Levitike

19 Yehova zonzaka dyaka na Moyize: 2 “Zonza na kimvuka nyonso ya bantu ya Izraele mpe zabisa bawu mambu yayi, ‘Beno me fwana kuvanda santu, samu munu Yehova Nzambi ya beno, mu ke santu.

3 “‘Konso muntu na kati ya beno me fwana kuzitisa* mama ya yandi mpe tata ya yandi, mpe beno me fwana kuzitisa basaba ya munu. Mu kele Yehova Nzambi ya beno. 4 Beno sambila ve banzambi ya mpamba-mpamba, mpe beno kuyidika ve banzambi ya bisengo yina ba me sulumukisa. Mu kele Yehova Nzambi ya beno.

5 “‘Ntangu beno ke pesa na Yehova munkayulu ya kizunu, beno fwana kupesa yawu na mutindu yina ke sala ti yandi ndima beno. 6 Beno ke kudya yawu na kilumbu yina beno ke sala munkayulu mpe na kilumbu yina ke landa. Kasi yina ke bikana tii na kilumbu ya tatu, beno fwana kunyengisa yawu na tiya. 7 Kana ba kudya yawu na kilumbu ya tatu, ya ke kima ya yimbi yina ba ke ndima ve. 8 Muntu yina ke kudya yawu, disumu ya yandi ke vanda na zulu ya yintu ya yandi samu yandi me vweza kima mosi ya santu ya Yehova, mpe ba me fwana kufwa muntu yango.*

9 “‘Ntangu beno ke yonzika bambuma na bwala ya beno, nge me fwana ve kubuka bambuma nyonso yina kele kisika yina bilanga ya nge me suka, mpe nge me fwana ve kulokota bambuma yina ke bikana ntangu nge ke buka bambuma ya nge. 10 Dyaka, nge me fwana ve kubuka bambuma yina me bikana na bilanga ya nge ya vinu, to kulokota bambuma yina me mwangana na bilanga ya nge ya vinu. Nge ke bika yawu samu na bapovre* mpe banzenza yina ke zingaka na bwala ya beno. Mu kele Yehova Nzambi ya beno.

11 “‘Beno me fwana ve kulaba, beno me fwana ve kuvuna, mpe beno me fwana ve kuvunasana. 12 Beno me fwana ve kuzenga ndefi ya luvunu na nkumbu ya munu. Na kusalaka mutindu yina, nge ke vweza nkumbu ya Nzambi ya nge. Mu kele Yehova. 13 Nge me fwana ve kusadila mayuya samu na kubaka bima ya mpangi ya nge, mpe nge me fwana ve kulaba. Nge me fwana ve kubumba difuta ya kisadi ya nge mpimpa nyonso tii na suka.

14 “‘Nge me fwana ve kuloka* muntu ya makutu ya kufwa, mpe nge me fwana ve kutula dibaku na mantwala ya muntu ya meso ya kufwa, mpe nge fwana kuvanda na boma ya Nzambi ya nge. Mu kele Yehova.

15 “‘Beno me fwana ve kukondwa lunungu ntangu beno ke sambisaka. Nge me fwana ve kusoola bizizi samu na kunungisa muntu ya povre, to kuzola kaka muntu ya mvwama. Nge me fwana kusambisa mpangi ya nge na lunungu.

16 “‘Nge me fwana ve kutambula na kati ya bantu ya dikanda ya nge samu na kukwendaka vuninaka bantu bamambu. Nge me fwana ve kusosa kumwangisa menga ya mpangi ya nge.* Mu kele Yehova.

17 “‘Nge me fwana ve kuyiina mpangi ya nge na kati ya ntima ya nge. Kukima ve na kusemba yandi samu nge vanda ve na disumu mutindu yandi.

18 “‘Nge me fwana ve kuvutula yimbi to kukangila bantu ya nge nkele, mpe nge me fwana kuzola mpangi ya nge mutindu nge mosi. Mu kele Yehova.

19 “‘Beno me fwana kuzitisa misiku* ya munu: Nge me fwana kusala ve ti bibulu ya nge* ya mutindu zole kuvukisa nzutu. Nge me fwana ve kukunda bambutu ya mutindu zole na bilanga ya nge, mpe nge me fwana ve kulwata kikunti yina ba me yidika na basinga ya mutindu zole ya kuswaswana.

