Wantete wa Ntinu

1 Davidi wa Ntinu onunini,+ e mvu miandi se mingi,* kana una vo bamfukanga mavunga, e nitu andi ke yayandukanga ko. 2 E ntaudi zandi bamvovese vo: “Yambula twavava ndumba una vo mwenze kimana kalunga-lunganga o mfumu ame wa ntinu. Kalekanga yaku kimana mfumu ame wa ntinu kayanduka.” 3 Bavavidi ndumba ambote-mbote muna mvivu miawonso mia Isaele, basolwele Abisangi+ wa Nsuneme,+ bantwese kwa ntinu. 4 Ndumba ambote-mbote, walunga-lunganga ntinu yo kunsadila, kansi o ntinu kasidi vukana yandi ko.

5 Muna kolo kiakina, Adoniya+ wa mwan’a Kangiti, wakitundidika yo vova vo: “Mono ikala se ntinu!” Uyikubikidi e kalu ye mvalu ye akwa mvalu ye 50 ma wantu bazaulanga kuna ntwal’andi.+ 6 Kansi, o se diandi kasidi kumvovesa diambu ko* ngatu kunyuvula vo: “Ekuma ovangidi diadi?” Yandi mpe toko diambote-mbote kakala, yandi walandila Abesalome muna wutuka. 7 Adoniya wele mokena yo Yoabe wa mwan’a Seruya yo Abiata+ wa nganga, oyau banyikamene yo kunsadisa.+ 8 Kansi, Sadoke+ wa nganga, Benaya+ wa mwan’a Yekoyada, Natani+ wa ngunza, yo Simei,+ yo Rei yo makesa+ ma Davidi ke bayikamene Adoniya ko.

9 I bosi, Adoniya otambikidi yimenga+ ya mameme, wan’a ngombe ye twelezi yankaka ya mazi vana tadi dia Zokelete dina lukufi ye Ene-rongele. Obokelese mpangi zandi zawonso, wan’a ntinu ye Ayuda awonso, ntaudi za ntinu. 10 Kansi, ka bokelese Natani wa ngunza ko yo Benaya yo makesa, ngatu mpangi andi Solomo. 11 Natani+ ovovese Bate-seba+ wa ngudi a Solomo vo:+ “Nga kuwidi wo ko vo Adoniya+ wa mwan’a Kangiti okitukidi se ntinu, Davidi wa mfumu eto kazeye wo ko e? 12 Owau ungwila, do, yambula yalukisa wavuluza moyo aku yo moyo wa mwan’aku Solomo.+ 13 Wenda kwa Ntinu Davidi, umvovesa vo: ‘Nga ke mfumu ame ko wa ntinu wadila ntaudi aku e ndofi, oku vo: “O mwan’aku Solomo ovinga va fulu kiame se ntinu, yandi ovuanda vana kunda kiame kia kimfumu”?+ Ozevo, ekuma Adoniya kakitukidi se ntinu?’ 14 Vava oyantika vova yo ntinu, mono kibeni ikwiza kulanda yo sikidisa e mvovo miaku.”

15 Bate-seba okotele muna suku dia ntinu. O ntinu se nunu kikilu, Abisangi+ wa Nsuneme walunga-lunganga o ntinu. 16 Bate-seba ovumbamene yo fukamena ntinu, o ntinu unyuvuidi vo: “Nki ozolele?” 17 Ovutwidi vo: “E mfumu ame, ngeye wadia e ndofi muna Yave wa Nzambi aku kwa ntaudi aku vo, ‘O mwan’aku Solomo ovinga va fulu kiame se ntinu, yandi ovuanda vana kunda kiame kia kimfumu.’+ 18 Owau Adoniya okitukidi se ntinu, kansi e mfumu ame wa ntinu kuzeye wo ko.+ 19 Okelele yimenga ya ngombe, twelezi yankaka ya mazi ye mameme mayingi, obokelese wana awonso a ntinu yo Abiata wa nganga, Yoabe wa mfumu a makesa;+ kansi kabokelese ntaudi aku Solomo ko.+ 20 Owau, e mfumu ame wa ntinu, meso ma Isaele yawonso kwa ngeye mena muna kubazayisa kana nani ovinga vana kunda kia mfumu ame wa ntinu. 21 Avo kuvangidi diambu ko, vava mfumu ame wa ntinu ovunda yo mase maku, mono yo mwan’ame Solomo tubadikilwa vo tu ayekodi.”

22 Ekolo kevovanga yo ntinu, Natani wa ngunza okotele.+ 23 Bazayisi kwa ntinu vo: “O Natani wa ngunza una vava!” I bosi, okotele vana vena ntinu, ovumbamene o ntinu. 24 Natani ovovele vo: “E mfumu ame wa ntinu, nga ngeye ovovele vo, ‘Adoniya ovinga vana fulu kiame se ntinu, yandi ovuanda vana kunda kiame kia kimfumu’?+ 25 Kadi o unu, wele kela ngombe, twelezi ya mazi ye mameme mayingi se yimenga,+ obokelese wana awonso a ntinu yo Yoabe wa mfumu a makesa yo Abiata wa nganga.+ Bedianga yo nua yandi yo vova vo: ‘Zinga kwaku e ntinu Adoniya!’ 26 Kansi, mono ntaudi aku kambokelese ko yo Sadoke wa nganga yo Benaya+ wa mwan’a Yekoyada ngatu ntaudi aku Solomo. 27 Nga mfumu ame wa ntinu wavanini dio nswa lembi zayisa kwa ntaudi aku kana nani ovinga vana kunda kia mfumu ame wa ntinu?”

