Levitike

18 Yehova landilaka kuzonza na Moyize: 2 “Zonza na bantu ya Izraele mpe zabisa bawu mambu yayi, ‘Mu kele Yehova Nzambi ya beno. 3 Beno me fwana ve kudyatila mutindu ba ke dyatilaka na bwala ya Ezipte, kisika yina beno vanda zinga, mpe beno me fwana ve kudyatila mutindu ba ke dyatilaka na bwala ya Kanana, kisika yina mu ke na nataka beno. Mpe beno fwana kulanda ve bansalulu ya bawu.* 4 Beno fwana kusadila banzengolo ya munu, mpe beno fwana kuzitisa misiku* ya munu mpe kulanda yawu. Mu kele Yehova Nzambi ya beno. 5 Beno me fwana kuzitisa misiku ya munu mpe banzengolo ya munu. Muntu nyonso yina ke sala mutindu yayi ke zinga na nzila ya yawu. Mu kele Yehova.

6 “‘Muntu mosi ve na kati ya beno fwana kuvukisa nzutu na* muntu ya dikanda ya yandi. Mu kele Yehova. 7 Nge me fwana ve kuvukisa nzutu na tata ya nge, mpe nge me fwana ve kuvukisa nzutu na mama ya nge. Yandi ke mama ya nge, mpe nge me fwana ve kuvukisa nzutu na yandi.

8 “‘Nge me fwana ve kuvukisa nzutu na kento ya tata ya nge. Ya kele kufwisa tata ya nge nsoni.*

9 “‘Nge me fwana ve kuvukisa nzutu na kibusi ya nge, ya vanda mwana ya tata ya nge to mwana ya mama ya nge, ya vanda ti yandi butukaka yinzo mosi na nge, to ba butaka yandi na ngaanda.

10 “‘Nge me fwana ve kuvukisa nzutu na mutekolo ya nge ya kento, ya vanda mwana ya mwana ya nge ya bakala to mwana ya mwana ya nge ya kento, samu ya kele kufwisa nzutu ya nge mosi nsoni.*

11 “‘Nge me fwana ve kuvukisa nzutu na mwana ya kento ya mama ya nge ya mbanda, mwana yina tata ya nge me buta, samu yandi ke kibusi ya nge.

12 “‘Nge me fwana ve kuvukisa nzutu na kibusi ya tata ya nge. Yandi ke menga mosi na tata ya nge.

13 “‘Nge me fwana ve kuvukisa nzutu na mama ya nge ya leki, to ya kuluntu, samu yandi ke menga mosi na mama ya nge.

14 “‘Nge me fwana ve kufwisa tata ya nge ya leki to ya kuluntu nsoni,* na kuvukisaka nzutu na kento ya yandi. Kento yango kele muntu ya dikanda ya nge.*

15 “‘Nge me fwana ve kuvukisa nzutu na kento ya mwana ya nge. Yandi ke kento ya mwana ya nge,* mpe nge me fwana ve kuvukisa nzutu na yandi.

16 “‘Nge me fwana ve kuvukisa nzutu na kento ya yaya to ya leki ya nge, samu ya kele kufwisa yaya to leki ya nge nsoni.*

17 “‘Nge me fwana ve kuvukisa nzutu na kento mpe na mwana ya yandi ya kento. Nge me fwana ve kuvukisa nzutu na mutekolo ya yandi ya kento, ya vanda mwana ya mwana ya yandi ya bakala to mwana ya mwana ya yandi ya kento. Ba ke dikanda mosi na yandi. Ya ke mambu ya nsoni mingi.*

18 “‘Nge me fwana ve kukwela yaya to leki ya kento ya nge mpe kuvukisa nzutu na yandi na ntangu kento ya nge ke ntete moyo, samu ba ke kuma bambanda.

19 “‘Nge me fwana ve kuvukisa nzutu* na kento na ntangu yina yandi ke ve ya kuvedila samu yandi ke na talaka menga.

20 “‘Nge me fwana ve kuvukisa nzutu na kento ya mpangi ya nge. Ya ke kumisa nge mvindu.*

21 “‘Nge me fwana ve kubika ba pesa mosi ya bana ya nge* na Moleke. Nge me fwana ve kuvweza nkumbu ya Nzambi ya nge na mutindu yina. Mu kele Yehova.

22 “‘Nge me fwana ve kuvukisa nzutu na mpangi bakala mutindu ba ke vukisaka nzutu na kento. Ya ke mambu ya nganzi.

23 “‘Bakala me fwana ve kuvukisa nzutu na kibulu samu ya kumisa ve yandi mvindu.* Kento mpe fwana kutelama ve na mantwala ya kibulu samu na kuvukisa nzutu na yawu. Ya kele kuvweza mutindu ba yidikaka bamambu.

24 “‘Beno kukikumisa ve mvindu* na bamambu yayi, samu ni na bamambu nyonso yayi makanda yina mu ke na bingisaka na mantwala ya beno me kukikumisa mvindu. 25 Ni na yawu yinsi ke mvindu* mpe mu ke nata kitumbu na zulu ya yawu samu na foti ya yawu, mpe yinsi ke luka bantu ya yawu. 26 Kasi beno, beno me fwana kuzitisa misiku ya munu mpe banzengolo ya munu, mpe beno me fwana kusala ata mosi ya bamambu ya nganzi yayi, ya vanda muntu ya dikanda ya Izraele, to nzenza yina ke zingaka na kati-kati ya beno. 27 Mpamba ve, bantu yina vanda zinga na yinsi yina tekila beno, vanda sala bamambu nyonso ya nganzi yayi, mpe awa yinsi me kuma mvindu.* 28 Na yawu, samu beno ke kumisa ve yinsi mvindu,* ya ke luka ve beno mutindu ya ke luka makanda yina vandaka kuna tekila beno. 29 Bantu* nyonso yina ke sala mosi ya bamambu ya nganzi yayi, ba me fwana kufwa bawu.* 30 Beno me fwana kulungisa mambu yina mu me tumisa beno: Beno landa ve ata nsalulu mosi ya nganzi yina vanda salama tekila beno, samu ya sala ve ti beno kukikumisa mvindu.* Mu kele Yehova Nzambi ya beno.’”