Yoele
3 “Na yawu, beno tala! Na bilumbu yina mpe na ntangu yina,
Ntangu mu ke vutula bantu ya Yuda mpe ya Yeruzalemi yina ba nataka na ngolo,
2 Mu ke vukisa makanda nyonso
Mpe mu ke kulumusa bawu na Dibenga ya Yehozafati.*
Mu ke sambisa bawu kuna
Samu na mambu yina ba me sala dikanda ya munu mpe dikabu ya munu Izraele,
Samu ba me mwangisa bawu na kati ya makanda,
Mpe ba me kabula bwala ya munu na kati ya bawu.
3 Ba vanda tatamana kubula dzeke samu na kukabula dikanda ya munu;
Ba vanda teka mwana ya bakala samu na kuzwa kento ya kindumba
Mpe ba vanda teka mwana ya kento samu na kuzwa vinu ya kunwa.
4 Dyaka, O Tire mpe Sidoni na bizunga nyonso ya Filisti,
Wapi mambu beno ke na yawu na munu?
Beno ke na vutulaka munu yimbi samu ya ke na mambu mu salaka beno?
Kana beno ke na vutulaka munu yimbi,
Na mbangu nyonso, mu ke nata yawu na zulu ya bayintu ya beno.
5 Beno me baka arza mpe wolo ya munu,
Mpe beno me nata bimvwama ya munu ya kulutila kitoko na batempelo ya beno;
6 Beno me teka bantu ya Yuda mpe ya Yeruzalemi na sika ya Bagreke,
Samu na kunata bawu ntama na ntoto ya bawu;
7 Awa mu ke na vumbulaka bawu samu na kukatula bawu kisika yina beno tekaka bawu,
Mpe mu ke nata na zulu ya bayintu ya beno mambu yina beno salaka.
8 Mu ke teka bana ya beno ya babakala mpe bana ya beno ya bakento na maboko ya bantu ya Yuda,
Mpe bantu ya Yuda ke teka bawu na sika ya babakala ya Sheba, na bwala mosi ya ntama;
Samu Yehova yandi mosi me zonza yawu.
9 Beno mwangisa nsangu yayi na kati ya makanda:
‘Beno bongama samu na* mvita! Beno vumbula babakala ya ngolo!
Bika ti basoda kupusana, bika ti ba banda kukwenda!
10 Beno kumisa bima ya beno ya kubalula ntoto na bilanga, bambele ya mvita, mpe bisalulu ya beno ya kuzenga bima na bilanga, makonga.
Bika ti muntu ya kulemba kuzonza: “Mu ke na ngolo.”
11 Beno kwiza mpe beno sadisa, beno nyonso makanda yina ke zinga-zinga, beno vukana kintwadi!’”
Na kisika yina, O Yehova, kulumusa bantu ya nge ya ngolo.*
12 “Bika ti makanda kuvumbuka mpe kukwenda na Dibenga ya Yehozafati;
Samu kuna mu ke vanda samu na kusambisa makanda nyonso yina ke zinga-zinga.
13 Beno lutisa mbele ya kuzenga bima samu bambuma me yela.
Beno kulumuka mpe beno dyata barezin, samu kima ya kukamuna me fuluka.
Bidunda me fuluka na faso ya kulutila samu mambu ya beno ya yimbi me lutila.
14 Bimvuka ya bantu, bimvuka ya bantu ke na dibenga ya mukanu,
Samu kilumbu ya Yehova me kuma pene-pene na dibenga ya mukanu.
15 Ntangu na ngonda ke kuma mpimpa,
Mpe bambwetete ke ngenga dyaka ve.
16 Mpe Yehova ke ganga na ngolo katuka na Siyoni,
Katuka na Yeruzalemi yandi ke nanguna ndinga ya yandi.
Mpe mazulu na ntoto ke ningana;
Kasi Yehova ke vanda kiswamunu samu na dikanda ya yandi,
Yinzo mosi ya ngolo samu na bantu ya Izraele.
17 Mpe beno ke zaba ya tsyeleka ti mu ke Yehova Nzambi ya beno, yina ke zingaka na Siyoni, mongo ya munu ya santu.
Yeruzalemi ke kuma kisika ya santu,
Mpe banzenza ke luta dyaka ve kuna.
18 Na kilumbu yina, bamongo ke tangisa vinu ya kitoko,
Bamongo ya fioti ke fuluka na miliki,
Mpe bamwila ya Yuda ke fuluka nyonso na maza.
Katuka na yinzo ya Yehova mukelo mosi ke basika,
Mpe ya ke polisa Dibenga* ya bayinti ya akasia.
19 Kasi Ezipte ke kuma kisika yina ke na ata kima,
Mpe Edome ke kuma ntoto ya kuyuma yina ke na ata kima,
Samu na bamambu ya ngolo yina ba salaka na bantu ya Yuda,
Na bwala ya bawu ba mwangisaka menga ya bantu yina salaka ata kima.
20 Kasi bantu ke zinga na Yuda samu na ntangu nyonso,
Mpe na Yeruzalemi na kati ya bambandu.
21 Menga ya bawu yina na meso ya munu vandaka na mambu, mu ke tadila yawu mutindu menga yina me sala ata kima;
Mpe Yehova ke zinga na Siyoni.”