Mfumu A Makesa Osongele Lukwikilu Lwanene

Vava kamanisi o longa vana Mongo, Yesu wele muna mbanz’a Kafanau. Akaka muna akuluntu a Ayuda bezidi kwa yandi. O muntu ubatumini ke musi nkanda diau ko—mbut’a nkama, i sia vo, Mfumu a makesa ma Roma.

O ntaudi andi ona ketoma zolanga obakamene kimbevo kiangolo, se kefwa. Kana una vo mbut’a nkama ndioyo ke Nyuda ko, ozolele vo Yesu kansadisa. Ayuda bavovese Yesu vo e ntaudi a muntu ndioyo “olele muna nzo, e vola keyela, mpasi kikilu kemona.” (Matai 8:6) Akuluntu a Ayuda muna songa vo e mbut’a nkama ndioyo lusadisu kafwanukini, bavovese Yesu vo: “Zula kieto kezolanga, yandi watunga e sambilu dieto.”—Luka 7:4, 5.

Muna diadi, Yesu wele y’akuluntu kuna nzo a mfumu a makesa. Vava bafinamene e nzo, o mfumu a makesa otumini akundi andi bavovesa Yesu vo: “E Mfumu, kuyivangi mpasi ko, kadi kiafwana ko kimana wakota kuna nsi a nludi ame. I kuma ngindulwidi vo omono kibeni kifwene kwiza koko wina ko.” (Luka 7:6, 7) Ekwe lulembamu kasongele o muntu ndioyo wayukwa tumina akaka! Ediadi disonganga vo mfumu a makesa ndioyo waswaswana kikilu y’esi Roma ana bebangikanga ntaudi.—Matai 8:9.

Ka lukatikisu ko vo, o mbut’a nkama ozeye wo vo Ayuda bevenganga kala ntwadi y’awana bena vo ke Ayuda ko. (Mavangu 10:28) Nanga i kuma mfumu a makese katumini akundi andi bavovesa Yesu vo: “Vova kaka e diambu, o ntaudi ame kasasuka.”—Luka 7:7.

Vava kawidi e diadi, Yesu osivikidi yo vova vo: “Inuvovese vo, kana nkutu muna Isaele, kiasolwele muntu ko una ye lukwikilu lwanene nze lwalu.” (Luka 7:9) Wau bavutukidi kuna nzo a mfumu a makesa, akundi andi bamwene vo o ntaudi okedi ye kimbevo kiangolo osasukidi.

Vava Yesu kawukidi ntaudi ndioyo, osadidi elau diadi muna songa vo esi zula ana bena ye lukwikilu besambulwa, ovovele vo: “Ndonga betuka kuna este ye weste bekwiza yo vuanda kuna meza kumosi yo Abarayama, yo Isaki yo Yakobo muna Kintinu kia zulu.” Adieyi tuvova mu kuma kia Ayuda bakondelo lukwikilu? Yesu ubavovese vo “betubwa kuna mbazi kuna tombe. I kuna bedidila yo kwetesa meno.”—Matai 8:11, 12.

Ayuda babembolwa wau balembi tambulwila e lau bateka vewa mu kala yo Yesu muna Kintinu. Kansi, esi zula betambulwa kimana bavuanda kumosi yo Yesu vana meza, i sia vo “muna Kintinu kia zulu.”