Levitiku

14 Yave okwamanene vovesa Mose vo: 2 “Owau i nsiku mu kuma kia nkwa wazi muna lumbu kia luveleleso lwandi, vava kenatwa kwa nganga.+ 3 O nganga ovaika kuna mbazi a ndo yo kwenda kumfimpa. O nkwa wazi avo osasukidi muna wazi, 4 o nganga okunkanikina vo katwasa nuni zole zamoyo ye zavelela, tini kia nti a nsedele, tenda kia mbwaki akongola* ye saki kia nti a isopo mu kuma kia luveleleso lwandi.+ 5 O nganga okanikina vo e nuni mosi yavondelwa vana ntandu a kinzu kia tûma kina yo maza mabongelo vana maza mekukulanga. 6 Kansi, obonga e nuni amoyo ye tini kia nti a nsedele, tenda kia mbwaki akongola* ye saki kia nti a isopo, ovuba e lekwa yayi yawonso muna menga ma nuni ivondelo vana ntandu a maza mabongelo vana maza mekukulanga. 7 I bosi, o nganga ozaza o menga nkumbu nsambwadi kwa ndiona okuyivelelesa muna wazi yo kunyikila vo wavelela. Vo i nuni amoyo, otilumuna yo muna nzanza.+

8 “Ndiona okuyivelelesa kafwete sukula mvuatu miandi yo vala e nsuki za nitu andi yawonso, kayowela muna maza, okala wavelela. I bosi, olenda kwandi kota muna ndo, kansi okala kuna mbazi a saba kiandi mu lumbu nsambwadi. 9 Muna lumbu kiansambwadi, kafwete katula luvanda kuna ntu andi, nzevo zandi ye ve yandi ya meso. Vava kevala e nsuki za nitu andi yawonso, osukula e mvuatu miandi yo yowela muna maza, okala wavelela.

10 “Muna lumbu kianana, obonga wana wole a mameme amakoko alunga, meme dimosi diankento+ dia mvu mosi dialunga, tini tatu muna tini kumi ya efa* ya mfumfu yambote yasangwa o mazi se lukau lwa mbwaza,+ loke mosi* a mazi;+ 11 o nganga ona unyikidi vo wavelela, osunzula o muntu uyivelelese kumosi ye tukau twandi vana ndose a Yave, vana mwelo a saba kia wananina. 12 O nganga obonga mwan’a meme mosi a koko yo kuntambika se lukau lwa kuzuka+ kumosi ye loke mosi a mazi, ozunganisa yo kuna ntwala y’oku nima se lukau lwa zunganisa vana ndose a Yave.+ 13 I bosi, ovondela mwan’a meme vana fulu kiavauka, vana vevondelwanga e bulu kia lukau lwa sumu ye bulu kia lukau lwa ngioka;+ kadi nze lukau lwa sumu, o lukau lwa kuzuka mpe lwa nganga.+ Ekiokio lekwa kisundidi o vauka.+

14 “I bosi, o nganga obonga ndambu a menga ma bulu kia lukau lwa kuzuka, osia mo vana nsuk’a kutu kwalunene kwa ndiona okuyivelelesa ye vana nlembo anene a koko kwandi kwalunene ye vana nlembo anene a kulu kwandi kwalunene. 15 O nganga obonga findambu fia loke a mazi+ yo yitila mo vana kandazi kia koko kwandi kwalumonso. 16 O nganga ovunga nlembo a koko kwandi kwalunene muna mazi mena vana kandazi kia koko kwandi kwalumonso, muna nlembo andi, ozaza findambu fia mazi nkumbu nsambwadi vana ntadisi a Yave. 17 I bosi, muna mazi masidi vana kandazi kiandi kia koko, o nganga osia ndambu vana nsuk’a kutu kwalunene kwa ndiona okuyivelelesa ye vana nlembo anene a koko kwandi kwalunene ye vana nlembo anene a kulu kwandi kwalunene, vana ntandu a menga ma lukau lwa kuzuka. 18 E ndambu a mazi isala vana kandazi kia koko kwa nganga, o nganga osia mo vana ntu a muntu okuyivelelesa; olomba luyambulwilu lwa masumu ma muntu ndioyo vana ntadisi a Yave.+

