Nsiku

12 “Emiami i nsiku ye nzengo za mfundisa nufwete lemvokela una ufwene e lumbu yawonso nuzinga muna nsi ina Yave wa Nzambi a akulu eno kekunuvana se vua. 2 Nufwete fwasa emvimba e fulu yawonso ina e zula nuyinga basambidilanga e nzambi zau,+ kana muna miongo miandá yovo muna kundubulu yovo kuna nsi a konso nti watoma savuka. 3 Nubangula maziku mau, nukosomona malunzi mau mavauka,+ nuyoka mavindi mau mavauka* vana tiya yo bwisa e teke yavalwa ya nzambi zau,+ nuavunzuna e nkumbu zau vana fulu kiakina.+

4 “Ke nufwete sambila Yave wa Nzambi eno ko muna mpila ina besambilanga e nzambi zau.+ 5 Kansi, nuvava Yave wa Nzambi eno konso fulu kina kesola mu sia e nkumbu andi, e fulu kiandi kia zingila vana vena makanda meno mawonso, i kûna nukwenda.+ 6 I kûna nunata o tukau tweno twangioka, yimenga yeno,+ tini yeno ya kumi,+ nkayilu eno,+ tukau tweno twa nsilu, tukau tweno twa mvevo,+ wan’antete a ngombe yo wan’antete a mameme ye nkombo zeno.+ 7 Oyeno ye esi nzo zeno nufwete yo dila vavana, vana ntadisi a Yave wa Nzambi eno+ yo yangalala mu kuma kia salu yeno yawonso,+ kadi o Yave wa Nzambi aku usambwidi.

8 “Ke nuvangi ko wauna tuvanganga o unu ovava. Konso muntu ovanganga dina kamwene vo diambote muna meso mandi, 9 kadi ke nualweke ntete vana fulu kia vundu ko+ ye kuna vua dina Yave wa Nzambi aku kekuvana. 10 Vava nusauka Yodani+ yo zingila muna nsi ina Yave wa Nzambi eno kekunuvana nuavua yo, oyandi okunuvana kieleka e vundu vana vena mbeni zeno zawonso zinuzungidi, mu luvuvamu nuzingila.+ 11 Yawonso ikunukanikinanga nufwete yo nata vana fulu kina Yave wa Nzambi eno kesola mu sia e nkumbu andi,+ i sia vo: tukau tweno twangioka, yimenga yeno, tini yeno yakumi,+ nkayilu eno ye konso lukau lwa nsilu luna nusidi nsilu kwa Yave. 12 Nuyangalala vana ntadisi a Yave wa Nzambi eno:+ oyeno yo wan’eno amakala, wan’eno amakento, ntaudi zeno zamakala ye ntaudi zeno zamakento yo Nlevi wina omu mbanza zeno,* kadi oyandi kena ye kunku ko yovo vua vovo nuina.+ 13 Nutoma keba nualembi tambikila tukau tweno twangioka vana konso fulu kiakaka kina numona.+ 14 Ofwete tambikila kaka tukau twaku twangioka vana fulu kina Yave kesola muna zunga kia kanda dimosi vana vena makanda meno, i vana ofwete vangila mawonso ikukanikinanga.+

15 “Kansi, konso ntangwa ozolele,* olenda kwaku vonda bulu yo dia e mbizi,+ mun’owu wa nsambu zina Yave wa Nzambi aku kekuvana muna mbanza zaku zawonso.* O muntu wafunzuka yo muntu wavelela balenda yo dia kwau, wauna nudila nkayi yo mvanda. 16 Kansi, kufwete dia menga ko;+ ofwete mo yitila vana ntoto nga maza.+ 17 Kuyambulwa ko wadila e tini kiakumi kia mbwaza zaku muna mbanza zaku,* yovo vinyu aku yampa, mazi maku, mwan’antete a ngombe aku yo mwan’antete a meme diaku ye nkombo aku,+ ngatu konso tukau twaku twa nsilu tuna osididi o nsilu, tukau twaku twa mvevo yovo nkayilu aku. 18 Ofwete dila e lekwa yayi vana ntadisi a Yave wa Nzambi aku vana fulu kina Yave wa Nzambi aku kesola+—ongeye yo mwan’aku ayakala, mwan’aku ankento, ntaudi aku ayakala yo ntaudi aku ankento yo Nlevi una omu mbanza zaku;* ongeye oyangalala vana ntadisi a Yave wa Nzambi aku muna salu yaku yawonso. 19 Toma keba walembi bembola o Nlevi ekolo ozingila muna nsi aku.+

20 “Vava Yave wa Nzambi aku kewokesa e zunga kiaku,+ wauna kasila o nsilu,+ ongeye wavova vo: ‘Mbizi nzolele dia,’ wau vo nsatu* a dia mbizi una yau, olenda kwaku dia e mbizi konso ntangwa ozolele.*+ 21 Avo e fulu kina Yave wa Nzambi aku kasolele mu sia e nkumbu andi+ kwandá kina, ozevo, ofwete vonda e zankaka muna ngombe zaku yovo mankaka muna mameme maku ye nkombo zaku zina Yave kavene, wauna yakanikina, ofwete zo dila muna mbanza zaku,* konso ntangwa ina ozolele.* 22 Olenda yo dia kwaku wauna odila e nkayi yo mvanda;+ o muntu wafunzuka yo muntu wavelela balenda yo dia kwau. 23 Kansi, kala kaka ye nzengo zalembi dia menga,+ kadi o menga i moyo,+ kufwete dia moyo ko kumosi yo nsuni. 24 Kufwete mo dia ko. Ofwete mo yitila vana ntoto nga maza.+ 25 Kufwete mo dia ko, kimana ongeye yo wan’aku bekulandila nuakala kiambote, wau vo ovanganga oma mambote vana meso ma Yave. 26 Vava okwenda kuna fulu kina Yave kesola, ofwete nata kaka e lekwa yaku yavauka yo tukau twaku twa nsilu. 27 Okwakuna, otambika tukau twaku twangioka, o nsuni yo menga,+ vana ziku dia Yave wa Nzambi aku; o menga ma yimenga yaku mafwete yitilwa vana ndambu a ziku+ dia Yave wa Nzambi aku, kansi o nsuni olenda wo dia kwaku.

28 “Toma keba kimana walemvokela e mvovo miami miawonso ikukanikinanga, kimana ongeye yo wan’aku nuakala kiambote, wau vo ovanganga oma mambote ye mansongi vana meso ma Yave wa Nzambi aku.

29 “Vava Yave wa Nzambi aku kefukisa e zula ina oyinga,+ ongeye wazingila muna nsi au, 30 toma keba walembi bwa mu ntambu vava befukiswa vana ndose aku. Kuyuvula ko mu kuma kia nzambi zau vo: ‘Aweyi e zula yayi basadilanga e nzambi zau? Omono mpe yavanga diau adimosi.’+ 31 Kufwete vanga diambu diadi ko kwa Yave wa Nzambi aku, kadi mawonso mambi mana Yave kemenganga i mau e zula bevanganga kwa nzambi zau, beyokanga nkutu wan’au amakala yo wan’au amakento vana tiya se kimenga kwa nzambi zau.+ 32 O mambu mawonso mana ikunukanikinanga i mau nufwete vanga.+ Ke nukudikila mo diambu ko ngatu katula.+