Wanzole wa Paulu Kuna kwa Esi Tesalonika

1 Paulu, Silwano* yo Timoteo,+ kuna kwa nkutakani ya esi Tesalonika muna Nzambi wa Se dieto yo Mfumu Yesu Kristu:

2 Yambula nuakala ye nsambu yo luvuvamu lutuka kwa Nzambi wa Se yo Mfumu Yesu Kristu.

3 Ampangi, ntangwa zawonso tusianga sungididi kiavutula matondo kwa Nzambi mu kuma kieno. Ediadi diansongi, e kuma kadi lukwikilu lweno lusikilanga kikilu, o zola muna muntu yo nkwandi kuwokelanga.+ 4 Dianu vo, tukuyisananga+ vana vena nkutakani za Nzambi muna diambu dia lukwikilu lweno ye luzindalalu muna lubangamu ye mpasi zawonso numonanga.*+ 5 Ekiaki i ziku kia mfundis’ansongi a Nzambi, eyi ikunufwanisanga mu kota muna Kintinu kia Nzambi kina numwenanga e mpasi.+

6 Kadi diansongi kikilu kuna kwa Nzambi mu landa kunda kw’awana bekulumwesanga e mpasi.+ 7 Kansi kwa yeno numweswanga e mpasi, nuvevolwa kumosi yo yeto muna lusengomoko lwa Mfumu Yesu+ tuka kuna zulu kumosi ye mbasi zandi zankuma,+ 8 muna tiya twanyuyi, vava kelanda e kunda kw’awana balembi zaya Nzambi ye kw’awana ke belemvokelanga nsangu zambote ko mu kuma kia Mfumu eto Yesu.+ 9 Wantu awaya bevewa tumbu kia lufwasu lwa mvu ya mvu,+ vana ndose a Mfumu ye muna nkembo a nkum’andi, 10 vava kekwiza muna kembeswa ye avauki andi yo sivikwa muna lumbu kiakina kw’awonso ana bekwikilanga, e kuma kadi nuakwikila muna umbangi twanusila.

11 Ekiaki i kuma tusambilanga muna wete dieno ntangwa zawonso, kimana Nzambi eto kanufwanisa muna mpila ina kanubokelela+ ye muna nkum’andi kalungisa emvimba mawonso mambote kazolele ye konso salu kia lukwikilu. 12 Muna mpila yayi e nkumbu a Mfumu eto Yesu ikembelwa muna yeno, oyeno mpe muna yandi, mun’owu wa nsambu za Nzambi eto yo Mfumu Yesu Kristu.