20 “‘Kana bakala me lala na kento mpe me vukisa nzutu na yandi, mpe kana kento yango ke kisadi yina ke na nsilulu ya makwela na sika ya bakala ya nkaka, kasi ata muntu me futa samu na kukuula* yandi, to ba me pesa ve yandi kimpwanza, ba fwana kupesa bakala mpe kento yayi kitumbu. Kasi ba ke kufwa ve bawu samu nabunu ba pesa kento yayi kimpwanza. 21 Bakala yango fwana kunatina Yehova dikabu ya yandi samu na foti na kisika ya kukotila ya tenta ya lukutakanu: dimeme ya bakala ya dikabu samu na foti. 22 Nganga-nzambi ke sadila dimeme ya bakala ya dikabu samu na foti na mantwala ya Yehova, samu na kufuka disumu yina bakala yango me sala, mpe ba ke lemvokila yandi disumu yina yandi me sala.

23 “‘Ntangu beno ke kota na bwala yango, mpe beno ke kunda yinti samu na kudya bambuma ya yawu, beno ke bakila bambuma yango mutindu kima ya mvindu mpe yina ba me nimina.* Ya ke vanda kima yina ba me nimina beno* bamvula tatu. Beno me fwana ve kudya yawu. 24 Kasi na mvula ya yiya, bambuma ya yawu nyonso ke vanda santu samu beno yangalala na mantwala ya Yehova. 25 Mpe na mvula ya tanu, beno lenda kudya bambuma ya yawu, mpe ya ke bwelama na bima yina beno ke yonzika na bilanga. Mu kele Yehova Nzambi ya beno.

26 “‘Beno me fwana kudya ata kima yina ke na menga.

“‘Beno me fwana ve kusosa bidimbu ya bamambu yina ke kwiza na mantwala to kusala bunganga.

27 “‘Beno me fwana ve kusala mabashi na bayintu* ya beno, to kubebisa bansongi ya mandefo ya beno.

28 “‘Beno me fwana ve kulwalisa banzutu ya beno samu na muntu* ya kufwa, mpe beno me fwana ve kuzenga bansamba* na banzutu ya beno. Mu kele Yehova.

29 “‘Kusafula ve mwana ya nge ya kento na kukumisaka yandi kento ya kindumba, samu bwala beba ve na kindumba, mpe ya fuluka ve na mavanga ya nsoni.

30 “‘Beno me fwana kuzitisa basaba ya munu, mpe beno me fwana kulakisa buzitu* samu na kisika ya munu ya santu. Mu kele Yehova.

31 “‘Beno kwenda tala ve bantu yina ke zonzaka ti ba ke sololaka na bantu ya kufwa, mpe beno kwenda tala ve bantu yina ke bikulaka bamambu yina ke kwiza na mantwala samu ba kumisa ve beno mvindu.* Mu kele Yehova.

32 “‘Nge me fwana kutelama na buzitu na mantwala ya muntu yina ke na bansuki ya mpembe, mpe nge me fwana kupesa biboba lukumu, mpe nge me fwana kuvanda na boma ya Nzambi ya nge. Mu kele Yehova.

33 “‘Kana nzenza ke na zingaka na bwala ya beno, beno me fwana ve kunyokola yandi. 34 Beno me fwana kubakila nzenza yina ke na zingaka na beno mutindu muntu ya bwala ya beno; mpe nge fwana kuzola yandi mutindu nge mosi, samu beno mpe vandaka banzenza na bwala ya Ezipte. Mu kele Yehova Nzambi ya beno.

35 “‘Beno me fwana ve kusadila luvunu ntangu beno ke tezaka* yinda, kilo to nene ya bima. 36 Beno me fwana kusadila bitezolo* ya kusungama, bakilo ya kusungama, bitezolo ya kusungama ya bima ya kuyuma* mpe bitezolo ya kusungama ya bima ya maza.* Mu kele Yehova Nzambi ya beno yina basisaka beno na bwala ya Ezipte. 37 Na yawu, beno me fwana kutumama na misiku ya munu nyonso mpe na banzengolo ya munu nyonso, mpe beno me fwana kulanda yawu. Mu kele Yehova.’”