Mbangi za Yave —Bakubama mu Samuna e Nsangu Zambote

Se vioka 100 mvu, Mbangi za Yave bakubama mu samuna e nsangu zambote. E nsangu zambote zilutidi samunwa ova nza owau ke mu tandu yavioka ko, kadi tusamunanga zo vioka nkama za ndinga ye nsi 230. (Mat. 24:14) Ekuma salu kiaki kinina o mfunu? Aweyi kisadilwanga muna nza yawonso? E video “Testemunhas de Jeová—Organizadas para Pregar as Boas Novas,” yivananga e mvutu za yuvu yayi yo songa una kisadilwanga mu nza yawonso. Ekolo otala e video yayi vava mvutu za yuvu eyi.

E video yayi aweyi ilenda wokesela luyangalalu lwaku muna (1) ngolo zivanganga nkubik’a Yave mu samuna e nsangu zambote? (2 Tim. 4:2) (2) mpangi besadilanga ku Betele muna nza yawonso? (3) sikola zikubikanga missionario ye akengi? (2 Tim. 2:2) (4) mfunu wa tanganga sono kia lumbu ke lumbu mu mene yo kubika malongi ma tukutakanu? (Mav. 17:11) (5) nluta miakala muna tukutakanu twawonso? (Ayib. 10:24, 25) (6) nsambu osinga vwa vava ntoto ukituka se paradiso? (Yes. 11:9) (7) y’elau diaku dia yikama e salu kia nkutika?—Yoa. 4:35.

E video yayi ina se sadilwa kiambote muna wokesa luzolo lwa awana beyangalelanga e salu kia Mbangi za Yave mu nz’amvimba. (8) Nkia ntangwa tulenda songa e video yayi kwa alongoki eto a Nkand’a Nzambi, yitu yeto ye akaka? (9) Nga wantu beyangalelanga vava okubasonganga e video yayi?

Muna badika mana Yave kevanganga, tukwikila mu mvovo emi mia ntozi a nkunga: “Owokesa mo, ongeye Yave wa Nzambi ame, o masivi maku ye ngindu zaku oku twina, o tetomona zo oko wina, ke kulendakana ko.” (Nku. 40:5) Yambula twatoma sadila e video yayi kimana twasadisa akaka bawokesa luyangalalu lwau muna nkubik’a Yave!