Tala dina diabwa vava Petelo kalenda tanginina e ngindu za Yave ko muna diambu dimosi. Lumbu kimosi, Yesu wavovesa antumwa zandi vo kafwete kwenda kuna Yerusaleme, oyekolwa kwa mfumu za nsambila, okomwa vana nti ampasi, i bosi, ovondwa. (Mat. 16:21) Diampasi diakala kwa Petelo mu kwikila vo Yave oyambula Yesu kavondwa, kadi yandi i Masia wasilwa o nsilu, ona wabundwanga e vuvu kwa Isaele. (Mat. 16:16) Muna diadi, Petelo wanata Yesu vana ndambu ye wamvovesa vo: “Kuvovi wo ko e Mfumu, e diambu diadi ke dikubwila ko.” (Mat. 16:22) Wau vo Petelo kakala ye ngindu za Yave ko muna diambu diadi, e ngindu zandi ke zakala betela ko ye ngindu za Yesu. Yesu wazaya wo vo muna vanga luzolo lwa Yave, diavavanga vo kamona e mpasi yo fwa. Muna diadi, Yesu katambulwila luludiku lwa Petelo ko, kana una vo Petelo kani diambote kakala diau. Muna lumbu kiakina, Petelo walongoka vo diambote mu kalanga ye ngindu za Nzambi. w25.03 9 ¶5-6

Nga ntim’aku wabudika mu kuma kia muntu ona wabundanga e vuvu wakendeleka? Dialudi vo o kendelekwa kwa muntu yovo bembolwa, mpasi kikilu divanganga, kansi Yave okwamanana kusonga o zola kadi wantalu wina kwa yandi. Avo muntu utukendelekele, tulenda vua lufiaulwisu muna mvovo mia Davidi mina muna sono kia unu. Nkanda umosi uvovanga vo “awana bakendalala,” balenda kala “awana ke bena ye diambu dimosi ko diambote balenda bundila e vuvu.” Aweyi Yave kesadisilanga wantu awaya? Nze una se dianzodi kebimbakananga yo fiaulwisa mwan’andi una wakendalala, Yave ‘okutufinamanga,’ okutufiaulwisanga ye wakubama kekalanga muna kutusadisa vava tukendelekwanga yovo bembolwa. Yave una ye tima dia kutufiaulwisa yo kutusasula kele vo ntim’eto ubudikidi ye vava tuyindulanga vo ke tuna diaka mfunu ko. Okutuvananga lekwa yayingi muna kutusadisa twalenda zizidila e mpasi zeto.—Yes. 65:17. w24.12 23 ¶13-14

O unu, akuluntu balenda kala ye ziku vo Yave omonanga yo yangalela e salu kiau. Vana ntandu a salu kia vungula ekambi, longa, samuna e nsangu zambote, akuluntu ayingi bevananga moko muna salu kia tunga fulu ya nsambila yo sadisa awana bebwilwanga e sumbula. Akaka besadilanga muna Buka ya Kingula Mbevo yovo muna Comissões de Ligação com Hospitais. Akuluntu ana bekuyivananga muna salu yayi, bebadikilanga e nkutakani se dibundu dia Yave. Besalanga ye fululu kiawonso muna lungisa yiyekwa yau ye vuvu kia sia vo Nzambi osinga kubasenda mu mana bevanganga. (Kol. 3:23, 24) Vena ye mpangi ana ke balendi sala e salu kia kinkuluntu ko. Kansi, yeto awonso tuna ye lekwa tulenda vana kwa Yave. Nzambi otoma yangalelanga vava tuvanganga e ngolo muna kunsadila. Omonanga nkayilu tuvananga muna yikama e salu kia nz’amvimba, kana nkutu vo ke mia ntalu ko. Oyangalelanga mpe vava tuviokesanga makuzuka yo loloka konso mpangi utuvangidi diambu diambi. Kala ye vuvu vo Yave oyangalelanga mana olendanga vanga. Okuzolanga ye osinga kusenda.—Luka 21:1-4. w24.06 23 ¶12-13