Nsiku

30 “Vava e mambu mama mawonso mekulwakila, i sia vo, e nsambu ye sibu eyi nsidi ova ntadisi aku,+ ongeye wasungamena yo*+ muna zula yawonso ina Yave wa Nzambi aku kekumwanganisa,+ 2 wavutuka kwa Yave wa Nzambi aku+ yo ntim’aku wawonso yo moyo* aku wawonso,+ ongeye yo wan’aku, wawila e nding’andi mun’owu wa mawonso ikukanikinanga o unu, 3 ozevo, Yave wa Nzambi aku otwasa wantu aku bayenda kinkole;+ okufwila e nkenda+ yo kukutakesa diaka tuka muna nkangu miawonso muna Yave wa Nzambi aku kamwanganese.+ 4 Kana nkutu vo nkangu aku wamwanganeswa yakuna nsuka za nza, o Yave wa Nzambi aku okukutakesa tuka kwakuna yo kutwasa.+ 5 Yave wa Nzambi aku okutwasa omu nsi ina mase maku bavua, ongeye ovua yo; Nzambi okuvatumuna yo kuwokesa lutila mase maku.+ 6 Yave wa Nzambi aku ovelelesa* o ntim’aku yo ntim’a wan’aku,+ ozevo ngeye ozola Yave wa Nzambi aku yo ntim’aku wawonso yo moyo* aku wawonso, kimana wakala o moyo.+ 7 Yave wa Nzambi aku otwasa e sibu yayi yawonso kwa mbeni zaku, ana bamenga yo kumwesa e mpasi.+

8 “I bosi, ongeye ovutuka kwa Yave, owila e nding’andi yo lemvokela e nkanikinu miandi miawonso mina ikukanikinanga o unu. 9 Yave wa Nzambi aku otoma sambula e salu yawonso ya moko maku,+ owokesa wan’aku ye twelezi yaku ye mbongo a ntoto aku, kadi Yave oyangalela diaka kusambula, wauna kayangalela akulu aku.+ 10 Kadi ongeye owila e nding’a Yave wa Nzambi aku yo lunda e nkanikinu miandi ye mîna miasonama mu nkanda wau wa Nsiku, ongeye ovutuka kwa Yave wa Nzambi aku yo ntim’aku wawonso yo moyo* aku wawonso.+

11 “O nkanikinu wau ikukanikinanga o unu ke una kikilu mpasi ko kwa ngeye, ke una mpe kwa ndá ko.*+ 12 Ke una ku zulu ko, kimana wavova vo: ‘Nani otomboka kuna zulu katubakila wo, kimana twawá wo yo lemvokela wo?’+ 13 Ke una mpe ku simu dia mbu ko, kimana wavova vo: ‘Nani osauka kuna simu dia mbu katubakila wo, kimana twawá wo yo lemvokela wo?’ 14 Kadi e diambu dina yaku kikilu lukufi, omo nu’aku ye muna ntim’aku,+ kimana walemvokela dio.+

15 “Tala, o unu nsidi ova ntadisi aku moyo ye nsambu, lufwa ye sibu.+ 16 Avo owila e nkanikinu mia Yave wa Nzambi aku mina ikukanikinanga o unu, muna zolanga Yave wa Nzambi aku,+ muna kangalelanga muna nzila zandi, muna lundanga e nkanikinu miandi ye mîna miandi ye nzengo zandi za mfundisa, ozevo okala moyo+ yo wokela, Yave wa Nzambi aku okusambula muna nsi ina ovua.+

17 “Kansi, avo ntim’aku uvengomoka+ yo lembi wá, wavukumunua yo vumbamena nzambi zankaka yo kubasadila,+ 18 inuzayisi o unu vo fwa nufwa.+ Ke nuzinga kolo kiayingi ko muna nsi ina osaukila Yodani wavua yo. 19 O unu nsidi e zulu ye nza se mbangi mu kuma kieno vo nsidi ova ntadisi aku moyo yo lufwa, nsambu ye sibu;+ sola moyo kimana wazinga,+ ongeye yo wan’aku,+ 20 muna zolanga Yave wa Nzambi aku,+ wila e nding’andi yo kuntatidila,+ kadi oyandi i moyo aku, muna yandi ozingila kolo kiayingi muna nsi ina Yave kadila ndofi vo ovana yo kwa akulu aku Abarayama, Isaki yo Yakobo.”+