Levitiku

4 Yave ovovese Mose vo: 2 “Vovesa Aneyisaele vo: ‘Avo muntu ovolele sumu lembi wo kana+ muna vanga dimosi muna mambu kasima o Yave, edi difwete vangwa:

3 “‘Avo nganga wakuswa o mazi+ ovolele sumu+ yo twasa ngielele kwa nkangu, kafwete sunzula mwan’a ngombe a koko walunga kwa Yave se lukau lwa sumu mu kuma kia sumu kavolele.+ 4 Otwasa ngombe a koko vana mwelo a saba kia wananina,+ vana ndose a Yave. Otenseka koko kwandi vana ntu a ngombe a koko yo vondela yo vana ndose a Yave.+ 5 I bosi, o nganga wakuswa o mazi+ obonga e ndambu a menga ma ngombe a koko yo twasa mo muna saba kia wananina; 6 o nganga ovuba o nlembo andi muna menga,+ ozaza o menga nkumbu nsambwadi+ vana ndose a Yave, vana ntwal’a rido ya fulu kiavauka. 7 O nganga osia mpe ndambu a menga muna mpoka za ziku dia ndumbu a nsunga,+ dina vana ndose a Yave muna saba kia wananina; o menga mawonso ma ngombe a koko mesuva, oyitila mo vana sina dia ziku dia lukau lwa ngioka,+ edi dina vana mwelo a saba kia wananina.

8 “‘I bosi, okatula mazi mawonso ma ngombe a koko a lukau lwa sumu, kumosi ye mazi mefukanga e ndia ye mazi mena muna ndambu a ndia, 9 ye nguba zau zole yo mazi mena vana ntandu a nguba, vana ndambu a luketo. Okatula mpe mazi ma kimoyo* kumosi ye nguba.+ 10 Nze una uvangwanga muna ngombe a kimenga kia ungudi,+ i una ukatulwilwa e lekwa yayi. O nganga ofutumuna yo vana ziku dia lukau lwa ngioka.

11 “‘Vo i nkand’a ngombe a koko yo nsuni andi wawonso kumosi yo ntu andi, malu mandi, ndia miandi ye mvindu andi a vumu+— 12 yawonso isuva muna ngombe—oyandi onatisa yo kuna mbazi a ndo, vana fulu kiavelela, vana vetubwanga ntoto ampolo,* oyoka yo vana nkuni zina vana tiya.+ Ifwete yokelwa vana vetubwanga ntoto ampolo.

13 “‘Avo nkangu awonso a Isaele uveno e ngielele vana ndose a Nzambi wau uvolele sumu lembi wo kana,+ kansi nkangu ke uzeye wo ko vo diambu kasima o Yave bavangidi,+ 14 i bosi, e sumu dizayakene, o nkangu ufwete sunzula mwan’a ngombe a koko se lukau lwa sumu yo kuntwasa vana ntwal’a saba kia wananina. 15 Akuluntu a nkangu betenseka moko mau vana ntu a ngombe a koko vana ndose a Yave, e ngombe a koko ivondelwa vana ndose a Yave.

16 “‘I bosi, o nganga ona wakuswa o mazi otwasa ndambu a menga ma ngombe muna saba kia wananina. 17 O nganga ovuba o nlembo andi muna menga yo zaza e ndambu a menga nkumbu nsambwadi vana ndose a Yave, vana ntwal’a rido.+ 18 O nganga osia mpe ndambu a menga muna mpoka za ziku+ dina vana ndose a Yave, muna saba kia wananina; o menga mawonso ma ngombe a koko mesuva, oyitila mo vana sina dia ziku dia lukau lwa ngioka, edi dina vana mwelo a saba kia wananina.+ 19 Okatula mazi mawonso ma ngombe a koko yo futumuna mo vana ziku.+ 20 Nze una kavangidi muna ngombe yankaka ya lukau lwa sumu, i una kevanga mu ngombe yayi. I wau wuwu kevanga yo. O nganga olomba luyambulwilu lwa masumu ma nkangu,+ belolokwa e sumu diau. 21 Oyandi onatisa e ngombe kuna mbazi a ndo yo yoka yo, wauna kayokela e ngombe yantete.+ O lwalu i lukau lwa sumu mu kuma kia nkangu.+

22 “‘Avo mfumu a nkangu+ ovolele sumu lembi wo kana, wau kavangidi dimosi muna mambu mawonso mana Yave wa Nzambi andi kasima yo yeleswa vana ndose a Nzambi, 23 yovo avo obakwidi vo sumu kavolele muna kulula nkanikinu, ozevo kafwete twasa mwan’a nkombo a koko walunga se lukau. 24 Otenseka koko kwandi vana ntu a mwan’a nkombo, e bulu kivondelwa vana vevondelwanga e bulu kia lukau lwa ngioka, vana ndose a Yave.+ Olwalu i lukau lwa sumu. 25 O nganga obonga e ndambu a menga ma lukau lwa sumu muna nlembo andi yo sia mo muna mpoka+ za ziku dia lukau lwa ngioka. O menga mesuva, oyitila mo vana sina dia ziku dia lukau lwa ngioka.+ 26 Ofutumuna mazi mawonso ma bulu vana ziku, wauna uvangwanga muna mazi ma kimenga kia ungudi;+ o nganga olomba luyambulwilu lwa sumu dia mfumu a nkangu, e sumu diandi dilolokwa.

27 “‘Avo muntu mosi vana vena nkangu a nsi ovolele sumu lembi wo kana yo yeleswa vana ndose a Nzambi muna vanga dimosi muna mambu kasima o Yave,+ 28 yovo avo obakwidi e sumu kavolele, ozevo kafwete twasa mwan’a nkombo ankento alunga se lukau mu kuma kia sumu kavolele. 29 Otenseka koko kwandi vana ntu a bulu kia lukau lwa sumu yo vondela e bulu kia lukau lwa sumu vana vevondelwanga e bulu kia lukau lwa ngioka.+ 30 O nganga obonga e ndambu a menga ma bulu muna nlembo andi yo sia mo muna mpoka za ziku dia lukau lwa ngioka. E menga mawonso mesuva, oyitila mo vana sina dia ziku.+ 31 Okatula mazi mandi mawonso+ wauna ukatulwilwanga mazi ma kimenga kia ungudi,+ o nganga ofutumuna mo vana ziku se lekwa kia nsunga* kwa Yave; o nganga olomba luyambulwilu lwa sumu dia muntu, e sumu diandi dilolokwa.

32 “‘Kansi, avo mwan’a meme ketambika se lukau lwa sumu, kafwete twasa mwan’a meme ankento alunga. 33 Otenseka koko kwandi vana ntu a bulu kia lukau lwa sumu yo vondela e bulu kia lukau lwa sumu vana vevondelwanga bulu kia lukau lwa ngioka.+ 34 O nganga obonga e ndambu a menga ma lukau lwa sumu muna nlembo andi yo sia mo muna mpoka za ziku dia lukau lwa ngioka.+ E menga mawonso mesuva, oyitila mo vana sina dia ziku. 35 Okatula mazi mandi mawonso wauna ukatulwilwanga mazi ma mwan’a meme a koko wa kimenga kia ungudi, o nganga ofutumuna mo vana ziku, vana ntandu a lukau lwayoka vana tiya kuna kwa Yave;+ o nganga olomba luyambulwilu lwa sumu kavolele o muntu, e sumu diandi dilolokwa.+