Tulenda Tomesa e Sambu Yeto

 1. Adieyi Yave wa Nzambi kelombanga kwa a sambidi andi vo bavanga? (Tala mpe e foto.)

KWA nani tufwete lombanga lufiaulwisu ye luludiku? Tuzeye e mvutu za kiuvu kiaki. Tulenda lomba lusadisu lwa Yava wa Nzambi muna sambu. Kadi yandi kibeni Yave okutuzayisanga vo twavanganga wo. Ozolele vo “twasambanga ntangwa zawonso.” (1 Tes. 5:17) Tulenda mpe kulomba lusadisu muna sambu, lutaninu yo kunlomba lusadisu muna mambu mawonso ma zingu kieto. (Nga. 3:5, 6) Wau vo Yave wa Nzambi imvani ambote, okutuzayisanga vo tulenda samba kwa yandi konso ntangwa tuzolele.

 2. Nkia mambu tubadika mu longi diadi?

² Tuyangalelanga e lau tuna diau dia samba. Kansi wau vo mambu mayingi tuna mau mu vanga, ezak’e ntangwa diampasi dikalanga mu vaula e ntangwa muna samba. Tulenda mpe mona o mfunu wa tomesa e sambu yeto. Dialufiaulwisu mu zaya vo tulenda solola lukasakeso ye luludiku muna Sono. Mu longi diadi, tubadika una e mbandu a Yesu ilenda kutusadisila muna vaulanga e ntangwa ya samba. Tubadika mpe mambu tanu malenda kutusadisa muna tomesa e sambu yeto.

 3. Adieyi Yesu kazaya mu kuma kia sambu?

³ Yesu wazaya wo vo e sambu yeto mfunu kikilu ina kwa Yave. Mvu miayingi vitila keza ova ntoto, Yesu wamonanga una Yave kavaninanga e mvutu za sambu ya selo yandi yakwikizi, akala ye akento. Kasikil’owu, Yesu wamona vava Yave kavana e mvutu za sambu ya Ana, Davidi, Eliya ye selo yankaka. (1 Sam. 1:10, 11, 20; 1 Nti. 19:4-6; Nku. 32:5) E kiaki i kuma Yesu kazayisila alongoki andi vo basambanga nkumbu miayingi ye ziku kiawonso.—Mat. 7:7-11.

 4. Nkia mambu tulenda longoka muna sambu ya Yesu?

⁴ Muna sambu kasambanga kwa Yave, Yesu wasisa mbandu ambote kwa alongoki andi. Ekolo kasamunanga e nsangu zambote, Yesu wasambanga nkumbu miayingi. Diavavanga vo kavaulanga e ntangwa muna samba kadi salu yayingi kakala yau ye wantu ayingi banzunga. (Maku 6:31, 45, 46) Wasikamanga mpe muna mene mene muna vaula e ntangwa yo kwenda va fulu kiayandi kaka muna samba. (Maku 1:35) Lumbu kimosi, Yesu wasamba fuku wawonso vitila kabaka e nzengo zamfunu. (Luka 6:12, 13) Wasamba mpe kwayingi muna fuku wavitila lufwa lwandi kimana kalenda lungisa e kani kayizila ova ntoto.—Mat. 26:39, 42, 44.

 5. Aweyi tulenda tanginina Yesu muna sambu?

⁵ E mbandu a Yesu itulongele vo kiakala nkia mambu tuna mau, tufwete vaulanga e ntangwa muna samba. Nze Yesu, tufwete vaulanga e ntangwa ya samba, kiakala muna mene, muna nkokela ye muna fuku. Avo tuvangi wo tusonga kwa Yave vo tuyangalelanga o lukau lwa samba tuna lwau. Mpangi una ye nkumbu Lynne, osungamenanga e kiese kamona vava kalongoka mu nkumbu antete oma ma sambu. Wavova vo: “Wau yalongoka vo ndenda samba kwa Yave konso ntangwa, ediadi dikunsadisanga mu badikila Yave se nkundi ye dikunfilanga mu tomesa e sambu yame.” Ke lukatikisu ko vo yeto awonso iwau tumonanga. Muna kuma kiaki, yambula twafimpa mambu tanu tulenda sadila muna sambu yeto.

