Beto ke sosaka bafaso ya kulakisa bawu ntima ya mbote mpe buzitu. (Rom. 12:10) Wa’ faso? Mosi ya bafaso ke ni mutindu Nkunga 15:4 ke lakisaka yawu, muntu yina Yehova me bokila na tenta ya yandi “ke lungisaka nsilulu ya yandi, ata kana ya kele yimbi samu na yandi.” Ya ke lwalisaka bampangi ntangu beto ke zitisaka ve bansilulu ya beto. (Mat. 5:37) Na kifwani, Yehova ke vingilaka ti kento na bakala yina ke ya kukwela zitisa nsilulu yina ba salaka. Yandi ke sepelaka mpe ntangu bibuti ke salaka bangolo samu na kuzitisa nsilulu yina ba salaka na bana ya bawu. Luzolo ya beto na Nzambi mpe na bampangi ke nataka beto na kuzitisa bansilulu yina beto ke salaka bawu. Kuyamba bandiku ya Nzambi mpe kukabula bawu, ke faso ya nkaka ya kulakisa ti beto ke zitisaka bawu. (Rom. 12:13) Kulutisa ntangu na bawu ke sala ti kindiku ya beto na bawu mpe na Yehova kula. Beto me lunga ve kusala yawu kaka na balukutakanu to na kisalu ya beto ya kusamuna. Ntangu beto ke yambaka bampangi, beto ke landaka kifwani ya Yehova. w24.06 12 § 15-16

Yehova ke lakisaka matsyeleka na ba yina ke ya kukuluka. (Mat. 11:25) Beto lakisaka kukuluka ntangu beto ndimaka kulongoka matsyeleka ya Biblia. (Bis. 8:30, 31) Kasi, beto me fwana kusala keba na kukuma ve na lulendo. Kuvanda na lulendo lenda nata beto na kukanisa ti ndwenga ya Biblia mpe ya dibuundu ya Yehova me lutila ve mayela ya beto. Samu na kuvanda kaka ya kukuluka, beto me fwana kuzimbana ve ti beto ke fioti na mantwala ya Yehova. (Nku. 8:3, 4) Beto lenda sambila Yehova samu yandi sadisa beto na kuvanda ya kukuluka, na kundima yandi longa beto na nzila ya Biblia mpe ya dibuundu ya yandi, mpe na kutala ti ndwenga ya Biblia mpe ya dibuundu ya Yehova me lutila mayela ya beto. Na ntangu yina nge ke na tangaka Biblia, sosa bima yina ke lakisaka ti Yehova ke zolaka kukuluka mpe ke yiinaka lunangu. Sala bangolo ya kulutila na kuvanda kaka ya kukuluka kana nge me kuzwa mikumba yina ke sala ti nge talana na meso ya bantu. w24.07 10 § 8-9

Kubanda 1919 tii bubu yayi, Yesu ke na sadilaka mwa kikunku ya bantu yina ba tulaka mafuta samu na kutwadisa kisalu ya beto ya kusamuna mpe na kupesa beto madya ya kimpeve. (Luke 12:42) Ya ke na talanaka pwelele ti Yehova ke na sakumunaka kisalu ya bawu. (Iza. 65:13, 14) Kana dikanda ya Yehova vandaka ve na bantu yina ke twadisaka yawu, beto zola lenda ve kusala kisalu yina Yesu pesaka beto. (Mat. 28:19, 20) Na kifwani, kana ba vanda pesa ve beto kisika ya kusamuna, muntu ni muntu zola samuna na kisika yina yandi mosi me zola. Ya zola sala ti beto samuna mingi na bisika mosi, kasi beto zimbana bisika ya nkaka. Ntangu ya nkaka, nge lenda kanisa na bambote yina beto ke kuzwaka samu ba ke na twadisaka beto. Kaka mutindu Yesu vanda twadisa bilandi ya yandi na ntangu yandi vandaka awa a ntoto, yandi ke na bikaka ve na kutwadisa beto bubu yayi. w24.04 8-9 § 2-4