Yekeka Ntokani Zaku Zawonso kwa Yave

1, 2. (a) Ekuma tukadilanga ye ntokani? (Tala fwaniswa ova ntandu.) (b) Nkia mambu tuvovela mu longi diadi?

O UNU, Satana “ozietanga nze nkosi ankwiti, kenda vavi ndiona kevempola.” (1 Petelo 5:8; Lusengomono 12:17) Muna kuma kiaki, e zingu kia wantu kiazala ye ntokani. Kana nkutu selo ya Nzambi bewanananga ye mambu mampasi. E selo ya Nzambi mpe kuna nz’ankulu bawanana ye mambu mampansi. Kasikil’owu, Nkand’a Nzambi uvovanga vo Davidi wa Ntinu ezak’e ntangwa watelamwanga o moyo. (Nkunga 13:2) Paulu wa ntumwa ‘watelamw’a moyo mu kuma kia nkutakani zawonso.’ (2 Korinto 11:28) Kansi, adieyi tulenda vanga vava tukalanga ye ntokani zayingi?

² O Se dieto dianzodi wasadisa selo yandi kuna nz’ankulu mu vevoka muna ntokani. I diau mpe kazolele vanga kwa yeto o unu. Nkand’a Nzambi ukutuvovesanga vo: “Nuyekeka ntokani zeno zawonso kwa yandi, kadi mfunu kekunuvuanga.” (1 Petelo 5:7) Aweyi olenda wo vangila? Mambu yá tuvovela olemba vanga: (1) samba, (2) tanga yo badika Diambu dia Nzambi, (3) yambula vo mwand’avelela a Yave wasadisa ye (4) mokena yo muntu ona obundanga e vuvu yo kunzayisa una omonanga. Ekolo tubadika mambu yá mama, vava zaya dina olenda tomesa.

 3. Aweyi olenda ‘yekekela zitu diaku kwa Yave’?

³ O samba ye ziku kiawonso i mpila yantete tulenda yekekela e zitu dieto kwa Yave. Vava okalanga ye ntokani, o Se diaku dianzodi una kuna zulu ozolele vo wanzayisa mawonso mekutokanesanga. Davidi wa ntozi ankunga wadodokela Yave vo: “Tamba sambu kiame o matu, e Nzambi.” Muna nkunga wau mosi, Davidi wavova mpe vo: “Yekek’ezitu diaku kwa Yave, yandi okusikina.” (Nkunga 55:1, 22) Avo ovangidi mawonso olenda mu singika diambu onuananga diau, diambu diankaka dilenda kusadisa i samba kwa Yave ye nsi a ntima wawonso, vana fulu kia kwamanana tokana. Aweyi e sambu kisadisilanga? Aweyi kilenda kutusadisila mu lembi tokana kwayingi?—Nkunga 94:18, 19.

 4. Vava tukalanga ye ntokani, ekuma sambu kinina o mfunu?

⁴ Tanga Filipi 4:6, 7. Aweyi Yave kevaninanga e mvutu za sambu yeto? Olenda kutusadisa mu vuvika ntima yo venga e ngindu zambi. Vana fulu kia tokana yo mona wonga, Nzambi okutusadisa mu kala yo luvuvamu lwa ntima. Ayingi muna mpangi zeto bemonanga luvuvamu lwalu. Ngeye mpe olenda vua luvuvamu lwalu. O “luvuvamu lwa Nzambi” lulenda kusadisa mu zizidila konso mpasi. Olenda bunda e vuvu muna nsilu owu wa Yave: “Kuvengozioka ko, kadi omono i Nzambi aku; ikuvamisa; elo, ikusadisa.”—Yesaya 41:10.

 5. Aweyi Diambu dia Nzambi dilenda kusadisila mu kala ye luvuvamu lwa ntima?

⁵ E mpila yazole tulenda vuila luvuvamu lwa ntima i tanganga yo badika e sono ya Nkand’a Nzambi. Ekuma dinina o mfunu? Bibila i Diambu dia Nzambi. O nkanda wau uvuidi malongi mambote matuka kwa Mvangi eto. Vava okalanga ye nteleko a moyo, olenda yindula una Nzambi kebadikilanga mambu yo badika una luludiku lwandi lulenda kukumikina. Ediadi dilenda kusadisa mu sunda, kulula yovo venga e ntokani. Yave wavova vo o kala ye fu kia tanga Diambu diandi, divananga muntu ‘unkabu yo nkuma,’ vana fulu kia ‘vumiswa yo mona wonga.’—Yosua 1:7-9.

