Yezekele

33 E diambu dia Yave dizidi kwa mono, oku vo: 2 “E mwan’a muntu, vovesa o wan’a nkangu aku vo:+

“‘Avo ngiambwidi vo e nsi yanuaniswa,+ o nkangu a nsi yoyo basola muntu yo kuntumbika se nyingidi au, 3 oyandi kamona e mbeni zikwizanga muna nsi, kasika e mpungi yo lukisa o nkangu,+ 4 avo muntu owidi e zú dia mpungi kansi kalemvokele lulukisu ko,+ e mbeni ziza yo kumvonda,* o menga mandi vana ntu andi mekala.+ 5 Kadi oyandi owidi e zú dia mpungi, kansi kalemvokele lulukisu ko. O menga mandi mekala muna yandi. Kele vo kalemvokela o lulukisu, wadi vuluza o moyo andi.

6 “‘Kansi, avo nyingidi omwene mbeni zikwizanga ye kasikidi mpungi ko,+ o nkangu ke ulukisu ko, e mbeni ziza yo vonda mosi muna yau, o muntu ndioyo fwa kefwa mu kuma kia bi wandi, kansi o menga mandi muna nyingidi ivavila mo.’+

7 “Vo i ngeye, e mwan’a muntu, itumbikidi se nyingidi a nzo a Isaele; avo owidi e diambu ditukidi omu nu’ame, ofwete kubazayisa lulukisu lwame.+ 8 Avo mpovese kimpumbulu vo: ‘E kimpumbulu, fwa ofwa!’+ kansi ongeye kuvovele diambu ko muna lukisa kimpumbulu kimana kayambula e nzil’andi, o kimpumbulu ofwa mu kuma kia bi wandi,+ kansi o menga mandi kwa ngeye ivavila mo. 9 Kansi, avo olukisi kimpumbulu kayambula e nzil’andi, oyandi kazolele yambula nzil’andi ko, oyandi ofwa mu kuma kia bi wandi,+ kansi ongeye ovuluza o moyo aku.+

10 “E mwan’a muntu, vovesa e nzo a Isaele vo, ‘Oyeno nuvovele vo: “Ukolami weto ye masumu meto mazitidi kikilu kwa yeto yo kututandisa;+ ozevo, aweyi tukwamanena o zinga?”’+ 11 Ubavovesa vo: ‘“E nkal’ame kaka,” u kavovele o Mfumu Yave, “kiyangalelanga lufwa lwa muntu ambi ko,+ kansi ivavanga vo muntu ambi kayambula e nzil’andi+ yo kwamanana zinga.+ Nuyambula, nuyambula e nzila zeno zambi.+ Kadi, ekuma nufwila, e nzo a Isaele?”’+

12 “E mwan’a muntu, vovesa wan’a nkangu aku vo: ‘O unsongi wa muntu ansongi ke ukumvuluza ko vava kekolama;+ o bi wa muntu ambi ke ukuntesa sakuba ko vava keyambula o bi wandi;+ ke vena muntu ansongi ko oyambulwa vo kazinga mu kuma kia unsongi wandi muna lumbu kina kesumuka.+ 13 Avo mpovese muntu ansongi vo: “Ongeye okwamanana zinga,” oyandi kabunda e vuvu muna unsongi wandi yo vanga edi diambi,*+ ke dimosi ko muna mavangu mandi ma unsongi disungamenua; kansi ofwa mu kuma kia mbi kavangidi.+

14 “‘Avo mpovese o muntu ambi vo: “Fwa ofwa,” oyandi kayambula e sumu diandi yo vanga edi diansongi ye diambote,+ 15 o muntu ambi kavutula kina katambwidi se nsimbi,+ kafuta kina kayiyidi+ yo diatila muna mîna miame muna lembi vanga edi diambi, okwamanana zinga.+ Ke fwa ko. 16 Ke tumbwa ko mu kuma kia konso sumu kavola.*+ Oyandi okwamanana zinga wau kavangidi edi diansongi ye diambote.’+

17 “Kansi, o nkangu aku uvovele vo: ‘E nzil’a Yave ke yansongi ko,’ kana una vo e nzil’au i ke yansongi ko.