19 “O nganga otambika lukau lwa sumu+ yo lomba luyambulwilu lwa masumu mu kuma kia ndiona okuyivelelesa muna mfunzuk’andi, i bosi kevonda e bulu kia lukau lwa ngioka. 20 O nganga otambika lukau lwa ngioka ye lukau lwa mbwaza+ vana ziku yo lomba luyambulwilu lwa masumu mu kuma kia muntu ndioyo,+ okala wavelela.+

21 “Kansi, avo nkwa wazi nsukami ye kena ye ndendelo zafwana ko, obonga mwan’a meme a koko se lukau lwa kuzuka yo kunsunzula se lukau lwa zunganisa, mu lomba luyambulwilu lwa masumu mandi, obonga mpe tini kiakumi kia efa* kia mfumfu yambote yasangwa o mazi se lukau lwa mbwaza, loke mosi a mazi, 22 ye mbwela zole yovo nsweswe miole mia mayembe, mun’owu wa ndendelo zandi. Osunzula nuni mosi se lukau lwa sumu, e yankaka se lukau lwa ngioka.+ 23 Muna lumbu kianana,+ otwasa zo kwa nganga vana mwelo a saba kia wananina kimana kaveleleswa vana ntadisi a Yave.+

24 “O nganga obonga mwan’a meme a koko wa lukau lwa kuzuka+ kumosi ye loke mosi a mazi, ozunganisa yo kuna ntwala y’oku nima se lukau lwa zunganisa vana ntadisi a Yave.+ 25 I bosi, ovonda mwan’a meme a koko a lukau lwa kuzuka, o nganga obonga ndambu a menga ma bulu kia lukau lwa sumu yo sia mo vana nsuk’a kutu kwalunene kwa ndiona okuyivelelesa ye vana nlembo anene a koko kwandi kwalunene ye vana nlembo anene a kulu kwandi kwalunene.+ 26 O nganga oyitila ndambu a mazi vana kandazi kia koko kwandi kwalumonso,+ 27 i bosi, muna nlembo a koko kwandi kwalunene, ozaza ndambu a mazi mena vana kandazi kia koko kwandi kwalumonso nkumbu nsambwadi vana ntadisi a Yave. 28 O nganga osia mazi mena vana kandazi kia koko kwandi vana nsuk’a kutu kwalunene kwa ndiona okuyivelelesa ye vana nlembo anene a koko kwandi kwalunene ye vana nlembo anene a kulu kwandi kwalunene, muna fulu yau imosi ina kasidi o menga ma lukau lwa kuzuka. 29 I bosi, o mazi mesuva vana kandazi kia koko kwandi, o nganga osia mo vana ntu a muntu okuyivelelesa, kimana kalomba luyambulwilu lwa masumu ma muntu vana ntadisi a Yave.

30 “Mun’owu wa ndendelo za muntu okuyivelelesa, o nganga otambika imosi muna mbwela yovo umosi muna nsweswe mia mayembe,+ 31 konso nuni kalendele o nkwa wazi, o nganga otambika imosi se lukau lwa sumu, e yankaka se lukau lwa ngioka,+ otambika yo kumosi yo lukau lwa mbwaza; o nganga olomba luyambulwilu lwa masumu vana ntadisi a Yave mu kuma kia muntu okuyivelelesa.+

32 “Owau i nsiku mu kuma kia muntu okedi ye kimbevo kia wazi, kansi kena ye ndendelo zafwana ko muna veleleswa.”

