Levitike

27 Yehova landilaka kuzonza na Moyize: 2 “Zonza na bantu ya Izraele mpe zabisa bawu mambu yayi, ‘Kana muntu me sala nsilulu ya mfunu ya kupesa na Yehova ntalu ya muntu,* 3 samu na bakala ya bamvula 20 tii 60, ntalu yina ba ke zenga ke vanda bashekele* 50 ya arza, na kulandaka shekele ya kisika ya santu.* 4 Kasi kana ya ke kento, ntalu yina ba ke zenga ke vanda bashekele 30. 5 Kana muntu yango ke na bamvula 5 tii 20, ntalu yina ba ke zenga ke vanda bashekele 20 samu na mwana ya bakala, mpe bashekele 10 samu na mwana ya kento. 6 Samu na muntu yina ke na bamvula kubanda na ngonda mosi tii na bamvula tanu, ntalu yina ba ke zenga ke vanda bashekele tanu ya arza samu na mwana ya bakala, mpe bashekele tatu ya arza samu na mwana ya kento.

7 “‘Kana muntu yango ke na bamvula kubanda 60 tii na zulu, ntalu yina ba ke zenga ke vanda bashekele 15 samu na bakala, mpe bashekele 10 samu na kento. 8 Kana muntu yina me sala nsilulu ke povre mingi mpe yandi lenda futa ve ntalu yina ba me zenga, muntu yango ke telama na mantwala ya nganga-nzambi mpe nganga-nzambi ke zenga ntalu ya yandi. Nganga-nzambi ke zenga ntalu na kutadilaka lubaku ya muntu yina me sala nsilulu.

9 “‘Kana nsilulu yango me tadila kibulu yina ba lenda pesa mutindu dikabu na Yehova, kima ni kima yina ba lenda pesa na Yehova ke kuma kima ya santu. 10 Yandi lenda soba ve yawu to kupesa yina ke mbote na kisika ya yina ke yimbi, to yina ke yimbi na kisika ya yina ke mbote. Kasi kana yandi pesa kibulu mosi na kisika ya kibulu ya nkaka, kibulu ya ntete mpe kibulu yina yandi ke pesa na kisika ya yawu, nyonso zole ke kuma santu. 11 Kana ya ke kibulu yina ke ve ya kuvedila, yina ba lenda pesa ve mutindu dikabu na Yehova, yandi ke tula yawu na mantwala ya nganga-nzambi. 12 Nganga-nzambi ke zenga ntalu ya yawu na kutalaka kana ya ke mbote to yimbi. Ntalu yina nganga-nzambi ke zenga ke vanda kaka ni yina. 13 Kasi kana muntu yango zola kusumba dyaka yawu, yandi fwana kubwela ndambu mosi na kati ya bandambu tanu na zulu ya ntalu yina ba me zenga.

14 “‘Kana muntu me kumisa yinzo ya yandi santu mutindu kima ya santu samu na Yehova, nganga-nzambi ke zenga ntalu ya yawu na kutalaka kana ya ke mbote to yimbi. Ntalu ya yawu ke vanda ntalu yina nganga-nzambi me zenga. 15 Kasi kana muntu yina me kumisa yinzo yango santu zola kusumba dyaka yawu, yandi fwana kubwela ndambu mosi na kati ya bandambu tanu ya mbongo na zulu ya ntalu yina ba me zenga, mpe ya ke kuma ya yandi.