 6. Landila e sono kia Lusengomono 4:10, 11, nkia diambu o Yave kafwana tambula?

⁶ Kembelelanga Yave. Muna mona-meso, Yoane wa ntumwa wamona akuluntu 24 kuna zulu ana basambilanga Yave. Bakembelela Nzambi wau baza wo vo yandi kaka “ofwene tambula nkembo yo zitu ye ngolo.” (Tanga Lusengomono 4:10, 11.) Kieleka, e mbasi zazi zakwikizi bena ye kuma yayingi yavana nkembo yo zitu kwa Yave. Wau vo bezinganga kumosi yo Nzambi kuna zulu batomene kunzaya. Bemonanga e fu yandi muna mana kevanganga. Ekolo bemonanga una Yave kevangilanga e mambu, ediadi dikubafilanga muna kunkembelela.—Yobi 38:4-7.

 7. Mu nkia mpila tulenda kembelela Yave?

⁷ Oyeto mpe tulenda kembelela Yave muna sambu yeto, tulenda wo vanga muna kunzayisanga mana tuzolanga muna yandi ye e kuma tuyangalelanga mo. Ekolo otanganga yo longoka e Bibila, vavanga bakula e fu ina Yave kesonganga, musungula ina otoma zolanga. (Yobi 37:23; Roma 11:33) I bosi, zayisa kwa Yave una omonanga mu kuma kia fu yayi. Tulenda mpe kembelela Yave kadi okutusadisanga yo sadisa mpe kintwadi kieto kia wan’angudi. Kadi o Yave okutulunga-lunganga yo kututanina.—1 Sam. 1:27; 2:1, 2.

 8. Nkia kuma tuna yau muna vutulanga matondo kwa Yave? (1 Tesalonika 5:18)

⁸ Vutulanga matondo kwa Yave. Tuvuidi kuma yayingi tufwete vutulwilanga matondo kwa Yave muna sambu. (Tanga 1 Tesalonika 5:18.) Tulenda vutulanga matondo mu kuma kia mambu mawonso mambote o Yave kevanganga, kadi o lukau lwawonso lwambote kwa yandi lutukanga. (Yak. 1:17) Kasikil’owu, tulenda songanga luyangalalu lweto muna lekwa yambote-mbote o Nzambi kavanga nze, ntoto, nsema, moyo eto, yitu, akundi ye vuvu kieto. Tuzolele mpe vutulanga matondo kwa Yave wau keyambulanga vo twakala akundi andi.

 9. Ekuma tufwete yimina e fu kia songanga luyangalalu kwa Yave?

⁹ Tufwete vanganga e ngolo muna badikanga e kuma tuvuidi muna vutulanga matondo kwa Yave. Tuzingila mu nza ina vo o wantu ke bevutulanga matondo ko. Nkumbu miayingi o wantu betokanenanga kaka una balenda vuila e lekwa ina bavuidi o mfunu vana fulu kia songa luyangalalu. Avo tuyimini e fu kiaki, e sambu yeto ikituka se ndomba. Muna lembi yambula vo e diambu diadi diavangama, tufwete kwamanana yima yo songa e fu kia luyangalalu muna mawonso o Yave kevanganga mu kuma kieto.—Luka 6:45.

10. Okala ye ngindu zasikila aweyi diasadisila mpangi mosi mu zizidila e mpasi? (Tala mpe e foto.)

¹⁰ E fu kia vutulanga matondo kilenda kutusadisa mu zizidila e mambu mampasi. Badika e nona kia mpangi ankento Kyung-sook, kina muna Eyingidilu dia 15 dia Yanuali, 2015. Wabakama kimbevo kia câncer. Wavova vo: “E diambu diadi diampasi kikilu diakala kwa mono. Yamona nze mono yavidisa e lekwa yawonso ye wonga kikilu yamonanga.” Nki kiasadisa mpangi Kyung-sook? Wavova vo, muna fuku wawonso vitila kaleka, wayendanga kuna terraço ya nzo andi yo samba mu nding’a ngolo muna vutula matondo kwa Nzambi muna mambu tanu mavangamene muna lumbu kiakina. Ediadi diakululanga e ntokani zandi yo songa o zola kwandi muna Yave. E nona kiandi kisongele vo Yave otaninanga e selo yandi muna ntangw’a mpasi. Mpangi Kyung-sook wabakula vo e nsambu tutambulanga zisundi e mpasi tunuananga zau. Nze mpangi Kyung-sook, oyeto mpe tuna ye kuma yayingi muna vutulanga matondo kwa Yave, kana nkutu vava tunuananga ye mambu mampasi. Osonga luyangalalu lweto kwa Yave muna sambu, dilenda kutusadisa mu zizidila e mambu mampasi yo lembi vidisa e kiese kieto.