 6. Aweyi e mvovo mia Yesu milenda kutusadisila?

⁶ Muna Diambu dia Nzambi tutanganga una Yesu kamokenenanga yo wantu. Bazolanga wá malongi mandi kadi e mvovo miandi miabafiaulwisanga yo kubakumika, musungula awana bakala batovoka yovo bakendalala. (Tanga Matai 11:28-30.) Yesu watokanenanga wete dia wantu ankaka. (Maku 6:30-32) Nze una Yesu kasila o nsilu vo osadisa antumwa ana bakangalanga yandi, okutusadisa mpe o unu. Ke divavanga ko vo twakala fulu kimosi yo Yesu muna vua lusadisu lwandi. Wau vo yandi i Ntinu eto kuna zulu, Yesu okwamanana kutusonga o zola. Muna kuma kiaki, vava okalanga yo nteleko a moyo, kala ye ziku vo Yesu okala yaku ye okusadisa muna ntangwa ifwene. Yesu okutuvananga vuvu yo unkabu ukutusadisanga mu sunda konso ntokani.—Ayibere 2:17, 18; 4:16.

 7. Aweyi o mwand’avelela a Nzambi ukutusadisilanga?

⁷ Yesu watusia nsilu vo Se dieto okutuvana mwand’avelela avo tulombele wo. (Luka 11:10-13) Aweyi e diambu diadi diatatu dilenda kutusadisila mu kulula nteleko a moyo? O mwand’avelela wa Nzambi yovo nkum’andi, ukutusadisanga mu kala ye fu yambote ina kena yau o Nzambi eto wa mpungu-ngolo. (Kolosai 3:10) Muna Nkand’a Nzambi, e fu yayi iyikilwanga vo “mbongo a mwanda.” (Taga Ngalatia 5:22, 23.) Avo tusongele fu yayi yambote, tukala ye ngwizani ambote ye akaka yo venga mambu malenda kututwasila ntokani. Yambula twazaya una e mbongo a mwanda ilenda kutusadisila vava tukalanga mu mpasi.

8-12. Aweyi e mbongo a mwand’avelela a Nzambi ilenda kusadisila?

⁸ “Zola, kiese, luvuvamu.”Avo tuzitisi akaka, dikutusadisa mu lembi tokana kwayingi. Mu nkia mpila? Vava tusonganga zola, walakazi yo luzitu, tulenda venga ngindu zambi zilenda kutufila mu funga makasi yo kututwasila lukendalalu yo nteleko a moyo. Ediadi dikutusadisa mu zingila mu luvuvamu ye akaka.—Roma 12:10.

⁹ “Luzindalalu, walakazi, wete.” Nkand’a Nzambi uvovanga vo: “Nusonga ngemba kwa muntu yo nkw’andi, nukala yo walakazi, nuloloka muntu yo nkw’andi kuna mvevo.” (Efeso 4:32) Avo tulende luludiku lwalu, tukala ye ngwizani ambote ye akaka yo venga mambu malenda kututwasila nteleko a moyo. Vana ntandu, diasazu dikala mu singika e ntantani tukalanga zau mu kuma kia usumuki weto.

¹⁰ “Lukwikilu.” O unu, nkumbu miayingi tutokananga mu kuma kia nzimbu ye lekwa yankaka. (Ngana 18:11) Aweyi tulenda vengela e ntokani za mpila yayi? Tufwete landa e longi dia Paulu wa ntumwa dia ‘yangalelanga ina tuna yau.’ O kala ye lukwikilu lwasikila muna Yave dikutusadisa mu kala ye vuvu vo okutuvana ina tuvuidi o mfunu. Yave watusia nsilu vo: “Kikuyambula nkutu ko, ngatu kubembola.” E kiaki i kuma tulenda vovela nze Paulu wa ntumwa vo: “Yave i nsadisi ame; kimona wonga ko. O muntu adieyi kalenda kumpanga?”—Ayibere 13:5, 6.