18 “Avo muntu ansongi oyambwidi o unsongi wandi yo vanga edi diambi, kafwete fwa mu kuma kia diambu diodio.+ 19 Kansi, avo muntu ambi oyambwidi o bi wandi yo vanga diambu diansongi ye diambote, okwamanana zinga wau kavangidi wo.+

20 “Kansi oyeno nuvovele vo: ‘E nzil’a Yave ke yansongi ko.’+ Ifundisa konso muntu mu yeno mun’owu wa nzila zandi, e nzo a Isaele.”

21 Muna mvu una wa 12 wa kinkole kieto, muna ngonde ya kumi, muna lumbu kiatanu kia ngonde, muntu mosi watina tuka kuna Yerusaleme wizidi kwa mono+ yo vova vo: “E mbanza ifwasilu!”+

22 Muna nkokela yavitila e lumbu kina muntayila kandwakila, o koko kwa Yave kwizidi omu mono, oyandi oziwidi o nu’ame vitila o muntayila keza kwa mono muna mene-mene. Ozevo o nu’ame wakiziukila, kiakala diaka baba ko.+

23 I bosi, e diambu dia Yave dizidi kwa mono, oku vo: 24 “E mwan’a muntu, awana bezingilanga muna mbanza zafwasuka+ bevovanga mu kuma kia nsi ya Isaele vo: ‘O Abarayama muntu mosi kaka kakala, kana una vo i wau, wavua e nsi yayi.+ Kansi, oyeto ndonga twina; e nsi yayi twavewa yo kikilu se vua.’

25 “Muna kuma kiaki, ubazayisa vo: ‘I wau wuwu kavovele o Mfumu Yave: “Oyeno nudianga o nsuni una yo menga,+ nusengolanga o meso kwa teke yangemi* yo kwamanana bungula o menga.+ Ozevo, aweyi nuvuila e nsi yayi? 26 Oyeno nubundanga e vuvu muna nsosolo mieno,+ nukivene muna mavangu mangemi, konso muntu mu yeno ovukananga yo nkento a mfinangani andi.+ Ozevo, aweyi nuvuila e nsi yayi?”’+

27 “Ubazayisa vo: ‘I wau wuwu kavovele o Mfumu Yave: “E nkal’ame kaka, awana bezingilanga muna mbanza zafwasuka befwila muna nsosolo; awana bena muna nzanza, ikubavana kwa bulu ya mfuta se madia; awana bena muna matininu mangolo ye muna nduka befwila muna vuku.+ 28 Ikitula e nsi se makanga masala e nkatu,+ o umvuania wandi wasaka sukiswa usukiswa, e miongo mia Isaele misala e nkatu,+ ke muviokela diaka muntu ko. 29 Oyau bezaya wo vo mono i Yave vava ikitula e nsi se makanga masala e nkatu+ mu kuma kia mambu mawonso mangemi bavangidi.”’+

30 “Vo i ngeye, e mwan’a muntu, nkangu aku bemokenanga muntu yo nkwandi mu kuma kiaku vana ndambu a yaka ye muna mielo mia nzo.+ Bevovaziananga, konso muntu ye mpangi andi vo: ‘Wiza, twenda wá e diambu ditukidi kwa Yave.’ 31 Ndonga bekwiza kutakana vana ntadisi aku nze nkangu ame; bewá e mvovo miaku, kansi ke belemvokela mio ko.+ Kadi muna nua miau mambu ma malengo bekuvovesanga, kansi e ntima miau milakukilwanga e nluta mialembi songa. 32 Kuna kwa yau, ongeye wina nze nkung’anzola, wayimbilwa mu ndinga yambote-mbote, watoma sikwa muna nsambi. Bewá e mvovo miaku, kansi ke mosi ko olemvokela mio. 33 Vava e mvovo miomio milungana—kadi milungana kikilu—oyau bezaya wo vo ngunza okedi vana kati kwau.”+