33 I bosi, Yave ovovese Mose yo Arone vo: 34 “Vava nukota muna nsi ya Kenani+ ina ikunuvana se vua dieno,+ avo ngiambwidi vo kimbevo kia wazi kiakota mu nzo mosi muna nsi eno,+ 35 ndiona ovuidi e nzo okwenda zayisa kwa nganga vo: ‘Tona dina muna yaka kia nzo ame, dina nze kimbevo kia wazi.’ 36 O nganga okanikina vo bavaikisa e lekwa yawonso ina muna nzo vitila kenda fimpa e tona, kimana kalembi yikila e lekwa yawonso ina mo vo yafunzuka; i bosi o nganga okota mu fimpa e nzo. 37 O nganga ofimpa e fulu kina e tona, avo e tona dina muna yaka ya nzo dia se kia lukaya lwa nkunzu a mbum’a diaki yovo diatoma bwaka ye diatoma kota muna yaka, 38 o nganga ovaika muna nzo yo zika e nzo mu lumbu nsambwadi.+

39 “Muna lumbu kiansambwadi, o nganga ovutuka mu fimpa e nzo. Avo e tona diyalangene muna yaka ya nzo, 40 o nganga okanikina vo bakatula matadi mena ye tona yo veta mo kuna mbazi a mbanza, vana fulu kivetwanga lekwa yafunzuka. 41 I bosi, okanikina vo bavala e nzo muna kati, o ntoto una bevala ufwete vetwa kuna mbazi a mbanza, vana fulu kivetwanga lekwa yafunzuka. 42 Bebonga matadi mankaka yo vingisa mo vana fulu bakatwidi matadi, kafwete sadila ntoto wankaka muna lenga e nzo.

43 “Avo bakatwidi matadi yo vala e nzo yo lenga o ntoto, kansi e tona divutukidi diaka muna nzo, 44 o nganga okota muna nzo yo fimpa yo. Avo e tona diyalangene muna nzo, ozevo wazi+ wansambukila wina muna nzo. E nzo yafunzuka. 45 O nganga okanikina vo e nzo yawulwa—matadi mandi, mabaya mandi yo ntoto a nzo yawonso—yo nata yo kuna mbazi a mbanza, vana fulu kivetwanga lekwa yafunzuka.+ 46 Kansi, ndiona okota muna nzo muna konso lumbu ina e nzo ikala yazikwa,+ okala wafunzuka yamuna nkokela;+ 47 konso ndiona oleka muna nzo yoyo kafwete sukula e mvuatu miandi, konso ndiona odila muna nzo yoyo kafwete sukula e mvuatu miandi.

48 “Kansi, avo bamene lenga e nzo, o nganga kakota yo mona vo e tona ke diyalangene ko muna nzo, oyikila e nzo vo yavelela, kadi e tona divididi. 49 Muna velelesa e nzo yafunzuka,* o nganga obonga nuni zole, tini kia nti a nsedele, tenda kia mbwaki akongola* ye saki kia nti a isopo.+ 50 Ovondela nuni mosi vana kinzu kia tûma kina yo maza mabongelo vana maza mekukulanga. 51 I bosi, obonga e tini kia nti a nsedele, saki kia nti a isopo, tenda kia mbwaki akongola* ye nuni amoyo, ovuba e lekwa yayi yawonso muna menga ma nuni ivondelo vana ntandu a maza mabongelo vana maza mekukulanga, o nganga ozaza o menga nkumbu nsambwadi kuna kwina e nzo.+ 52 Muna velelesa e nzo yafunzuka,* osadila menga ma nuni, maza mabongelo vana maza mekukulanga, nuni amoyo, tini kia nti a nsedele, saki kia nti a isopo ye tenda kia mbwaki akongola.* 53 I bosi, otilumuna e nuni amoyo muna nzanza kuna mbazi a mbanza; muna mpila yayi okatula e mfunzuk’a nzo,* e nzo ikala se yavelela.

54 “Owau i nsiku mu kuma kia konso diambu ditadidi wazi, kimbevo kia nkand’a ntu yovo kia nzevo,+ 55 wazi muna mvuatu+ yovo muna nzo,+ 56 mavimbu, mputa ye matona,+ 57 muna zaya kana vo e lekwa kiafunzuka yovo kiavelela.+ Owau i nsiku mu kuma kia wazi.”+