28 Davidi wa Ntinu ovutwidi vo: “Umbokelela Bate-seba.” Wizidi, otelamene vana vena ntinu. 29 Ntinu ovovele vo: “Ndidi e ndofi muna Yave wa Nzambi amoyo, ona wampuluza* muna mpasi zame zawonso,+ 30 wauna yàdila ndofi muna Yave wa Nzambi a Isaele, oku vo: ‘O mwan’aku Solomo ovinga va fulu kiame se ntinu, yandi ovuanda vana kunda kiame kia kimfumu!’ i diau ivanga o unu kiaki.” 31 Bate-seba ovumbamene yo fukamena ntinu yo vova vo: “Yambula Davidi wa Ntinu wa mfumu ame kazinga yakwele mvu!”

32 Vana vau Davidi wa Ntinu ovovele vo: “Umbokelela Sadoke wa nganga yo Natani wa ngunza yo Benaya+ wa mwan’a Yoyada.”+ Bezidi vana vena ntinu. 33 O ntinu ubavovese vo: “Nuenda ye ntaudi za mfumu eno, nuamantisa mwan’ame Solomo muna mula andi,+ nukulumuka yandi kuna Ngikoni.+ 34 Sadoke wa nganga yo Natani wa ngunza bankusila mazi kûna,+ kakala ntinu muna Isaele; i bosi nusika mpungi yo vova vo: ‘Zinga kwaku e Ntinu Solomo!’+ 35 I bosi, nunlanda kuna nima, yandi okwiza vuanda va kunda kiame; yandi okala se ntinu vana fulu kiame, omono ikuntumbika se mfumu a Isaele ye Yuda.” 36 Muna diadi, Benaya wa mwan’a Yoyada ovovese ntinu vo: “Amen! Yambula Yave wa Nzambi a mfumu ame wa ntinu kasikidisa dio. 37 Wauna Yave kekadilanga yo mfumu ame wa ntinu, i una kekadila yo Solomo,+ kaluta tundidika kunda kia kimfumu kia Solomo ke mu kunda kia Davidi wa Ntinu ko wa mfumu ame.”+

38 Sadoke wa nganga yo Natani wa ngunza yo Benaya+ wa mwan’a Yoyada yo Akerete ye Apelete+ bakulumukini yo diatisila Solomo muna mula a Davidi wa Ntinu,+ banete kuna Ngikoni.+ 39 Sadoke wa nganga obongele mpok’a mazi+ muna saba,+ okusidi Solomo mazi,+ basikidi mpungi, o nkangu wawonso uyantikidi kaza vo: “Zinga kwaku e Ntinu Solomo!” 40 I bosi, nkangu wawonso unlende, bele asikinge matutu yo mona kiese kiayingi, o ntoto uzakamene mu kuma kia mazu mau.+

41 Vava bamene dia, Adoniya ye awonso kabokelesa bawidi mazu.+ Vava Yoabe kawidi mazu ma mpungi, oyuvuidi vo: “O mazu mama muna mbanza ma nki?” 42 Ekolo kevovanga, Yonatane+ wa mwan’a Abiata wa nganga olweke. Adoniya ovovele vo: “Kota kwaku, kadi u muntu ambote, nsangu zambote otwese.” 43 Kansi, Yonatane ovutwidi kwa Adoniya vo: “Ke wau ko! O Davidi wa Ntinu wa mfumu eto otumbikidi Solomo se ntinu. 44 O ntinu otumini Sadoke wa nganga yo Natani wa ngunza yo Benaya wa mwan’a Yoyada ye Akerete ye Apelete benda yandi, bandiatisidi muna mula a ntinu.+ 45 Sadoke wa nganga yo Natani wa ngunza bankusidi se ntinu kuna Ngikoni. I bosi, batombokele tuka kwakuna ye kiese, owau e mbanza inikukini. Mama i mazu nuwidi. 46 Vana ntandu, Solomo ovuende vana kunda kia kimfumu. 47 E ntaudi za ntinu mpe bezidi sanisina Davidi wa Ntinu wa mfumu eto, oku vo: ‘Yambula Nzambi aku kaluta tundidika nkumbu a Solomo ke mu nkumbu aku ko, kaluta tundidika kunda kiandi kia kimfumu ke mu kunda kiaku ko!’ Muna diadi, o ntinu ovumbamena vana mfulu. 48 O ntinu ovovele mpe vo: ‘Yambula Yave wa Nzambi a Isaele kakembelelwa, kadi o unu ovene muntu kavuanda va kunda kiame kia kimfumu yo yambula vo meso mame ma mona dio!’”

49 Awonso babokelwa kwa Adoniya bamwene wonga, awonso batelamene, bele kwau. 50 Adoniya mpe omwene wonga mu kuma kia Solomo, otelamene, wele simbinina e mpoka za ziku.+ 51 Wantu basamwini kwa Solomo vo: “Adoniya omwene wonga wa Solomo wa Ntinu; osimbinini mpoka za ziku yo vova vo: ‘Yambula Solomo wa Ntinu kandila ntete ndofi vo kevonda selo kiandi ko muna nsosolo.’” 52 Muna diadi, Solomo ovovele vo: “Avo okala ye kadilu kiambote, kana nkutu lusuki lwandi ke lusotoka vana ntoto ko; kansi avo musoloka e mbi muna yandi,+ fwa kefwa.” 53 Solomo wa Ntinu otumini wantu bankulumuna vana ziku. Adoniya okotele, ovumbamene Solomo wa Ntinu, i bosi, Solomo umvovese vo: “Wenda kuna nzo aku.”