Levitike

20 Yehova landilaka kuzonza na Moyize: 2 “Nge ke zonza na bantu ya Izraele, ‘Muntu nyonso ya dikanda ya Izraele to nzenza yina ke zingaka na kati ya beno yina me pesa mosi ya bana ya yandi na Moleke, ba ke kufwa yandi. Bantu ya bwala ke kufwa yandi na matadi. 3 Munu mosi mu ke telemina muntu yina, mpe mu ke katula yandi na kati ya dikanda ya yandi,* samu yandi me pesa mosi ya bana ya yandi na Moleke, yandi me kumisa mvindu kisika ya munu ya santu mpe yandi me vweza nkumbu ya munu ya santu. 4 Kana bantu ya bwala kanga meso ya bawu na mambu yina muntu yina me sala na yina yandi me pesa mwana ya yandi na Moleke, mpe ba kufwa ve yandi, 5 ntembe ve munu mosi mu ke balukila muntu yayi na dikanda ya yandi. Mu ke kufwa muntu yango* kintwadi na ba yina nyonso me vukana na yandi samu na kusala kindumba na Moleke.

6 “‘Na yina me tadila muntu* yina me kwenda tala bantu yina ke zonzaka ti ba ke sololaka na bantu ya kufwa mpe ba yina ke bikulaka bamambu yina ke kwiza na mantwala, samu na kusala kindumba ya kimpeve na bawu, ntembe ve mu ke balukila muntu* yina, mpe mu ke katula yandi na kati ya dikanda ya yandi.*

7 “‘Beno me fwana kukikumisa santu mpe kukuma santu, samu ti mu kele Yehova Nzambi ya beno. 8 Mpe beno me fwana kuzitisa misiku* ya munu mpe kulanda yawu. Mu kele Yehova, muntu yina ke na kumisaka beno santu.

9 “‘Kana muntu loka* tata to mama ya yandi, ba ke kufwa yandi. Samu yandi me loka tata to mama ya yandi, menga ya yandi ke na zulu ya yintu ya yandi mosi.

10 “‘Yayi mambu yina me tadila bakala yina me sala kinsuza na kento ya bakala ya nkaka: Muntu yina me sala kinsuza na kento ya mpangi ya yandi, ba ke kufwa yandi, bakala yina me sala kinsuza, na kento yina me sala kinsuza. 11 Bakala yina me lala kento ya tata ya yandi me fwisa tata ya yandi nsoni.* Ba ke kufwa bawu nyonso zole. Menga ya bawu ke na zulu ya bayintu ya bawu mosi. 12 Kana bakala me lala kento ya mwana ya yandi, ba ke kufwa bawu nyonso zole. Ba me vweza mutindu ba yidikaka bamambu. Menga ya bawu ke na zulu ya bayintu ya bawu mosi.

13 “‘Kana bakala me lala mpangi bakala mutindu ba ke lalaka kento, bawu nyonso zole me sala mambu ya nganzi. Ba ke kufwa bawu. Menga ya bawu ke na zulu ya bayintu ya bawu mosi.

14 “‘Kana bakala me baka kento na mama ya kento yina, ya ke mambu ya nsoni mingi.* Ba ke yoka yandi na bakento yina na tiya, samu ndyatulu ya nsoni yayi salama dyaka ve na kati ya beno.

15 “‘Kana bakala me vukisa nzutu na kibulu, ba ke kufwa bakala yina, mpe beno ke kufwa kibulu yina. 16 Kana kento me vukisa nzutu* na kibulu, nge me fwana kufwa kento yina mpe kibulu yina. Ba ke kufwa bawu. Menga ya bawu ke na zulu ya bayintu ya bawu mosi.

17 “‘Kana bakala me vukisa nzutu na kibusi ya yandi, mwana ya tata ya yandi to mwana ya mama ya yandi, mpe yandi me tala kimpene ya yandi, mpe mwana ya kento me tala kimpene ya bakala yango, ya ke mambu ya nsoni. Ba me fwana kufwa bawu* na meso ya bana ya bantu ya bawu. Yandi me fwisa kibusi ya yandi nsoni.* Disumu ya yandi ke na zulu ya yintu ya yandi.

18 “‘Kana bakala me lala kento yina ke na talaka menga mpe me vukisa nzutu na yandi, bawu nyonso zole me tala kutanga ya menga ya kento yina. Ba me fwana kufwa bawu nyonso zole.*

19 “‘Nge me fwana ve kuvukisa nzutu na mama ya nge ya leki to ya kuluntu, to na kibusi ya tata ya nge, samu ya kele kufwisa nsoni na mpangi ya yandi ya menga mosi. Disumu ya bawu ke vanda na zulu ya bayintu ya bawu. 20 Bakala yina me lala kento ya tata ya yandi ya leki to ya kuluntu, me fwisa tata ya yandi ya leki to ya kuluntu nsoni.* Disumu ya bawu ke vanda na zulu ya bayintu ya bawu. Ba ke kufwa ata kubuta bana. 21 Kana bakala me baka kento ya yaya to ya leki ya yandi, ya ke mambu ya nganzi. Yandi me fwisa yaya to leki ya yandi nsoni.* Ba ke kufwa ata kubuta bana.

22 “‘Beno me fwana kuzitisa misiku ya munu nyonso mpe banzengolo ya munu nyonso, mpe kulanda yawu, samu ti bwala yina mu ke na nataka beno, samu beno zinga kuna, luka ve beno. 23 Beno me fwana ve kulanda bansalulu* ya makanda yina mu ke na bingisaka na mantwala ya beno, samu ba me sala bamambu nyonso yayi mpe mu ke yiinaka bawu. 24 Ni na yawu mu zonzaka na beno mutindu yayi: “Beno ke baka bwala ya bawu, mpe mu ke pesa beno yawu samu ya vanda ya beno. Ya ke ntoto yina ke ya kufuluka na miliki mpe mafuta ya nyosi. Mu kele Yehova Nzambi ya beno, yina kabulaka beno na makanda ya nkaka. 25 Beno me fwana kusala luswaswanu na kati ya kibulu ya kuvedila mpe yina ke ve ya kuvedila, mpe na kati ya ndeke yina ke ve ya kuvedila mpe yina ke ya kuvedila. Beno me fwana ve kukikumisa* nganzi na nzila ya kibulu, to ya ndeke, to ya kima yina ke tambulaka kivumu na ntoto, bima yina mu tulaka na lweka samu beno tala yawu mutindu bima yina ke ve ya kuvedila. 26 Beno me fwana kuvanda santu samu na munu, samu ti munu Yehova, mu ke santu, mpe mu ke na kabulaka beno na makanda ya nkaka samu beno kuma ya munu.

27 “‘Kento to bakala yina ke salaka kisalu ya kusolola na bantu ya kufwa, to yina ke bikulaka bamambu yina ke kwiza na mantwala,* ba ke kufwa bawu. Dikanda ke kufwa bawu na matadi. Menga ya bawu ke na zulu ya bayintu ya bawu mosi.’”