛhowa, a o kɛɛsiaala ndɔlaŋ niŋ. Nduyɛ ŋ nɔ miŋ kɛsiŋ o kɔl maa, ŋ suliŋ kposoŋ le waŋnda yamɛi kilul te. Chɛhowa tiuba ni mbo tosa keŋ. (Aisa. 55:​8, 9) Lelaŋ, ŋ nɔ miŋ mal nyɛ o nyɛ ndu nda Po ndɔɔ o ba, le yamɛi kiolɔɔ. Nduyɛ miŋ nɔ tiindaŋndo maa, a cho ndi kiolɔɔ o nɛi sakpoo choo. Kanifuule mi Masa naa tol tamasi Finya ndɔ wo kɔɔli, le sakpoyɛi a nyiɛɛye chɔmndo.—Aisa. 11:​3, 4. w24.05 7 ¶18-19

Ŋ tiuba miŋ pɛɛku suɛi sɔvɛ sɔvɛi le Chɛhowa piɛiyo a kɔllo kpou, o nyɛ Chiisu dimi a Nataaniɛɛ okɔɔ wo niŋ, teleŋ tase nda chiikaŋndo. Mɛɛ Filipi hiŋ a chaŋndɔ Nataaniɛɛ le mbo chiikaŋ a Chiisu, mi suɛi kɔndɔfille yɔŋnuŋ. Mi che bɛɛ Nataaniɛɛ ndoo chiikaŋ ndɔ a Chiisu lepilɛ bɛɛ le, kɛ mi Chiisu dimi aa: “Isɔluɛinɔɔ kpeekpei cho hoo ni, o nɔ sɔŋ o sɔŋ te wo.” (Chɔŋ 1:47) Mi Chiisu cha Nataaniɛɛ maa wana ndoo sandu wo kpeekpei o wa ni. Mi chɛ bɛɛ wana hakioo Nataaniɛɛ wa ni, kɛ ndoo nɔ sondo yeelɛi o sɔɔŋ niŋ te, ndoo sandu o nyɛ o nyɛ niŋ. Mi keŋ nɛŋi Chiisu kɔllo tau nduyɛ mbo chandu Nataaniɛɛ le keŋ. Sɔɔŋ bɔɔbɔɔ naŋ nɔ miŋ tosa le Chɛhowa kɔllo nɛŋioo woŋ, ŋ Sam bolle 15 soo a muŋ okɔɔ woŋ, ŋ chiɛɛliaŋ a mɛɛ naŋ nɔ miŋ bii acheleŋnda yɛ. Le tamaseliiyo, Sam 15:3 dimi maa, wana wa miallo o tɛndii Chɛhowa wo niŋndo, “o tɛɛmbuu wana tɔɔ a diɔɔmule ndɔleŋ te, o tosal wana nda chiɛɛliaŋ ndo suɛi wɔɔŋ te, nduyɛ o tusi chaaŋaa nduaa lasiɔmbu le.” Ke naŋ nɔ le suɛiyo soliŋndo kpeku o nɛi wɔɔŋ waa nuaa choo, mbo tɛɛmbuu acheleŋnda tɔɔ.—Chemi. 1:26. w24.06 10 ¶7, 9; 11 ¶10

Te a bɛɛndiaŋ pɛ nyɛkɛndɛi le wali pollo, naapum keŋ cho num mala ma wa fɛɛsɛŋ te a wa pɛ suɛi o acheleŋnda lo. Mi Chiisu mala buɛiyaa nduaa ma bɛɛndiaŋ nyɛkɛndɛi tuupa mbo viam nda yooŋgu kɛndɔɔ dimioo. (Luku 10:​1-11) Nduyɛ mɛɛ nda dɔu nyɛ Chiisu pɛɛku nda wo o wali niŋ, mi keŋ mala nda le ma wa a nyaale o yooŋgu kɛndɔɔ dimioo niŋ. Vɛɛ naŋ bɛɛndiaŋ yɛ nyɛkɛndɛi le wali pollo? Ŋ nɔ miŋ yiyaŋ yiŋgoloŋ a nyɛ naŋ cho waŋnda dimullo okɔɔ, vɛlɛ miŋ dimul nda ndu o nɛi tɛtɛlɔɔ niŋ. Ŋ nɔ vɛlɛ miŋ yiyaŋ a nyɛ waŋnda apum dimi niŋndo okɔɔ, nduyɛ a mɛɛ naŋ cho nda mulullɛ. Te ŋ komal pɛ waŋnda, ŋ nɔ miŋ kindiŋ le waa fɛɛsɛŋ, miŋ mam muɛɛŋ, vɛlɛ miŋ wa wanaa ichaŋya. w24.04 16 ¶6-7