Kala ye Kiese Muna Salu kia Nzambi

YAVE ozolele vo wakala ye kiese. (Nku. 100:⁠2) Wau vo umosi muna selo yandi, nanga ngeye mpe salu kiayingi una kiau. Vava wayekola e zingu kiaku kwa Nzambi, nanga kwakala ye salu kiayingi ko, kansi owau e salu ya ngeye kibeni kumosi ye salu ya mwanda yakituka se zitu. Nanga okendalalanga vava kulendanga ko lungisa mawonso ozolele. Aweyi olenda sadila muna tezo yo simbinina “kiese kia Yave”?​—⁠Nek. 8:⁠10.

Wau vo mu ntangw’ampasi tuzingilanga, ofwete kala ye nkubika zambote. Muna kuma kiaki, elongi dia Paulu wa ntumwa diamfunu kikilu: “Nutoma tala nkangala nukangala, ke nze minkondwa-ngangu ko, nze akwa ngangu kaka; nwiyikûdilang’e ntangwa, e kuma kadi e lumbu ibì.”​—⁠Ef. 5:​15, 16.

Muna kuma ki’elongi diadi, aweyi olenda zayil’e tezo kia sala salu ya ngeye kibeni kumosi ye salu ya mwanda nze kala y’elongi dia ngeye kibeni, lunga-lunga esi nzo, sala salu kia umbangi, ye mambu makaka mamfunu?

Nga osungamenanga e kiese wamona vava wayiyekola kwa Nzambi yo vubwa? O zaya Yave ye makani mandi kiese ditwasanga. Nanga ngonde zayingi walongoka mu vwa zayi yo kala ye kiese. Kansi, e ngolo wavanga nluta zatwasa. Mana walongoka matomesa zingu kiaku.

Muna simbinina kiese kiaku, ofwete kumikanga kimwanda kiaku. Kele vo kukalanga ye ntangwa ya tanga yo longoka Nkand’a Nzambi ko, fimpa e nkubika zaku. Avo vaudi miniti miakete konso lumbu mu longoka yo badika mana otanganga, dikusadisa mu finama Yave. Ediadi dikusadisa mu kala ye kiese.

Ndonga muna selo ya Nzambi bevaulang’e ntangwa mu sala e salu kisundidi o mfunu, vana fulu kia fwasa ntangw’au mu mambu makondwa mfunu. Ukiyuvula: ‘Ola kwa iviokesanga mu tanga zulunalu, tala televizau, wa miziki, yovo nsaka zakaka?’ E salu yayi ilenda twasa kiese kele vo isadilu mu tezo. (1 Tim. 4:⁠8) Avo mwene vo kusadilanga ntangwa mu mpila yambote ko, singika e nkubika zaku.

Adam, una vo ese dia wana atatu, ye nkuluntu, wasonga dina dikunsadisanga vava kavova vo: “Isianga ngolo mu kala ye zingu kiavevoka. Ivenganga mambu meyiyanga ntangwa yayingi ye lekwa ivavanga ntangwa yayingi muna lunga-lunga yo. Ediadi ka disongele ko vo kizolanga yangalala ko, isakananga nsaka zina zambote.”

O badika e nluta mitwasanga e nzengo zambote obakanga dilenda kusadisa mu kala ye kiese ye ngindu zasikila. Kasikil’owu, Mariusz, nkuluntu una yo wana atatu, wavova vo: “Vava yayantika longoka Nkand’a Nzambi, yayantika mpe yima ngindu zasikila ye vuvu kia kusentu. Ezak’e ntangwa, ilwakilwanga kwa mpasi, ezaka mpasi Yave kaka ozeye zo. Kansi, ivutulanga matondo muna lusadisu lwandi yo vingila e zingu kia kusentu ye kiese kiawonso.”

Nze Mariusz, o kala ye ngindu zasikila, ke dikatulanga ntelamw’a moyo ko. Kansi, dilenda kusadisa mu kala ye kiese ye zizidila mambu mampasi ma zingu. Muna Nkand’a Nzambi tutanganga vo: “E lumbu yawonso ya mumbona-mpasi, yayiva: Nkwa ntim’a kiese wina y’elambu diankwamu.” (Nga. 15:​15) Badika mpe una Nzambi kekuzolelanga. Ediadi dilenda wokesa o zola ye kiese kiaku muna yandi.​—⁠Mat. 22:37.

O sia Yave y’oma ma Kintinu va fulu kiantete muna zingu diwokesanga kiese kia esi nzo. O songa e fu ya Kikristu dilenda kulula ntatani yo twasa ngwizani ambote muna nzo. Muna mpila yayi, e nzo aku ikala se fulu kia luvuvamu kwa esi nzo awonso.​—⁠Nku. 133:⁠1.

O sala kumosi y’esi nzo e salu ya mwanda dilenda kudikila kiese. Mariusz wavova vo: “Itoma yangalalanga vava isalanga kumosi y’esi nzo. O nkaz’ame otoma kunsadisanga. Ezak’e ntangwa, osalanga yame muna salu kia umbangi yovo kia velelesa fulu kikala lukutakanu lwa mvivu ye kwenda yame vava ikwenda filanga elongi muna nkutakani zakaka. Ediadi ditoma kunkasakesanga.”

