Yosua

10 Adoni-sedeke wa Ntinu a Yerusaleme vava kawidi wo vo Yosua obakidi Ai yo fukisa yo, dina kavanga kwa Yeriko ye ntinu andi+ i dina kavangidi kwa Ai yo ntinu andi+ yo ungudi bavangidi esi Ngibone ye Isaele+ yo kala yau, 2 omwene kikilu o wonga,+ kadi Ngibone mbanza yanene, nze mbanz’a kintinu. Yasunda mbanza Ai+ onene, awonso bakala mo makesa. 3 Adoni-sedeke wa ntinu a Yerusaleme, otwikidi nsangu kwa Okame wa ntinu a Kerebone+ yo Pirami wa ntinu a Yamute yo Yafia wa ntinu a Lakisi yo Debi wa ntinu a Engelone,+ oku vo: 4 “Nuiza kunsadisa, twanuanisa Ngibone, kadi bavangidi ungudi yo Yosua ye Aneyisaele.”+ 5 Ozevo, e ntinu ntanu mia Aneyamore+—ntinu a Yerusaleme, ntinu a Kerebone, ntinu a Yamute, ntinu a Lakisi yo ntinu a Engelone—bakutakene yo makesa mau, bele kiatamena Ngibone, banuanisa yo.

6 Esi Ngibone batwikidi nsangu kwa Yosua kuna ndo a Ngilengale,+ oku vo: “Kubembola* ntaudi zaku ko.+ Wiza nswalu! Utuvuluza, utusadisa! Atinu awonso a wan’a Yamore muna zunga ya miongo, bakutakene batunuanisa.” 7 Yosua otombokele tuka kuna Ngilengale yo makesa mandi mawonso ye mabamba-ngolo.+

8 Yave ovovese Yosua vo: “Kubamoni wonga ko,+ kadi ibayekwele vana moko maku.+ Ke mosi ko muna yau okutelamena.”+ 9 Yosua odiete fuku wamvimba tuka kuna Ngilengale, ubaluakìdi kuna kinsalukisa. 10 Yave ubamwanganese vana vena Isaele,+ ovondele ayingi muna yau kuna Ngibone, babalakamene tuka kuna ntombok’a Bete-korone yo kubabukumuna vana ndimb’a Azeka yo Makeda. 11 Ekolo batinininge Isaele yo lwaka vana nkulumuk’a Bete-korone, Yave ubasotolwele matadi mampwena matuka kuna zulu, yakuna Azeka, bafwidi. Ana bafwila muna matadi ma mvula engi, ke mu awaya ko bavondelwa muna nsosolo kwa Aneyisaele.

12 E lumbu kina Yave kabukumuna Aneyamore vana meso ma Aneyisaele, o Yosua wavovesa Yave vana ndose a nkangu a Isaele vo:

“E ntangwa, ningama+ kwaku muna Ngibone,+

Ongeye ngonde mpe, muna Ndimb’a Ayalone!”

13 E ntangwa iningamene, e ngonde mpe iningamene yavana e zula kialanda e mbeni zau e kunda. Ediadi nga ke diasonama muna nkand’a Yasa ko e?+ E ntangwa iningamene vana kati kwa zulu, kavita dimuka ko tezo kia lumbu kiamvimba. 14 Ke vasidi kala lumbu nze kiakina ko, kana ina yavitila yovo ina yalandila kio, kina Yave kawila nding’a muntu,+ kadi Yave wanuananga mu kuma kia Isaele.+

15 I bosi, Yosua ye Isaele awonso bavutukidi muna ndo kuna Ngilengale.+

16 Atinu yau tanu batinini yo swekama muna nduka kuna Makeda.+ 17 I bosi, dizayisu kwa Yosua vo: “Atinu yau tanu basolokele, baswekamene muna nduka kuna Makeda.”+ 18 Yosua ovovele vo: “Nunengomona matadi mampwena vana nu’a nduka, nutula vo wantu babalangidila. 19 Kansi, oyeno ke nuningami ko. Nulakama mbeni zeno yo tufakesa awana bena kuna nima.+ Ke nubayambula ko bakota muna mbanza zau, kadi Yave wa Nzambi eno ubayekwele ova moko meno.”

