Lusengomono kwa Yoane

8 Vava kakatwidi+ e dimbu kia nsambwadi,+ kuna zulu kukedi e pi-i mu tezo kia ndambu a ola. 2 Mbwene mbasi nsambwadi+ zina zitelamene vana ntadisi a Nzambi, ziveno mpungi nsambwadi.

3 E mbasi yankaka izidi yo telama vana ziku, ikedi ye yokelwa kia wolo kia ndumbu,+ iveno ndumbu ayingi+ kimana katambika yo vana ziku dia wolo+ dina vana ntwal’a kunda ekolo e sambu ya avauki awonso yawakananga. 4 O mwisi a ndumbu ina vana koko kwa mbasi utombokele vana ntadisi a Nzambi kumosi ye sambu+ ya avauki. 5 Vana vau mbasi obongele yokelwa kia ndumbu, ozadisi kio ye tiya twa ziku, otubidi kio ova nza. Vakedi miandazi* ye ndinga ye nsemo+ ye nzakam’a ntoto. 6 E mbasi zau nsambwadi zina ye mpungi nsambwadi+ zikubamene mu sika zo.

7 Ona wantete osikidi mpungi andi. Vakedi mvula a matadi ye tiya twasangwa o menga, tutubilu ova ntoto;+ e tini kiatatu kia nza kividi, e tini kiatatu kia nti kividi ye titi yawonso yankunzu ividi.+

8 E mbasi ina yanzole isikidi e mpungi andi. Lekwa kina nze mongo ampwena kikweme yo tiya, kitubilu muna kalunga.+ E tini kiatatu kia kalunga kikitukidi se menga;+ 9 e tini kiatatu kia vangwa yamoyo* ina muna kalunga ifwidi,+ e tini kiatatu kia nzaza kidimukini.

10 E mbasi ina yatatu isikidi e mpungi andi. Kuna zulu kutukidi ntetembwa ampwena ikweme nze mini, isotokele muna tini kiatatu kia nkoko ye muna nto za maza.+ 11 E nkumbu a ntetembwa, Nlulu. E tini kiatatu kia maza kikitukidi se nlulu, wantu ayingi bafwidi mu kuma kia maza, kadi maludisu.+

12 E mbasi ina ya nyá isikidi e mpungi andi. E tini kiatatu kia ntangwa kiwendo+ ye tini kiatatu kia ngonde ye tini kiatatu kia ntetembwa, kimana e tini kiau kiatatu kiakituka se tombe,+ o kuma kwalembi kala yo ntemo muna tini kiandi kiatatu, o fuku mpe diau dimosi.

13 Mbwene yo wá ngo-zulu itilumukanga muna kati kwa zulu, ivovele mu nding’angolo, oku vo: “Ekwe vonza, ekwe vonza, ekwe vonza+ kwa awana bena ova nza, muna kuma kia zú dia mpungi zina zisidi, zina zisikwa kwa mbasi zau tatu!”+