Nkand’a Nzambi ukanikinanga Akristu balungisa e nsatu za esi nzo zau. (1 Tim. 5:⁠8) Kansi, kele vo e salu kia nitu ntangwa yayingi ye ngolo kivavanga, dilenda kuyiya e kiese muna salu kia Nzambi. Lomba lusadisu lwa Yave muna sambu. (Nku. 55:​22) Akaka bebakanga nzengo za vava salu kiakaka kilenda kubavan’e ntangwa mu sia salu kia Kintinu kia Nzambi va fulu kiantete. O Nkristu kafwete bembola ko e salu ya mwanda eyi isundidi o mfunu mu kuma kia salu kifutanga nzimbu zayingi.​—⁠Nga. 22:⁠3.

Diamfunu wasoneka e nluta ye mfwilu milenda twasa e salu osalanga. Kieleka, e salu kiambote kifutanga nzimbu zayingi mfunu kina. Kansi, nga e salu kiaku kikuvananga e ntangwa mu sadisa esi nzo aku muna mwanda? Toma fimpa e diambu diadi yo baka nzengo zilenda kusadisa mu sia e ngwizani aku yo Yave va fulu kiantete.

Kele vo e salu kiaku kikukakidilanga mu nungunuka muna mwanda, ofwete vanga nsobani muna zingu kiaku. Akristu ayingi bevanganga nsobani muna zingu yau kimana bakala ye ntangwa ya sala e salu ya mwanda. Mpangi mosi kuna Polônia wavova vo: “Entete kiazaya dina mfwete vanga ko, i bosi, yabaka nzengo za yambula e salu kina yasalanga kadi kiavavanga vo yavanga nkangalu mu nsi zakaka. Kiakalanga ye ntangwa ko mu lunga-lunga kimwanda kiame ye kia esi nzo ame.” Owau mpangi ndioyo osalanga e salu kina kilembi kundianga ntangwa yayingi.

Kala ye Kiese kia Sadisa Akaka

Yesu wavova vo ‘edi diviokele e kiese, dia vana, ke mu tambula ko.’ (Mav. 20:​35) Akristu bavwidi malau mayingi mu vanga wo. Ezak’e ntangwa, seva y’akaka, bimbana yovo sanisina muntu olungisi kiyekwa kiandi muna salu kia Nzambi, i mambu mavwilu o mfunu muna kala ye kiese.

Paulu wa ntumwa wakasakesa Akristu akw’andi vo: ‘Nukasakes’akwa ntima mia nkenda, nusikinin’atovoki.’ (1 Tes. 5:​14) Akwa ntima mia nkenda beyindulanga vo ke balendi sunda mpasi muna ngolo za yau kibeni ko. Nga olenda kubavana lusadisu bavwidi o mfunu? Kele vo mwene mpangi aku ovidisi kiese kiandi muna salu kia Yave, vanga wawonso mu kunkasakesa. O vanga wo dilenda kukasakesa mpe. E mambu makaka ke malendi singikwa kwa muntu ko. Kansi, olenda songa e nkenda kwa mpangi aku yo kunkasakesa kabunda e vuvu muna Yave ona osadisanga e ntangwa zawonso. Awana bevanga wo ke besinga kendalala ko.​—⁠Nku. 27:10; Yes. 59:⁠1.

E diambu diakaka olenda vanga mu sadisa awana bavidisa kiese, i vaika yau muna salu kia umbangi. Vava Yesu katuma alongoki 70, wabatuma “nwole-nwole.” (Luka 10:⁠1) Nga kukwikidi ko vo ediadi diakasakesa muntu yo nkw’andi? Nga lenda tanginina mbandu yayi mu sadisa muntu kavutukila kala ye kiese?

O unu, tuna ye mambu mayingi mekututokanesanga. Kansi, Paulu okutuwondelelanga vo: ‘Nukembelelang’aka muna Mfumu: mpovele wo diaka vo, nukembelela.’ (Fili. 4:⁠4) Muna kuma kia zola kwaku muna Nzambi yo kunlemvokela yo zindalala muna salu kavana, e zingu kiaku kina yo mfunu. Ediadi dilenda kutwasila kiese. Edi disundidi o mfunu, o Yave okusadisa mu zizidila lubangamu ye mpasi omonanga.​—⁠Roma 2:​6, 7.

Tuna ye vuvu vo e nz’ampa kasila o nsilu Yave ifinamene. Ekwe nsambu ye kiese tukala kiau! (Nku. 37:​34) Avo tukala ye kiese, ke tuvilakana ko una Yave kekutusambulwilanga owau. Muna kuma kiaki, tulenda ‘sadila Yave ye kiese.’​—⁠Nku. 100:⁠2.

[Mvovo mia Fwaniswa mina muna lukaya lwa 8]

NSAKA

NZO ye

LUNGA-LUNGA ESI NZO

SALU

TUKUTAKANU TW’AKRISTU

ELONGI DIA

NGEYE KIBENI

SALU KIA UMBANGI

[Mvovo mia Fwaniswa mina muna lukaya lwa 8]

Muna kala ye kiese dilenda vava vo wasingika e mpila osadilanga e ntangwa

[Mvovo mia Fwaniswa mina muna lukaya lwa 10]

Nga lenda sadisa akaka bavutukila e kiese kiau?