Daniele

10 Na mvula ya tatu ya mfumu Siruse ya Perse, Daniele yina ba vanda bokilaka Beletazare, kuzwaka luzabusu, mpe nsangu yango vandaka tsyeleka, ya vanda tadila mvita mosi ya nene. Mpe yandi bakulaka nsangu yango mpe ba zabisaka yandi yinki zola zonza mambu yina yandi talaka.

2 Na bilumbu yina, munu Daniele, mu vandaka na mawa mingi na kati ya balumingu tatu. 3 Mu kudyaka ve madya ya malonga, mpe musuni to vinu kotaka ve na yinwa ya munu, mpe mu pakulaka ve mafuta na nzutu ya munu na kati ya balumingu tatu. 4 Na kilumbu ya 24 ya ngonda ya ntete, ntangu mu vandaka pene-pene ya nzadi ya nene, ya zola zonza Tigre,* 5 mu nangunaka meso mpe mu talaka bakala mosi ya kulwata bilele ya lino, mpe yandi vandaka ya kulwata singa ya luketo ya wolo ya Ufaze. 6 Nzutu ya yandi vandaka mutindu krizolite,* kizizi ya yandi vanda ngenga mutindu nsemo ya kidumu, bameso ya yandi vandaka mutindu bayinti ya tiya, maboko mpe makulu ya yandi vandaka mutindu kwivre yina ba me lutisa na tiya, mpe makelele ya ndinga ya yandi vandaka mutindu makelele ya bantu mingi. 7 Kaka ni munu Daniele, muntu talaka kimona-meso, babakala yina vandaka na munu talaka ve yawu. Kasi, boma ya ngolo kangaka bawu, ba kimaka mpe ba bumbanaka.

8 Mu bikanaka munu mosi, mpe ntangu mu talaka kimona-meso ya nene yayi, ngolo manisaka munu, mu kumaka mutindu muntu yina ke dyaka ve na menga na maza na nzutu, mpe ngolo manisaka munu. 9 Na manima, mu kuwaka makelele ya ndinga ya yandi, kasi ntangu mu kuwaka yandi vanda zonza, mu lalaka pongi ya ngolo kizizi na ntoto. 10 Na yawu, diboko mosi simbaka munu, mpe ya ningisaka munu samu mu vumbuka, mpe mu fukamaka maboko na ntoto. 11 Na manima, yandi zonzaka na munu:

“O Daniele, muntu ya mfunu mingi, teka dikebi na bamambu yayi mu mase zonza na nge. Ntangu yayi telama, samu ba me filisa munu na sika ya nge.”

Ntangu yandi zonzaka na munu bamambu yayi, mu telamaka na kutekita.

12 Na manima, yandi zonzaka na munu: “Kuvanda ve na boma, O Daniele. Ba kuwaka bamambu yina nge zonzaka kubanda kilumbu ya ntete yina nge pesaka ntima ya nge na kubakula bamambu yayi, mpe nge kulukaka na mantwala ya Nzambi ya nge, mpe mu me kwiza samu na bamambu yina nge zonzaka. 13 Kasi prinse ya Perse teleminaka munu na kati ya bilumbu 21. Kasi Mikayele,* mosi ya baprinse ya nene, kwizaka sadisa munu; mpe mu bikanaka kuna pene-pene ya bamfumu ya Perse. 14 Mu me kwiza sadisa nge na kubakula mambu yina ke kumina dikanda ya nge na kitini ya nsuka ya bilumbu, samu kimona-meso yayi ke lungana na bilumbu ke kwiza.”

15 Ntangu yandi zonzaka na munu bamambu yayi, mu tulaka kizizi na ntoto mpe mu vandaka ve na mambu ya kuzonza. 16 Na manima, muntu yina vandaka mutindu bakala simbaka bikoba ya munu, mpe mu fungulaka yinwa ya munu mpe mu zonzaka na muntu yina vandaka ya kutelama na mantwala ya munu: “Mfumu ya munu, Mu ke na tekitaka mingi samu na kimona-meso yina, mpe mu ke dyaka ve na ngolo. 17 Na yawu mfumu ya munu, wa’ faso munu, kisadi ya nge, lenda solola na nge mfumu ya munu? Samu ntangu yayi mu ke dyaka ve na ngolo mpe ya ke dyaka ve na pema na kati ya munu.”

18 Muntu yina vanda talana mutindu bakala simbaka dyaka munu mpe yandi kindisaka munu. 19 Na manima yandi zonzaka na munu: “Kuvanda ve na boma, O bakala ya mfunu mingi. Bika ti nge vanda na kizunu. Vanda ngolo, ee, vanda ngolo.” Ntangu yandi sololaka na munu, mu kuzwaka bukindi mpe mu zonzaka: “Bika ti mfumu ya munu kuzonza, samu nge me kindisa munu.”

20 Na manima yandi zonzaka na munu: “Nge zaba kwandi samu na yinki mu me kwiza na sika ya nge? Ntangu yayi, mu ke vutuka samu na kunwana na prinse ya Perse. Ntangu mu ke kwenda, prinse ya Grese ke kwiza. 21 Kasi, mu ke zonzila nge bamambu yina ke ya kusonama na kati ya masonoko ya tsyeleka. Ya ke ve na muntu yina ke na sadisaka munu na mutindu ya kulutila katula kaka Mikayele, prinse ya nge.