16 “‘Kana muntu me kumisa ndambu ya bilanga ya yandi santu samu na Yehova, ba ke zenga ntalu ya yawu na kutadilaka bambuma yina ba lenda kunda kuna: omere* mosi ya bambuma ya orze ke vanda na ntalu ya bashekele 50 ya arza. 17 Kana yandi me kumisa bilanga ya yandi santu kubanda na Mvula ya Kimpwanza, ntalu yina ba me zenga ke vanda kaka ni yina. 18 Kana yandi me kumisa bilanga ya yandi santu na manima ya Mvula ya Kimpwanza, nganga-nzambi ke zenga ntalu ya yawu na kutadilaka lutangu ya bamvula yina me bikana tii na Mvula ya Kimpwanza yina ke landa, mpe ba ke kulula* ntalu yina ba zengaka. 19 Kasi kana muntu yina kumisaka bilanga ya yandi santu me zola dyaka kusumba yawu, yandi fwana kubwela ndambu mosi na kati ya bandambu tanu ya mbongo na zulu ya ntalu yina ba me zenga, mpe ya ke bikana ya yandi. 20 Kana yandi sumba dyaka ve bilanga mpe ba me tekisa bilanga yango na muntu ya nkaka, ba lenda sumba dyaka ve yawu. 21 Ntangu ba ke vutula bilanga yango na Mvula ya Kimpwanza, ya ke kuma kima ya santu samu na Yehova. Ya ke vanda mutindu bilanga yina ba me pesa yandi. Ya ke kuma kima ya banganga-nzambi.

22 “‘Kana muntu me kumisa bilanga yina yandi me sumba santu samu na Yehova, bilanga yina ke ve na kati ya bantoto yina yandi byadilaka na sika ya batata ya yandi, 23 nganga-nzambi ke zenga ntalu ya yawu na kutadilaka lutangu ya bamvula yina me bikana tii na Mvula ya Kimpwanza, mpe muntu yango ke pesa ntalu yina ba me zenga kilumbu yina. Ya ke kima ya santu samu na Yehova. 24 Na Mvula ya Kimpwanza, bilanga ke vutuka ya muntu yina tekisaka yawu, muntu ya kuzwa ntoto yina.

25 “‘Ba ke zenga bantalu nyonso na kulandaka shekele ya kisika ya santu. Shekele mosi ke vanda bagera 20.*

26 “‘Kasi ata muntu me fwana kukumisa mwana ya ntete ya kibulu santu, samu ti ya me butuka mutindu mwana ya ntete samu na Yehova. Ya vanda ngombe to dimeme, ya kele ya Yehova. 27 Kana ya ke mosi ya bibulu yina ke ve ya kuvedila, mpe yandi sumba dyaka yawu na ntalu yina ba zengaka, yandi ke bwela ndambu mosi na kati ya bandambu tanu na zulu ya ntalu yina. Kasi, kana ba me sumba ve dyaka yawu, ba ke tekisa yawu na kulandilaka ntalu yina ba me zenga.

28 “‘Kima ni kima yina muntu me baka na kati ya bima ya yandi mpe me pesa yawu ya mankululu na Yehova, ya vanda muntu, kibulu to bilanga yina ke ya yandi, ba lenda tekisa ve yawu, mpe ba lenda sumba ve dyaka yawu. Kima nyonso yina ba pesaka ya mankululu ke kima mosi ya santu samu na Yehova. 29 Dyaka ba lenda kuula* ve muntu nyonso yina ba me zengila* lufwa mpe yina ba me tula na lweka samu na kufwa yandi. Ba ke kufwa yandi.

30 “‘Konso ndambu mosi na kati ya bandambu 10* ya bima yina ntoto ke butaka kele ya Yehova, ya vanda yina me katuka na bambuma ya bilanga to na bambuma ya bayinti. Ya ke kima ya santu samu na Yehova. 31 Kana muntu zola kusumba dyaka ndambu mosi na kati ya bandambu ya yandi 10, yandi ke bwela ndambu mosi na kati ya bandambu tanu na zulu ya yawu. 32 Na yina me tadila konso ndambu mosi na kati ya bandambu 10 ya bangombe mpe mameme, nyonso yina ke lutaka na yisi ya yinti ya muvungi, kibulu* ya 10 ke kuma kima ya santu samu na Yehova. 33 Yandi ke tala ve kana ya ke mbote to yimbi, mpe yandi ke pesa ve kibulu ya nkaka na kisika ya yawu. Kasi kana yandi sosa kupesa kibulu ya nkaka na kisika ya yawu, kibulu ya ntete mpe kibulu yina yandi ke pesa na kisika ya yawu, nyonso zole ke kuma kima ya santu. Ba lenda sumba ve dyaka yawu.’”

34 Ni yina ke misiku yina Yehova pesaka na Moyize samu na bantu ya Izraele na Mongo Sinayi.