11. Ekuma alongoki bavuilanga unkabu o mfunu vava Yesu kavutuka kuna zulu?

¹¹ Lombanga unkabu kwa Yave muna salu kia umbangi. Vitila o Yesu kavutuka kuna zulu, wasungamesa alongoki andi vo besila umbangi mu kuma kiandi muna “Yerusaleme, muna Yuda yawonso ye Samaria yakuna nsuk’a nza.” (Mav. 1:8; Luka 24:46-48) Vioka lumbu yakete, Afidi asambil’a Yuda bakanga Petelo yo Yoane wa ntumwa, babanata kuna Mbazi a Nkanu ampwena, babavumisa yo kubakanikina vo bayambula sila umbangi. (Mav. 4:18, 21) Adieyi Petelo yo Yoane bavanga?

12. Landila e sono kia Mavangu 4:29, 31, nkia diambu alongoki bavanga?

¹² Muna mvutu bavana kwa mfumu za nsambila a Yuda, Petelo yo Yoane bavova vo: “Avo diansongi vana ndose a Nzambi edi dia kunuwila ke mu Nzambi ko, nubaka e nzengo yeno kibeni. Kansi oyeto, ke tulendi yambula vova mana twamona yo wá ko.” (Mav. 4:19, 20) Vava Petelo yo Yoane bavaikiswa muna pelezo, alongoki basamba muna nding’angolo kwa Yave vo: “Sadisa ntaudi zaku bazindalala vovela diambu diaku kuna unkabu wawonso.” Yave wavana e mvutu za sambu yau.—Tanga Mavangu 4:29, 31.

13. Adieyi tulenda longoka muna nona kia mpangi Jin-hyuk?

¹³ Oyeto mpe tulenda tanginina e mbandu ya alongoki muna kwamanana samuna kana nkutu vava ayadi bekutusimanga vo twayambula sila umbangi. Badika e nona kia mpangi Jin-hyuk, ona wasiwa mu pelezo mu kuma kia lukwikilu lwandi. Muna pelezo, wavewa kiyekwa kia lunga-lunga abakami akaka ana bakala muna pelezo ya yau kaka, kansi bankanikina vo kavova kaka mambu mana bavuanga o mfunu, kalendi kubazayisa diambu ko mu kuma kia Bibila. O mpangi wasambanga muna lomba unkabu kimana kasila umbangi muna konso lau kakalanga diau. (Mav. 5:29) Mpangi Jin-hyuk wavova vo: “Yave wavana e mvutu za sambu yame muna kumpana unkabu ye ngangu yo yantika fila e longi dia Bibila mu miniti tanu muna mielo mia pelezo. I bosi, muna fuku yasonekanga nkanda yo vana mio kwa akwame abakami muna mene.” O yeto mpe tulenda kala ye ziku vo Yave okutusadisa muna lungisa e salu kieto kia umbangi una ufwene. Nze mpangi Jin-hyuk, tulenda samba muna lomba o unkabu ye ngangu.

14. Nki kilenda kutusadisa muna zizidila e mambu mampasi? (Nkunga 37:3, 5)

¹⁴ Lombanga lusadisu kwa Yave kimana walenda zizidila e mpasi. Ayingi mu yeto tunuananga ye mambu mampasi nze, fwilwa awana tuzolanga, diambu diampasi muna nzo, lubangamu yovo mambu mankaka. O mambu nze vuku ye vita mewokesanga diaka e mpasi zeto. Muna kuma kiaki, ziulanga o ntim’aku kwa Yave, unzayisanga una omonanga nze ngeye omokenanga yo nkundi yo kala ye ziku vo Yave “ovanga mambu muna wete diaku.”—Tanga Nkunga 37:3, 5.

