Luvaiku

2 Muna kolo kiakina, muntu mosi a nzo a Levi wasompa mwan’ankento a Levi.+ 2 O nkento oyimiti yo wuta mwan’ayakala. Vava kamwene vo mwana mote kikilu, unswekele mu ngonde tatu.+ 3 Kansi, vava kalendele diaka kunsweka ko,+ obongele nkel’a mawu,* okusidi yo dimbu wa ndombe ye tûma, otudidi o mwana muna kati, osidi e nkela vana kati kwa madiadia, vana mbel’a Nzadi a Nile. 4 O nsang’andi+ otelamene kuna vala mu tala dina dibwila o mwana.

5 Ekolo mwan’ankento a Faro kakulumukini kayowela muna Nile, e ntaudi zandi zamakento zele kangadi muna ndambu a Nile. O mwan’a Faro omwene nkela vana kati kwa madiadia. Vana vau otumini ntaudi andi a nkento kenda yo baka.+ 6 Vava kaziwidi yo, omwene nsedia, mwan’ayakala odilanga. Umfwididi e nkenda, ovovele vo: “O ndioyu mosi muna wan’a Ayibere.” 7 O nsang’a nsedia ovovese mwan’a Faro wa nkento vo: “Nga ozolele ngienda kubokelela nyemeki wa Nyibere kayemekena o mwana?” 8 O mwan’a Faro wa nkento umvutwidi vo: “Wenda!” Vana vau o dumbelele wele bokela o ngudi a nsedia.+ 9 I bosi, o mwan’a Faro wa nkento umvovese vo: “Bong’o mwana ndioyu wangiemekena yandi, ikuvana mfutu.” O nkento obongele o mwana, unyemekene. 10 Vava o mwana kakolele, unete kwa mwan’a Faro wa nkento, okitukidi se mwan’andi.+ Umven’e nkumbu Mose* yo vova vo: “Kadi mu maza yantombola.”+

11 Vava Mose kakudidi,* wele kwa mpangi zandi mu tala e salu yangolo basadidinge.+ Omwene mpe musi Engipito owandanga Nyibere, mosi muna mpangi zandi. 12 Muna kuma kiaki, Mose otadidi oku y’oku, kamwene muntu ko. Ovondele musi Engipito, unswekele kuna nsi a senge.+

13 Kansi, muna lumbu kialanda Mose ovaikidi diaka, omwene Ayibere wole benuananga. Ovovese ona wakala ye ngielele vo: “Ekuma owandilanga mpangi aku?”+ 14 Umvutwidi vo: “Nani utumbikidi se mfumu ye mfundisi eto? Nga ozolele kumponda nze una wavondele musi Engipito?”+ Mose omwene o wonga yo vova muna ntim’andi vo: “Kieleka, dina yavangidi dizayakene!”

15 I bosi, o Faro vava kawidi diambu diadi, ovavidi vonda Mose; kansi o Mose otinini vana ndose a Faro, wele kala muna nsi a Midiani,+ ovuende vana sima. 16 O ngang’a Midiani,+ wan’amakento nsambwadi kakala yau. Wana awaya bezidi mu teka maza bazadisa manuikinu ma kambi dia se diau. 17 Kansi, avungudi bezidi, bayingidi wan’amakento, wau vo i fu kiau. Muna kuma kiaki, o Mose otelamene, osadisi* akento yo nuika e kambi diau. 18 Vava bavutukidi kuna nzo a Ruele*+ wa se diau, o se diau ubayuvuidi vo: “Ekuma o unu nuvutukidi mu nzaki?” 19 Bavutwidi vo: “Musi Engipito mosi+ utuvulwizi vana moko ma avungudi, vana ntandu, ututekele o maza yo nuika e kambi.” 20 Oyuvuidi wan’andi amakento vo: “Owau, akweyi kena o muntu ndioyo? Ekuma nunsisidi ku nima? Nuenda kumbokela, keza dia yeto.” 21 I bosi, Mose otambulwidi kazingila muna nzo a muntu ndioyo, ovene Sipora+ wa mwan’andi ankento kwa Mose kasompana yandi. 22 Kuna kwalanda owutidi mwan’ayakala, umvene nkumbu Ngeresome,*+ kadi wavova vo: “Nkitukidi se nzenza muna nsi a kinzenza.”+

23 Vava vavioka kolo kiayingi,* o ntinu a Engipito ofwidi,+ kansi wan’a Isaele bakwamanene buma yo dila mu kuma kia ubundu. E dilu kiau mu lomba lusadisu mu kuma kia ubundu kiatombokanga kwa Nzambi aludi.+ 24 Kuna kwalanda, Nzambi owidi e bumu kiau,+ Nzambi osungamene kangu kakanga yo Abarayama, Isaki yo Yakobo.+ 25 Muna kuma kiaki, Nzambi ovutwidi e sungididi kiandi kwa Aneyisaele yo mon’e mpasi zau.