O zola kweto muna Yave kukutufilanga mu zitisa e nkumbu andi. Ediadi disongele vo tuzolanga zayisa kwa wantu vo mana Satana kavova mu kuma kia nkumbu a Yave ma luvunu. (Tuku 3:1-5; Yobi 2:4; Yoa. 8:44) Muna salu kia umbangi, tukalanga ye tima dia zayisa kwa awana bekalanga ye luzolo lwa kutuwá, kana nani i Yave ye mambu mana kezolanga. Tuzolele vo wantu awonso bazaya vo e fu kiandi kisundidi i zola, mu mpila ansongi ye ndungidi keyadilanga. Tuzolele bazaya mpe vo ke kolo ko e Kintinu kiandi kifokola e mpasi yo twasa luvuvamu ye kiese kwa kanda dia wantu. (Nku. 37:10, 11, 29; 1 Yoa. 4:8) Vava tuzayisanga mambu mama kwa akaka muna salu kia umbangi, nkumbu a Yave tuzitisanga. Tukalanga mpe ye kiese mu zaya vo tuzingilanga e ngwizani ye nkumbu Mbangi za Yave ina tuyikilwanga. w24.05 18 ¶12

E mpangi ayakala, ofwete songanga vo u “nzodi a nzenza.” Ediadi disongele vo ofwete kala nkwa ngemba kuna kwa akaka, kumosi ye awana bena vo ke akundi aku ko. (1 Pet. 4:9) Nkanda umosi usasilanga vo: “O nzodi a nzenza mwelo a nzo andi—yo mwelo a ntim’andi—ufwete kalanga waziuka mu kuma kia anzenza.” Muna diadi, ukiyuvula: ‘Nga wantu bazeye wo vo omono i nzodi a nzenza ana tutambulanga mu nkutakani?’ (Ayib. 13:2, 16)O muntu una vo nzodi a nzenza osonganga e ngemba yo kayila konso kina kena kiau kwa anzenza. Ovanganga wo kana nkutu kwa awana bena vo mapobele ana ke balendi kumvutulwila lekwa ko, kwa mpovi za nzenza ye awana bekuyivananga emvimba muna kasakesa ampangi, nze akengi a zunga.—Tuku 18:2-8; Nga. 3:27; Mav. 16:15; Roma 12:13. w24.11 21 ¶6

Muna kingana kia mienze, Yesu wavovela mienze kumi ana bayenda wanana ye toko diansompi. (Mat. 25:1-4) Yau awonso bazola kota yo toko diansompi muna nkinzi a longo. Yesu wavova vo, atanu muna yau “alungaladi” bakala, kansi atanu “mazowa” bakala. E mienze mia alungaladi, bakubama bakala muna vingila toko diansompi konso ola, kana nkutu muna dingi-dingi. Muna kuma kiaki, oyau banata minda mia mazi kimana miatemesanga o ntemo muna fuku. Banata nkutu mazi mankaka muna nlangi mu kudikila muna minda kele vo toko diansompi ozingidi kwayingi. Ozevo, mienze miami bakubama bakala kimana e minda miau mialembi zima. (Mat. 25:6-10) Vava toko diansompi kalwaka, mienze mia lungalala bele yandi muna nkinzi a longo. Diau dimosi mpe, Akristu akuswa ana bekala bakubama, balungalala yo kwamanana ye kwikizi yamuna ngiz’a Kristu, bekala ye lau dia kala kumosi yo Toko Diansompi, i sia vo, Yesu muna Kintinu kiandi kia zulu.—Lus. 7:1-3. w24.09 21 ¶6