O yɔŋ bɛɛ mi acheleŋnda bii num biiyɔ wɔɔŋndo, a nɔla ma nɔ tiindaŋndo maa Chɛhowa kaala num, nduyɛ o che num wana sɔvɛ. Te a wa pɛ o ‘kɔl tambɛiyo’ niŋ, loonuŋ maa Chɛhowa che sɔɔŋ kɛndɔŋ num o kɔl, nduyɛ mbo huŋ a num naa ndu chua. (Chɔŋ 6:44) Teleŋ o teleŋ, o cho o bɛɛndiaŋ le num malaa kanifuule a cho wana sɔvɛ ndu o hɔl. Tamasi Chiisu wo nɔla mbo pɛɛku naa a mɛɛ Chɛhowa sinaŋ yɛ okɔɔ. Teleŋ Chiisu wa yooŋgu kɛndɔɔ dimioo o chieeŋndo choo wo, mi ndoo tosal wanaa waŋnda chua chɔdɔ wa kɛndɛi, nduyɛ mi ndoo bii nda o nɛi kaalaa niŋ. (Mat. 9:​9-12) Mɛɛ chua wa a naa wɔɔŋ wɔɔŋndo wo pilaŋ doma Chiisu wo le mbo seŋgu, mi Chiisu dɛɛniaa ndu kɔllo, nduyɛ mbo chandu ndu le laalaŋ ndɔɔ. (Maki 5:​25-34) Mi Chiisu tual tamasi Finya ndɔ wo kɔɔli o nɛi walaŋndo choo. (Chɔŋ 14:9) Lelaŋ, a nɔ ma nɔ tiindaŋndo maa Chɛhowa che num wana sɔvɛ, nduyɛ o sina suliŋnda numnda kɛndɛlaŋ, mɛɛ laalaŋ numndo a kaala ŋ nɔ le ndu wo cho nuaa yɛ. w24.10 7 ¶4-5

Teleŋ Deeve wa yoomu wo, mi sɔɔŋ palaŋ bɔɔbɔɔ komal ndu ŋ tosa mbo chaŋ ndoŋ. Mi wanaa bɔɔbɔɔ tul ndu leyɛ, hali wanaa ndoo tiindaŋ nda bɛɛ. (1 Sam. 19:​10, 11; 2 Sam. 15:​10-14, 30) Teleŋ pilɛ, mbo poonyiaa aa: “I cho o saŋgɛi yɔkɔɔ a nyɛ nɛiyaa cho ya choo wo. Ichɔl pii pii I lɔl kpele nuu liviaa a mɛmiaŋ. I lo chaŋndo tei mi mɛmiaŋ ma pɛ o kpele nuu maa mamɛŋ.” (Sam 6:6) Mi che bɛɛ sɔɔŋ palaŋ wa Deeve choo, kɛ ndoo nɔ tiindaŋndo maa Chɛhowa kaala ndu. Mbo poonyiaa aa: “Chɛhowa cho nilaŋ yaŋɔɔ o chaŋ ya cho wo.” (Sam 6:8) Diomnda cho o tɛɛsii naa hau niŋndaŋ, la chɔm mɛɛ kpɛ Chɛhowa buulaŋ a naa yɛ. Mi Deeve dimi maa i wa ko mɛɛ Chɛhowa duau nuaa mɛmɛma nduaŋ o bɔlɔ yau visioo niŋ, ɔɔ mbo poonyiaa maŋ o yauwo choo yɛ. Deeve ndoo sina kɛsɛ maa mi Chɛhowa cha, nduyɛ mbo loonuŋ nyɛ nɛiyaa o wa niŋndo. Ndoo nɔ tiindaŋndo kɛsɛ maa o cho ko bahawɛi ndɔɔ le Finya ndɔ kaalaa o choo choo niŋ ndoo sina le, kɛ ndoo sina vɛlɛ mɛɛ o wa sinaŋndo yɛ. w24.12 22 ¶11-12

Ŋ nɔ ko miŋ tosa wallo kalaŋ le simnɔŋndo Kilisiɔŋaa kendu o Mɛlɛka piɛiyo niŋnda le. Kɛ ŋ nɔ miŋ hiou lachi a waa lende. Hei sim ni maa, ŋ nɔ miŋ hiu tiindaŋndo dɔwɔɔ o naapila niŋ te. (1 Kɔl. 10:12) Ŋ nɔ miŋ hiou lachi a ‘yaasiaŋndo nyɛkɛndɛi,’ le sinaa te ŋ cho pɛ hiouwɔɔ lachioo tosaa. Mɛɛ kiilanɔɔ Pɔɔl wa Koloosiaŋnda yauwo poonyiallo, mbo kindila mɛɛ i cho suɛi sɔvɛ, le miŋ hiou lachi a waa Kilisiɔŋaa kendu o Mɛlɛka piɛiyo niŋnda yɛ. Mi che bɛɛ Kilisiɔŋaa kaŋ ndaa simnuŋ niŋ kaasoŋnda o Mɛlɛka piɛiyo niŋ, kɛ mi Pɔɔl sila nda maa, a nɔ ma wa yekeŋ yɔŋii nda chɛl le mi yiyaŋnda chieeŋndo la piiliaŋ nda. (Kolo. 2:​6-10) Naapum, Ɛpafulɔɔ ndoo sina Kilisiɔŋaa kaŋ nyɛkɛndɛi. Lelaŋ, teleŋ o teleŋ mi ndoo piɛi le nda, le ma “sim yi, nduyɛ kiisaŋ o kiisaŋ ve” nda le. (Kolo. 4:12) Yɛɛ naŋ pɛɛku yɛ o hei niŋ? Ŋ pɛɛku maa, Pɔɔl nda Ɛpafulɔɔ ndaa bii bila maa, mi che bɛɛ ŋ nɔ miŋ nyuna Mɛlɛka le mbo mala naa miŋ hiou lachi a waa Kilisiɔŋaa kendu o ndu piɛiyo niŋnda, kɛ naapila bɛɛ nɔ miŋ dɔu sɛmbɔɔ. Ndaa yeema mi Koloosiaŋnda ndaa hiou lachi a waa Kilisiɔŋaa kendu o Mɛlɛka piɛiyo niŋnda, mi che bɛɛ simulta yɛ yɛlaŋ la wa nda komallo. w24.04 6-7 ¶16-17