Kana nge bongama mbote-mbote tekila nge kwenda samuna, ya ke sadisa nge na kuvanda ve na boma ya kusolola na bantu. Tekila Yesu filisa bilandi na kukwenda samuna, yandi sadisaka bawu na kubongama mbote-mbote. (Luke 10:1-11) Na manima ya kusadila mambu yina Yesu longaka bawu, bilandi kuzwaka kilengi mingi na kisalu ya kusamuna. Wa’ faso beto lenda bongama tekila beto kwenda samuna? Tekila beto kwenda samuna beto me bonga kukanisa na mambu yina beto ke zonza, mpe na faso ya kuzonzila yawu samu ya vanda pete na bantu na kubakula yawu. Beto lenda kanisa na mantwala na mwa bamambu yina bantu ke zonzaka na Bambangi ya Yehova kisika beto kele mpe kusosa mvutu yina beto lenda pesa. Ntangu beto ke na sololaka na bantu beto sala mutindu beto me zabana. Beto lenda seka mpe kubakila bawu mutindu bandiku. w24.04 16 § 6-7

Mambu ya kulutila mfunu yina ke nataka beto na kusamuna ke ti beto ke zolaka Yehova Nzambi mpe nkumbu ya yandi ya santu. Kisalu ya kusamuna ke pesaka beto nzila ya kukembila Nzambi yina beto ke zolaka. Na ntima mosi beto ke ndimaka mambu yayi: “Yehova Nzambi ya beto, nge me fwana kuzwa nkembo, lukumu, mpe ngolo, samu nge muntu yidikaka bima nyonso, mpe ya kwizaka na luzingu mpe ya salamaka samu na luzolo ya nge.” Beto ke pesaka Yehova nkembo na lukumu ntangu beto ke lakisaka na bantu ti ni yandi “muntu yidikaka bima nyonso.” Beto ke pesaka yandi ngolo ya beto, ntangu beto ke sadilaka ntangu, ngolo, mpe bima nyonso yina beto ke na yawu samu na kusamuna. (Mat. 6:33; Luke 13:24; Kol. 3:23) Beto ke zolaka kuzonzila na bantu, Nzambi yina beto ke zolaka mingi. Beto ke zolaka mpe kuzonzila na bantu nkumbu ya yandi mpe mutindu ya Nzambi yandi kele. w24.05 17 § 11

Bubu yayi, Yehova ke na sadisaka beto na kusepela na yina beto ke na yawu, na kuvanda na kizunu mpe na mantwala, yandi ke pesa beto luzingu ya ntangu nyonso. Beto lenda tudila yandi ntima na kundima ti yandi ke na nsatu mpe ngolo ya kupesa beto difuta. Kiminu na bamambu yayi ke sadisaka beto na kubika ve na kusadila yandi kaka faso bisadi ya yandi ya kukwikama ya ntama salaka yawu. Ni yina Timote salaka na siècle ya ntete. (Ebr. 6:10-12)Timote vandaka na kiminu ya ngolo ti Yehova zola pesa yandi difuta. (1 Tim. 4:10) Ni na yawu yandi salaka bangolo mingi samu na kusadila Yehova na bampangi. Na wapi mutindu? Ntumwa Polo kindisaka yandi na kubongisa faso ya yandi ya kulonga, ya vanda na kisalu ya kusamuna to na kati ya kimvuka. Yandi zola vanda mpe kifwani ya mbote samu na bantwenya mpe bantu ya kukula. Dyaka, Polo pesaka yandi kisalu ya ngolo ya kusala, mutindu kupesa malongi ya ngolo na luzolo nyonso na bampangi yina vandaka na nsatu yawu. (1 Tim. 4:11-16; 2 Tim. 4:1-5) Timote vandaka na kundima ti Yehova ke pesa yandi difuta.—Rom. 2:6, 7. w24.06 22-23 § 10-11