Luvaiku

22 “Avo muntu oyiyidi ngombe yovo meme, kavonda dio yovo teka dio, kafwete futa ngombe tanu muna ngombe mosi, mameme yá muna meme dimosi.+

2 (“Avo mwivi+ owanukini wau kewulanga e nzo kayiya, kawandwa yo fwa, ndiona umvondele ke nata nkanu a menga ko. 3 Kansi, avo mwini ukivaikidi vava diambu diadi divangamene, ndiona umvondele nkanu a menga kenata.)

“O mwivi kafwete futa ina kayiyidi. Avo kena ye lekwa kafuta ko, kafwete tekwa muna futa e lekwa kayiyidi. 4 Avo kina kayiyidi kiwanukini kiamoyo vana moko mandi, kana ngombe yovo buluku yovo meme, kafwete futa bulu yole.

5 “Avo muntu onete bulu yandi muna kiana yovo muna mpatu a vinyu yo yambula vo yenda dila muna mpatu angani, kafwete futa eyi isundidi o wete muna kiana kiandi yovo eyi isundidi o wete muna mpatu andi a vinyu.

6 “Avo tiya tulemene, twasayana yamuna nti mia nsende yo yoka witi wakutikwa yovo una ke wakutikilu ko yovo mpatu yawonso, ndiona okwikidi o tiya kafwete futa ina ividi.

7 “Avo muntu ovene nzimbu yovo lekwa kwa nkwandi kalunda yo, e lekwa yoyo iyiyilu muna nzo andi, o mwivi vo obakamene, kafwete yo futa nkumbu miole.+ 8 Avo mwivi kabakamene ko, o mfumu a nzo kafwete natwa vana ndose a Nzambi aludi+ mu zaya kana vo yandi osidi koko kwandi muna lekwa ya nkwandi. 9 Avo wantu wole bazonzele mu kuma kia ngombe, buluku, meme, mvuatu yovo konso lekwa kiavila, wau vo mosi muna yau ovovele vo: ‘Ekiaki i kiame!’ banata e diambu diau vana ndose a Nzambi aludi.+ Konso ndiona ovewa ngielele kwa Nzambi, ofuta nkumbu miole kuna kwa kwandi.+

10 “Avo muntu ovene buluku yovo ngombe yovo meme yovo konso twelezi kwa nkwandi kalunda kio, avo kifwidi yovo kivangukidi yovo kibongelo kwa muntu ekolo ke vakedi muntu ko omwene, 11 ndiona walundiswa e bulu kafwete dia e ndofi vana ndose a Yave vo kasidi koko kwandi muna lekwa ya nkwandi ko; ndiona ovuidi e bulu kafwete tonda dina kavovele. O nkwandi ke futa lekwa ko.+ 12 Kansi, avo e bulu kiyiyilu vana moko mandi, kafwete yo futa kwa ndiona ovuidi e bulu. 13 Avo kivondelo kwa bulu kia mfuta, kafwete twasa e bulu kivondelo se kimbangi. Ke futa lekwa ko mu kuma kia bulu kivondelo kwa bulu kia mfuta.

14 “Kansi, avo muntu odevele bulu kwa nkwandi, kiatoloka yovo fwa ekolo ndiona ovuidi kio kena vo ko, ndiona odevele kio kafwete futa e mfwilu. 15 Avo ndiona ovuidi e bulu i vana kawanukini, o muntu ndioyo ke futa mfwilu ko. Avo nzimbu kafutidi vava kadevele bulu, e nzimbu zazina i mfutu a mfwilu.

16 “Avo yakala ovukumwini nkento una vo mwenze ona kazitikilwa ko, kaleka yandi, o muntu ndioyo kafwete futa nkam’a longo yo kumbonga se nkaz’andi.+ 17 Avo se dia mwan’ankento kazolele kumvana kwa yandi ko, o muntu ndioyo kafwete futa nzimbu mun’owu wa nkam’a longo.

18 “O nkento una vo ngang’a nkisi kafwete vondwa.+

19 “Konso ndiona ovukana ye bulu, kafwete vondwa kikilu.+

20 “Konso ndiona okela kimenga kwa nzambi zankaka avo ke kwa Yave ko, kafwete vondwa.+

21 “Kufwete bangika nzenza ko yovo kumwesa e mpasi,+ kadi oyeno mpe anzenza nuakala muna nsi ya Engipito.+

22 “Ke numwesi nkento wafwilwa yakala mpasi ko yovo mwana wakondwa se.+ 23 Avo nubamweses’e mpasi muna konso diambu, bakaza kwa mono, i wá kikilu e kazu kiau;+ 24 o makasi mame mefusuka, ikunuvondela muna nsosolo, akazi eno bekondwa akala, o wan’eno bekondwa mase.

25 “Avo odevese nzimbu kwa nsukami* una muna nkangu ame, kuvangi wo ye kani dia vua nluta ko; kunlombi nluta ko.+

26 “Avo obakidi yunga kia nkwaku se nsimbi*+ mu kuma kia nzimbu zaku, ofwete kio kumvutulwila yamuna ndimuk’a ntangwa. 27 Kadi i kiau kaka kekuyifukilanga, i mvuatu kefukilanga e nitu andi;* nki kekuyifukila vava keleka?+ Vava kekaza kwa mono, wá ikunwa, kadi i nkwa nkenda.*+

28 “Kufwete siba* Nzambi ko+ ngatu siba nkuluntu* una ova kati kwa nkangu aku.+

29 “Kukatikisa vana tukau ko muna ulolo wa mbongo aku ye muna eyi izele muna makaminu maku.*+ O mwan’antete muna wan’aku amakala, kwa mono okumvana.+ 30 I wau wuwu ofwete vanga muna mwan’antete a ngombe aku ye meme diaku:+ Lumbu nsambwadi kekala yo ngudi andi. Muna lumbu kianana, kwa mono okumvana.+

31 “Oyeno nufwete kala nkangu avauka kwa mono;+ ke nufwete dia nsuni a konso bulu ko kivondelo kwa bulu kia mfuta.+ Nufwete wo tuba kwa mbwa.