¹¹ “Lulembamu, volo.” Yindula e kuma dinina diangangu mu songa lulembamu ye volo. E fu yayi ikusadisa mu lembi vanga yovo vova diambu dilenda kutwasila ntokani. Nluta miayingi ovua avo ovengele “ndudi, makasi, nganzi, ntantani ye mvovo mia lutiangu.”—Efeso 4:31.

¹² Lulembamu mfunu lwina muna bunda e vuvu muna “koko kwa nkuma kwa Nzambi” yo ‘yekeka ntokani zaku zawonso kwa yandi.’ (1 Petelo 5:6, 7) Avo okedi yo lulembamu, Yave okusadisa yo kulunga-lunga. O zaya mana olenda vanga ye mana kulendi vanga ko, dikusadisa mu lembi kuyibunda e vuvu kiasaka. Kukala ye ntokani zayingi ko kadi kwa Nzambi obunda e vuvu.—Mika 6:8.

13. Adieyi Yesu kazola vova vava kavova vo: “Ke nutokani ko”?

¹³ Muna Matai 6:34 (tanga), Yesu watuvana luludiku vo: “Ke nutokani ko.” O luludiku lwalu lulenda moneka vo lwampasi kwa yeto muna lo lemvokela. Kansi, adieyi Yesu kazola vova? Tulongokele kala vo Davidi yo Paulu batelemwanga o moyo ezak’e ntangwa. Yesu kazola vova ko vo ndiona osadilanga Nzambi, kalendi diaka tokana ko. Yesu alongoki andi kasadisa mu bakula vo tokana kondwa kuma yovo tokana kwayingi, ke kufokolanga mpasi za muntu ko. Konso lumbu tunuananga ye mambu mampasi. Muna kuma kiaki, o Nkristu kafwete kuyikudikila ntokani zankaka ko muna yindulanga mana mavioka kala yovo mana ke mavangamene ko. Aweyi luludiku lwa Yesu lulenda kusadisila mu kulula e ntokani?

14. Nze Davidi, aweyi olenda kululwila e ntokani?

¹⁴ Ezak’e ntangwa, wantu betokananga mu kuma kia mbi bavanga muna mvu miavioka. Bekuyitumbanga mu kuma kia mana bavanga, kana nkutu vo mvu miayingi miviokele kala. Ezak’e ntangwa Davidi wa Ntinu watokananga kwayingi mu kuma kia masumu kavanga. Wavova vo: “Nkungidi muna kungu kia ntim’ame.” (Nkunga 38:3, 4, 8, 18) Vava katokananga, Davidi diambu dimosi diangangu kavanganga. Wabundanga e vuvu muna nkenda ye luloloko lwa Yave. Davidi kiese kiayingi kamonanga mu zaya vo Nzambi wanloloka.—Tanga Nkunga 32:1-3, 5.

15. (a) Adieyi diaka tulenda longoka muna mbandu a Davidi? (b) Adieyi olenda vanga muna kulula e ntokani? (Tala e babu “Mana Olenda Vanga mu Kulula Ntokani.”)

¹⁵ Ezak’e ntangwa, olenda tokana mu kuma kia mambu mevangamanga o unu. Kasikil’owu, vava Davidi kasoneka o Nkunga 55, wonga kakala wau wa vondwa. (Nkunga 55, 2-5) Kansi, kayambula ko vo nteleko a moyo wakulula e vuvu kiandi muna Yave. Davidi wadodokela Yave kimana kansadisa muna mpasi zandi, kansi wazaya wo vo diamfunu mpe mu lembi zinga moko. (2 Samuele 15:30-34) Olenda longoka diambu muna mbandu a Davidi. Vana fulu kia yambula vo e ntokani zasunda, vanga dina olenda mu singika e diambu yo kala ye vuvu vo Yave okusadisa.

