Ntangu beto kena kubaka banzengolo, nzola ketinda beto na kusosa mambote ya “muntu yankaka” mpe ya kuvuanda na kumikitisa. (1 Ko. 10:23, 24, 32; 1 Tim. 2:9, 10) Na manima beto kebaka nzengolo yina kemonisa ti beto kezolaka mpe beto kezitisaka bantu yankaka. Kana nge zola baka nzengolo mosi ya mfunu, kanisa yinki yakelomba samu na kukokisa yau. Yesu longaka beto kusosa “kuzaba mbongo yikua yakelomba” tekila ya kusala diambu mosi. (Luka 14:28) Na yau tadila ntangu yikua, mbongo yikua, mpe bangolo yina yakelomba samu na kukokisa nzengolo mosi. Na maluaku yankaka, yalenda lomba nge solola na dibuta na nge samu na kuzaba diambu yina muntu mosimosi ya dibuta na nge fueti sala samu na kusadisa nge nge kokisa nzengolo na nge. Samu na yinki kusala mambu mutindu yina kele na mfunu? Yalenda monisa ti yakelomba kubongisa mambu yankaka na nzengolo na nge to yakele na nzengolo yankaka yina meluta mbote. Mpe ntangu nge mesolola na bantu ya dibuta na nge mpe nge mekuwa makanisi na bau, bakevuanda pene ya kusadisa nge samu nge nunga kukokisa banzengolo na nge. w25.01 18-19 ¶14-15

Yezaya kena kumonisa mfunu yina beto fueti ‘sepela mpe kuvuanda na kiese’ na paradiso ya kimpeve. Yehova nde salaka paradiso yango ya kimpeve. (Yis. 65:18, 19.) Yakele diambu ya kukamua ve mutindu yandi kena kusadila beto samu na kusadisa bantu bakatuka na bankubukulu ya yinza yayi yina kelongaka bau ve kedika samu na Nzambi, mpe beto kesadisaka bau samu bakota na paradiso na beto ya kitoko ya kimpeve! Beto kele na kiese samu na balusakumunu yayi beto kele na yau ya kuvuanda na kedika, mpe beto kevuandaka na nsatu ya ngolo ya kutubila bantu yankaka bakedika yango. (Yir. 31:12) Beto kevuandaka diaka na butondi mpe na kiese samu na kivuvu yina beto kele na yau ya kuvuanda bantu yina kevuandaka na kati ya paradiso ya kimpeve. Biblia mepesa nsilulu ti beto ‘ketunga bayinzo mpe [beto] kezinga kuna [mpe beto] kekuna bilanga ya vinu mpe [beto] kekudia mbuma na yau.’ Beto ‘kesala ve kisalu ya ngolo samu na mpamba’ samu beto kevuanda bantu yina ‘Yehova mesakumunaka.’ Yandi melaka beto luzingu ya lutanunu mpe ya kiese, yina kele na lukanu ya kedika. Yandi mezaba nsatu ya konso muntu mpe yandi ‘kekokisa nsatu ya kisemua nionso yina kele na luzingu.’​—Yis. 65:20-24; Nz. 145:16. w24.04 22-23 ¶11-12

Beto kesalaka ti Yehova kuma Dibanga na beto ntangu beto ketudilaka yandi ntima na beto ya mvimba. Beto ketulaka ntima ti kuzitisa yandi ata na bantangu ya mpasi, kenatina beto mambote. (Yis. 48:17, 18) Ntangu nionso yina beto kemonaka ti Yehova mesadisa beto, beto ketudilaka yandi diaka ntima mingi kuluta. Beto kekumaka na kivuvu ti kaka Yehova kele na dikoki ya kusadisa beto beto kanga ntima na konso nzomono ata yakele mpasi yinki mutindu. Yehova kele lokola dibanga mosi ya nene, to mongo yina kebikanaka kaka mutindu yakele. Kimuntu mpe lukanu na yandi kesobaka ata fioti ve. (Mal. 3:6) Ntangu Adamu mpe Eva tombokilaka Yehova, yandi sobaka ve lukanu na yandi samu na bantu. Mutindu ntumua Paulo sonikaka, Yehova ‘lenda kukiwangana ve.’ (2 Tim. 2:13) Yazola monisa ti yavuanda yinki mambu mesalama to yinki bantu yankaka mesala, Yehova lenda soba ve bikadulu, bansiku, to bansikudukusu na yandi. Lokola Yehova kesobaka ve, beto mezaba ti yandi kesadisa beto na bantangu ya mpasi mpe yandi kekokisa bansilulu na yandi ya bilumbu kena kuiza.​—Nz. 62:6, 7. w24.06 27-28 ¶7-8