Samu na kukatula beto na kinanga ya disumu mpe ya lufua, Yehova bakaka nkubukulu samu Yesu pesa nkudulu. Kasi yinki mutindu nkayilu ya muntu kaka mosi ya kukoka lenda katula bamilion ya bantu na kinanga? Ntumua Paulo mesasila: “Mutindu kaka kukondua luzitu ya muntu kaka mosi [Adamu] kumisaka bantu mingi bansumuki, mutindu mosi mpe luzitu ya muntu kaka mosi [Yesu] kekumisa bantu mingi bantu ya lunungu.” (Rom. 5:19; 1 Tim. 2:6) Na bampova yankaka, yalombaka kukondua luzitu ya muntu mosi kaka ya kukoka samu beto kuma bananga ya disumu mpe ya lufua. Na yau, yalombaka mpe luzitu ya muntu mosi kaka ya kukoka samu beto katuka na kinanga. Yehova lendaka pesa kaka ve nzila na bana ya Adamu ya lunungu bazinga mvula na mvula? Samu na bantu ya kukondua kukoka, yazolaka monana lokola diambu ya mbote mpe yina mebonga. Kasi samu na Yehova, yazolaka vuanda ve diambu ya lunungu. Lokola Yehova kele Nzambi ya lunungu, yandi lendaka ata fioti ve kukanga meso na disumu ya nene yina Adamu salaka. w25.01 21 ¶3-4

Ntumua Paulo zabaka ti yakumaka pene samu bakufua yandi, kasi yandi vuandaka na bamfunu ya kusepela na luzingu na yandi. Yandi tubaka: “Munu mezawula tii na nsuka, munu metanina kiminu.” (2 Tim. 4:6-8) Paulo bakaka banzengolo ya mbote na luzingu na yandi ya Buklisto, mpe yandi kukindimisaka ti Yehova vuandaka sepela na yandi. Beto diaka beto kevuandaka na nsatu ya kubaka banzengolo ya mbote samu beto ndimama na Nzambi. Yinki mutindu beto lenda sala yau? Paulo tubaka samu na yandi mosi mpe samu na Baklisto yankaka ya kukuikama ti: “Beto kena kutambula na kiminu, kasi na kumona ve.” Na Biblia, mpova “kutambula” kemonisaka mbala yankaka mutindu muntu mepona kunatina luzingu na yandi. Kana muntu kena kutambula na kiminu, yandi kebakaka banzengolo yina mesimbama na kiminu na yandi na Yehova Nzambi. Mambu yina yandi kesalaka kemonisaka ti yandi kekukindimisaka ti Nzambi kepesa yandi n’sendo mutindu yandi kelandaka banduengoso ya Yehova yina kele na Mpova na Yandi.​—Nz. 119:66; Ebr. 11:6. w25.03 20 ¶1-2

Na lusadusu ya mpeve ya Nzambi, bantu mingi yina vuandaka na ntama na kimuntu ya bibulu salaka bansobolo ya kukamua na luzingu na bau. (Yis. 65:25) Basalaka ngolo samu na kukatula bikadulu na bau ya yimbi. (Ef. 4:22-24) Kondua ntembe, bisadi ya Nzambi kele kaka bantu ya kukondua kukoka, na yau baketatamana kusala banzimbala. Kasi, Yehova mesangisa ‘bantu ya mitindu nionso’ na kikangulu ya nzola mpe ya kiyenge yina kezenganaka ve. (Tito 2:11) Yakele kimangu yina kaka Nzambi Nkua-ngolo nionso kele na dikoki ya kusala! Bampova na yandi kekokisamaka ntangu nionso. (Yis. 55:10, 11) Bubu yayi beto kele deja na paradiso ya kimpeve. Yehova salaka dibuta ya bansambidi na yandi yina kokana ve na yankaka. Lokola beto kele na kati ya dibuta yango, beto kele na kiyenge mingi mpe beto kekukimonaka beto kele na lutanunu na kati ya yinza yayi ya kinkesi. (Nz. 72:7) Samu na bamfunu yango, beto kevuandaka na nsatu ya kusadisa bantu mingi bakuiza sangana na beto na kati ya dibuta yango ya bampangi. Beto lenda sala yau na kutulaka makanisi na beto na kisalu ya kukumisa bantu banlonguki.​—Mat. 28:19, 20. w24.04 23 ¶13, 15