15. Aweyi e sambu kikutusadisilanga mu ‘zindalala muna mpasi’? Yika e nona.

¹⁵ Okwamanana muna sambu dikutusadisanga mu ‘zindalala muna mpasi.’ (Roma 12:12) Yave ozeye mana asambidi andi benuananga mau, i sia vo, “owánga kazu kiau.” (Nku. 145:18, 19) Mpangi ankento Kristie una ye kimbuta kia 29 una vo mviti a nzila, omonanga vo e diambu diadi dialudi. Wabakama kimbevo kiampasi vana vau. Muna kuma kiaki, wayantika kendalala kwayingi. I bosi, o ngudi andi mpe wabakama kimbevo kilembi sasukanga. Mpangi Kristie wavova vo: “Isambanga kwayingi kwa Yave kimana kampana o nkuma mvuidi o mfunu konso lumbu. Ivanganga mawonso muna kala ye nkubika yambote ya mambu ma mwanda muna kwendanga muna tukutakanu yo kala ye longi dia mono kibeni. Mpangi Kristie wakudikila vo: “Osamba kukunsadisanga mu zizidila e mpasi. Ozaya vo Yave okalanga yame ntangwa zawonso, ditoma kunkasakesanga kikilu. Kana una vo e kimbevo kiame ke kiasasuka ko Yave owanga e sambu yame muna kumpana luvuvamu lwa ntima.” Kieleka, ke tuzolele vilakana ko vo “muna ntangw’a ntonta, Yave ozeye vuluza awana bekumvuminanga.”—2 Pet. 2:9.

16. Ekuma tuvuididi lusadisu lwa Yave o mfunu muna sunda e ntonta?

¹⁶ Lombanga lusadisu kwa Yave muna sunda e ntonta. Wau vo tu wantu alembi lunga, ntangwa zawonso tunuananga ye ntonta muna vanga edi diambi. Satana ovanganga mawonso kimana diakala diampasi kwa yeto muna sunda e ntonta. Imosi muna mpila kevangilanga wo, ifwasa e ngindu zeto muna mavangu ma zumba. E mavangu mama malenda yivisa e ngindu zeto ye kiwuntu kieto kiakati yo kutufila muna vola masumu ma mpwena.—Maku 7:21-23; Yak. 1:14, 15.

17. Aweyi tulenda zingila e ngwizani ye sambu yeto muna venga e ntonta? (Tala mpe e foto.)

¹⁷ Lusadisu lwa Yave tuvuidi o mfunu muna sunda e zolela yambi. Muna sambu kiandi, Yesu wavova vo: “Kutuyambula ko twabwa muna lutonto, kansi utuvuluza muna ndiona wambi.’” (Mat. 6:13) Yave ozolele kutusadisa, kansi tufwete lombanga lusadisu lwandi muna sambu. Tufwete zingilanga e ngwizani ye sambu yeto. Tufwete vanganga mpe mawonso muna lembi tanganga yovo winikina malongi ye ngindu zabendomoka za wantu a nza yayi ya Satana. (Nku. 97:10) Tufwete mpe zadisanga e ngindu zeto ye mambu mambote, muna tanganga yo longoka e Bibila, kwendanga muna tukutakanu ye muna salu kia umbangi, ediadi dikutusadisa mu tanina e ngindu zeto. Kadi Yave wasia nsilu vo ke yambula ko vo twatontwa e ntonta ina ke tulendi zizidila ko.—1 Kor. 10:12, 13.

18. Muna diambu ditadidi sambu, adieyi yeto awonso tufwete vanganga?

¹⁸ Konso muntu mu yeto kafwete sambanga kwayingi muna tatidila e kwikizi kiandi muna Yave musungula mu kolo kiaki kiampasi. Muna kuma kiaki, vaulanga e ntangwa muna sambanga lumbu yawonso. Yave okutulombanga vo ‘twaziulanga e ntima mieto kwa yandi’ muna sambu. (Nku. 62:8) Kembelelanga yo vutulanga matondo kwa Yave muna mawonso kevanganga. Unlombanga lusadisu kimana wakala ye unkabu muna salu kia umbangi. Undodokelanga kimana kasadisa wasunda konso mpasi ye konso ntonta owanana zau. Kuyambula ko vo diambu yovo muntu kakakidila muna sambanga kwa Yave lumbu yawonso. Kansi, aweyi Yave kevaninanga e mvutu za sambu yeto? Tubadika e kiuvu kiaki kiamfunu muna longi dilanda.