Wantete wa Samuele

7 Esi Kireyate-yarimi bezidi, babongele Nkel’a Yave, banete yo kuna nzo a Abinadabi+ vana kundubulu, bavaudi Elaza wa mwan’andi kimana kalunda Nkel’a Yave.

2 Kolo kiayingi kiavioka, mvu 20, tuka muna lumbu kina e Nkela yalwakila muna Kireyate-yarimi, e nzo a Isaele yawonso bayantikidi tomba* Yave.+ 3 Samuele ovovese nzo a Isaele yawonso vo: “Avo nuvilukidi kieleka kwa Yave yo ntim’eno wawonso,+ nukatula nzambi za nzenza+ ye teke ya Asetorete+ vovo nuina, nusikidisa ntima mieno muna Yave, yandi kaka nusadila,+ oyandi okunuvuluza vana moko ma Afelesetia.”+ 4 Muna diadi, Aneyisaele bakatwidi teke ya Bale ye Asetorete, basadidi kaka Yave.+

5 I bosi, Samuele ovovele vo: “Nukutakesa Isaele yawonso kuna Misepa,+ isamba kwa Yave mu kuma kieno.”+ 6 Bakutakene kuna Misepa, batekele maza, bayitidi mo vana vena Yave, bafionkonuene* mu lumbu kiakina.+ Bavovele vo: “Tusumukini Yave.”+ Samuele oyantikidi sala se mfundisi+ a Aneyisaele kuna Misepa.

7 Afelesetia vava bawidi vo Aneyisaele bakutakene kuna Misepa, e mfumu za Afelesetia+ batombokele muna nuanisa Isaele. Aneyisaele vava bawidi wo, bamwene o wonga mu kuma kia Afelesetia. 8 Aneyisaele bavovese Samuele vo: “Kuyambula bokela Yave wa Nzambi eto ko katusadisa+ yo kutuvuluza vana moko ma Afelesetia.” 9 Samuele obongele mwan’a meme oyemanga untambikidi se lukau lwa ngioka+ kwa Yave; o Samuele olombele lusadisu kwa Yave muna kuma kia Isaele, o Yave umvutwidi.+ 10 Ekolo Samuele katambikanga lukau lwa ngioka, Afelesetia bafinamene mu nuanisa Isaele. Kansi muna lumbu kiakina Yave otalumwini mwandazi angolo+ vana vena Afelesetia, okotese mavuanga vana bena,+ batufakeso kwa Isaele.+ 11 I dianu vo, wan’a Isaele bavaikidi kuna Misepa, balakamene Afelesetia, babatufakese yakuna Betekare kuna sude. 12 Samuele obongele tadi,+ osidi dio vana kati kwa Misepa yo Yesana, oyikidi dio vo Ebeneza,* ovovele vo: “Yamu wau Yave utusadisi.”+ 13 Afelesetia basundwa, ke bakota diaka muna mvivu a Isaele ko;+ o koko kwa Yave kwazita muna Afelesetia e lumbu yawonso ya Samuele.+ 14 E mbanza za Isaele zina Afelesetia bakutumuna zivutwilu kwa Isaele, tuka Ekerone yakuna Ngati, Isaele okutumwini mvivu au vana moko ma Afelesetia.

Vakedi mpe luvuvamu vana vena Aneyisaele yo Aneyamore.+

15 Samuele wafundisa Isaele e lumbu yawonso ya zingu kiandi.+ 16 Konso mvu wayenda zietinge kuna Betele+ ye Ngilengale+ ye Misepa+ yo fundisa Isaele muna fulu yayi yawonso. 17 I bosi wavutukanga kuna Rama,+ kadi i kûna kwakala e nzo andi, wafundisanga mpe Isaele kwakuna. Otungidi Yave e ziku kuna Rama.+