Wanzole wa Paulu Kuna kwa Esi Tesalonika

2 Dianu vo, ampangi, muna diambu dia ngiz’a Mfumu eto Yesu Kristu+ ye mpila tukutakeselwa kumosi yo yandi,+ tunuwondelele vo 2 ke nuvilakeswa muna nyindu mieno ko ngatu telamwa e mioyo, kana muna diambu diavumunuinua*+ yovo muna nsangu ngatu muna nkanda ulenda moneka vo kwa yeto utukidi, mu songa vo e lumbu kia Yave*+ kilweke.

3 Ke vakadi muntu ko kanuvukumuna muna konso diambu, e kuma kadi ke kikwiza ko yavana umpengomoki+ uteka kwiza yo sengomona nkuludi a nsiku,+ mwan’a lufwasu.+ 4 Yandi i ntantu, uyisidi vana ntandu awonso beyikilwanga vo nzambi yovo lekwa kisambilwanga,* ovuende muna tempelo a Nzambi, ukisongele se nzambi vana meso ma ndonga. 5 Nga ke nusungamene wo ko vo mambu mama yanusamunuina mo vava yakala yeno?

6 Owau ona wina se nkaku nunzeye, osengomonua muna ntangwa yasikidiswa. 7 Kieleka, o nkuludi a nsiku ndioyo una se mbumba, mu sala se kena,+ kansi okala kaka se mbumba yavana kikatuka ndiona una se nkaku. 8 I bosi, o nkuludi a nsiku osengomonua, Mfumu Yesu okumfwasila muna mwand’a nua andi+ yo kumfukisa emvimba muna lusengomono+ lwa ngiz’andi. 9 Kansi, e ngiz’a nkuludi a nsiku ina muna wisa kia Satana+ yo mavangu mawonso mankuma ye sinsu yaluvunu ye masivi,+ 10 yo vilwa wawonso.+ Mambu mama i mevukumunanga awana bena muna nzil’a lufwasu, e kuma kadi ke batambulwila zola kwa ludi ko kimana bavuluzwa. 11 Kiaki i kuma o Nzambi kabayambulwila vo bavukumunua yo kwikila muna luvunu,+ 12 kimana yau awonso batumbwa, kadi ke bakwikila muna ludi ko kansi batoma yangalela muna vilwa.

13 Dianu vo, ampangi azolwa kuna kwa Yave,* ntangwa zawonso tusianga sungididi kia vutula matondo kwa Nzambi mu kuma kieno, e kuma kadi tuka kuna lubantiku Nzambi wanusola+ muna luvuluzu wau kanuvaula+ muna mwand’andi ye muna lukwikilu lweno muna ludi. 14 Muna diadi wanubokelela muna nsangu zambote tusamunanga, kimana nuatambula o nkembo wa Mfumu eto Yesu Kristu.+ 15 Dianu vo ampangi, nusikila+ yo simbinina tusansu tuna nualongwa,+ diakala muna nsangu yovo muna nkanda watuka kwa yeto. 16 Yambula yandi kibeni Mfumu eto Yesu Kristu yo Nzambi wa Se dieto ona watuzola+ yo kutuvana lufiaulwisu lwa mvu ya mvu ye vuvu kiambote+ muna nkenda zandi, 17 kafiaulwisa e ntima mieno yo kunusikidisa muna mavangu ye mambu mawonso mambote.