20 O Yosua yo Aneyisaele babavondele e mponda yayingi yamu tezo kia kubafukisa, akete kaka batinini muna mbanza zangolo, 21 nkangu wawonso uvutukidi kwa Yosua kuna luvuvamu kuna ndo a Makeda. Ke vakala diaka muntu ko wakala ye unkabu wavova diambu* kwa Aneyisaele. 22 I bosi, Yosua ovovele vo: “Nuziula nu’a nduka,* nuntwasila atinu tanu awaya.” 23 Bantwasidi atinu tanu awaya bavaikisi muna nduka: ntinu a Yerusaleme, ntinu a Kerebone, ntinu a Yamute, ntinu a Lakisi yo ntinu a Engelone.+ 24 Vava batwese atinu awaya kwa Yosua, obokelese akala awonso a Isaele, ovovese mfumu za makesa ana bayenda yandi oku vo: “Nufinama. Nudiata makosi ma atinu awaya.” Bafinamene, badiete makosi mau.+ 25 Yosua ubavovese vo: “Ke numoni wonga ko ngatu vumiswa.+ Nukala yo unkabu, nukumama, kadi i wau kevanga o Yave kwa mbeni zeno zawonso zina nunuanisa.”+

26 I bosi, Yosua ubatufakese yo kubavonda, ubazembelekele muna nti tanu, bakedi muna nti yakuna masika. 27 Vava kiadimuka ntangwa, Yosua okanikini vo bakulumunua muna nti+ yo tubwa muna nduka una baswekamena. Banengomwene matadi mampwena muna nu’a nduka, makinu vana yamu unu kiaki.

28 Yosua obakidi Makeda+ muna lumbu kiakina, ofwasidi yo muna nsosolo. Ovondele ntinu ye awonso bakedi mo, kasisidi mosi ko.+ Wauna kavanga kwa ntinu a Yeriko i una kavangidi kwa ntinu a Makeda.+

29 Yosua okatukidi ye Isaele yawonso kuna Makeda, bele nuanisa Libena.+ 30 Yave oyekwele mpe Libena yo ntinu andi+ vana moko ma Isaele, bafwasidi yo muna nsosolo ye awonso* bakedi mo, ke basisidi kana mosi ko. Wauna bavanga kwa ntinu a Yeriko,+ i una bavangidi kwa ntinu a Libena.

31 Yosua ye Isaele yawonso bakatukidi kuna Libena, bele kuna Lakisi,+ bakiatamene yo nuanisa yo. 32 Yave oyekwele Lakisi vana koko kwa Isaele, babakidi yo muna lumbu kiazole. Bafwasidi yo muna nsosolo+ ye awonso bakedi mo, wauna bavanga muna Libena.

33 Olame wa ntinu a Ngeze+ wele sadisa Lakisi, kansi Yosua umvondele yo nkangu andi, kasisidi kana mosi ko.

34 I bosi, Yosua ye Isaele yawonso, bakatukidi kuna Lakisi, bele kuna Engelone,+ bakiatamene yo, banuanisa yo. 35 Babakidi yo e lumbu kiakina, bafwasidi yo muna nsosolo. Muna lumbu kiakina bafukisi awonso* bakedi mo, wauna bavanga muna Lakisi.+

36 I bosi, Yosua ye Isaele yawonso, bakatukidi kuna Engelone, bele kuna Keberone,+ banuanisi yo. 37 Babakidi yo, bafwasidi yo muna nsosolo, yo ntinu andi ye mbanza zandi ye awonso bakedi mo, ke basisidi kana mosi ko. Wauna kavangidi kwa Engelone, ofwasidi yo ye awonso bakedi mo.

38 I bosi, Yosua ye Isaele yawonso bele kuna Debi+ yo nuanisa yo. 39 Obakidi yo, yo ntinu andi ye mavata mandi mawonso, babatufakese muna nsosolo yo vonda awonso bakedi mo,+ ke basisidi kana mosi ko.+ Wauna kavanga kwa Kerebone yo Libena yo ntinu andi i una kavangidi kwa Debi yo ntinu andi.

40 Yosua obakidi nsi yawonso, zunga kia miongo, Nengebe, Sefela+ ye ndimba ye atinu andi awonso, kasisidi kana mosi ko; ovondele yawonso yafulumunanga,+ nze una kakanikina Yave wa Nzambi a Isaele.+ 41 Yosua ubasundidi tuka kuna Kadese-banea+ yakuna Ngaza+ ye nsi yawonso a Ngosene+ yakuna Ngibone.+ 42 Yosua obakidi ntinu miami miawonso ye nsi zau muna kolo kimosi, kadi Yave wa Nzambi a Isaele wanuanina Isaele.+ 43 I bosi, Yosua ye Isaele yawonso bavutukidi kuna ndo kuna Ngilengale.+