Longa Wan’aku

Yesu Walongoka o Lemvo

NGA diampasi dikalanga kwa ngeye mu songa lemvo?—aAvo i wau ku siviki dio ko. Ezak’e ntangwa wantu awonso bemonanga vo diampasi dikalanga mu songa lemvo. Nga ozeye wo vo kana nkutu Yesu walongoka o lemvo?—

Nga ozeye kana nani bafwete lemvokela aleke awonso?— Ingeta, se ye ngudi eto. Nkand’a Nzambi uvovanga vo: “Nulemvokela mase meno ye ngudi zeno muna Mfumu.” (Efeso 6:1) Nani i Se dia Yesu?— Yave wa Nzambi, yandi mpe i Se dieto. (Matai 6:9, 10) Kansi avo ovovele vo Yosefe se dia Yesu kakala e Maria ngudi andi, ediadi dialudi. Nga ozeye una bakitukila mase mandi?—

Mbasi Ngambiele wavovesa Maria vo okituka se ngudi, kana una vo kateka vukana nitu ye yakala ko. Yave wavanga esivi diadi diampwena mu lungisa diambu diadi. Ngambiele wavovesa Maria vo: “O nkum’a Mpungu ukuyitalela; muna wau, eki kiwutwa kiyikilwa vo kiavelela, Mwan’a Nzambi.”—Luka 1:30-35.

Nzambi wakatula moyo a Mwan’andi kun’ezulu yo sia wo muna vumu kia Maria. Nze una nsedia kenungunukanga muna vumu kia ngudi andi, Yesu mpe wanungunuka muna vumu kia Maria. Ngonde vwa zavioka, Yesu wawutuka. Muna kolo kiaki, Yosefe wasompa Maria, ndonga bevovanga vo Yosefe i se dia Yesu. Kieleka, Yosefe i se diansansi dia Yesu. Ozevo, Yesu mase mole kakala mau!

Vava kakala ye kimbuta kia mvu 12, wavanga diambu dina diasonga vo watoma zolanga Yave w’Es’andi ezulu. Muna kolo kiakina, nze una wakala e fu kia esi nzo a Yesu, bayenda kuna Yerusaleme kuna nkinzi a nduta. Vava bavutuka kuna nzo au yakala kuna Nazarete, Yosefe ye Maria ke bazaya wo ko vo Yesu kakala yau kumosi ko. Nga olenda yindula ekuma bamvilakana?—

Ingeta, kadi Yosefe ye Maria wana akaka bakala yau. (Matai 13:55, 56) Nanga bakangala ye yitu yau nze Yakobo ye Yoane kumosi mpe ye se diau Zebedayo ye ngudi au Salome, nanga mpangi a Maria kakala.—Matai 27:56; Maku 15:40; Yoane 19:25.

Vava Yosefe ye Maria babakula vo Yesu kakala yau kumosi ko, bavutuka kuna Yerusaleme mu kumvava. Bayindula vo ke besolola diaka mwan’au ko. Muna lumbu kia tatu, bansolola muna tempelo. O Maria wamvovesa vo: “Adieyi utuvangìdi wau? o s’aku yo mono tutuka kwend’avavinge ye ntantu. Ubavovese vo: Adieyi numpavìdi? ke nuzeye wo ko vo omu nzo Es’ame i mfwete kal’e?”—Luka 2:45-50.

Nga Yesu mvutu zambi kavana kwa ngudi andi?— Mase mandi bazaya wo vo yandi wazolanga sambila muna nzo a Se diandi. (Nkunga 122:1) Nga Yesu diambi kavanga vava kavova vo muna tempelo a Nzambi i fulu kiantete bafwana kumvavila?— I bosi Maria wayindulanga dina kavova Yesu. Yesu aweyi kabadikilanga Yosefe ye Maria?— Nkand’a Nzambi uvovanga vo: “[Yesu] Okulumukini yau, wele kuna Nazarete; ubatumamene.” (Luka 2:51, 52) Adieyi tulenda longoka muna mbandu a Yesu?— Yeto mpe tufwete lemvokelanga mase meto.

Kansi, ke diakala dia sazu ko kwa Yesu mu lemvoka— kana nkutu kwa Se diandi di’ezulu.

Muna fuku wa vitila lufwa lwandi, Yesu walomba kwa Yave kana olenda soba ngindu Zandi muna dina Kazola vo kavanga. (Luka 22:42) Kansi Yesu walemvokela S’andi kana una vo ke diakala dia sazu ko. Nkand’a Nzambi uvovanga vo: “Olongokelo lemvo muna mpasi kamwene.” (Ayibere 5:8) Nga yeto mpe tulenda longoka songa lemvo, kana nkutu vava dikalanga diampasi mu vanga wo?—

[Mvovo Vana Yand’a lukaya]

Yuvu:

▪ Maria aweyi kakitukila se ngudi a Yesu? Yesu aweyi kakadila ye mase mole?

▪ Ekuma mase ma Yesu ke bazayila wo ko vo yandi kakala yau kumosi ko vava bavutuka?

▪ Yesu akweyi kazola vo mase mandi bamvavila?

▪ Adieyi olenda longoka muna mbandu a Yesu?

[Foto ina muna lukaya lwa 31]

Ekuma Yosefe ye Maria bafwana vavila ntete Yesu muna tempelo?