16. Aweyi e nsas’a nkumbu a Nzambi ilenda kumikina lukwikilu lwaku?

¹⁶ Ezak’e ntangwa, Nkristu olenda telemwa moyo mu kuma kia mambu malenda kumbwila kuna sentu. Kansi, ke dina mfunu ko mu tokanena mambu mana ke mavangamene ko. Ekuma? E kuma kadi nkumbu miayingi, e mambu mambi tuyindulanga ke mevangamenanga nze una tuyindulwilanga mo ko. Sungamena mpe vo ke vena diambu ko dina Nzambi kalendi sunda ko. E nkumbu andi ina ye nsasa vo “On’okadisanga.” (Luvaiku 3:14) Muna kuma kiaki, ke dina mfunu ko mu tokana mu kuma kia mambu mebwa kuna sentu, kadi e nkumbu a Nzambi isonganga vo mawonso kakana mu kuma kia wantu lungana melungana. Kala ye ziku vo Nzambi osambula selo yandi yakwikizi yo kubasadisa mu kulula o nteleko a moyo mu kuma kia mambu mavioka, mana mevangamanga owau ye mana mesinga bwa kuna sentu.

17, 18. Aweyi e mbokena zambote zilenda kusadisila vava okalanga ye ntokani?

¹⁷ E mpila ya nyá olenda bakila lusadisu vava okalanga yo ntokani, i kalanga ye mbokena zambote yo muntu ona obundanga e vuvu. Nkaz’aku, nkundi yovo nkuluntu muna nkutakani olenda kusadisa mu toma bakula e diambu onuananga diau. Nkand’a Nzambi uvovanga vo: “E swengeti muna ntim’a muntu kivumbika wo: E diambu diambote dimwesa wo e kiese.” (Ngana 12:25) Nkand’a Nzambi uvovanga mpe vo: “Vana valembi vangwa mfulu, tukanu twafunga, mun’aludiki engi i tusikidila.”—Ngana 15:22.

¹⁸ Tukutakanu tweto tukutusadisanga mu kulula o nteleko a moyo. Vava okalanga muna tukutakanu konso lumingu, oviokesanga ntangwa vamosi ye mpangi zaku ana bekuvuanga o mfunu yo kukasakesa. (Ayibere 10:24, 25) O ‘lukasakeso’ lwalu lukukumika yo kusadisa mu sunda konso ntokani.—Roma 1:12.

19. Ekuma olenda kadila ye ziku vo e ngwizani aku yo Nzambi ikukumika?

¹⁹ Nkuluntu mosi kuna Canadá walongoka o mfunu wa yekeka e ntokani zandi kwa Yave. Salu kiampasi kikilu kesalanga kia longa wan’a sikola. Kimbevo kiangolo mpe kena kiau kikuntwasilanga mpasi zayingi. Adieyi dikumvananga o nkuma? Ediantete, osianga ngolo mu kumika e ngwizani andi yo Yave. Akundi akieleka bekunsadisanga mpe muna ntangw’a mpasi. Ozayisanga mpe ngindu zandi kwa nkaz’andi. Vana ntandu, akwandi akuluntu yo nkengi a zunga bekunsadisanga mu yekeka e mpasi zandi kwa Yave. Dotolo dimosi wasadisa mpe mpangi ndioyo mu bakula e kimbevo kiandi. O mpangi wavanga nsobani muna mpila kasadilanga ntangwa, ovaulanga e ntangwa ya vunda yo nana e nitu. Malembe-malembe, walongoka una kalenda zizidila e mpasi zandi. Avo vabuidi diambu dina vo kazeye dina kafwete vanga ko, obundanga e vuvu muna Yave kimana kansadisa.

20. (a) Aweyi tulenda yekekela e ntokani zeto kwa Nzambi? (b) Adieyi tulongoka muna longi dilanda?

²⁰ Mu longi diadi, tulongokele o mfunu wa yekeka e ntokani zeto kwa Nzambi muna sambanga kwa Yave yo tanganga Diambu diandi yo badika mana tutanganga. Tulongokele mpe o mfunu wa yambula vo mwand’avelela a Yave watusadisa, mokena yo muntu ona tubundanga e vuvu yo kalanga muna tukutakanu twa Akristu. Muna longi dilanda, tulongoka una Yave kekutusadisilanga wau katuvana e vuvu vo okutusenda kuna sentu.—Ayibere 11:6.