17, 18. (a) Kuna lubantiku o Yesaya aweyi kabadika mu kuma kia mona-meso? (b) O Yave aweyi kasadila nserafi mu kasakesa Yesaya ye nkia nsasa dina evangu dia nserafi?

¹⁷ Kansi, o vauka kwa Nzambi nga kufwete kutuyindulwisa vo twakeva kwayingi kuna kwa yandi? Dialudi vo, i wau. Muna vova e ludi twakeva kikilu—vana vena Yave. Ediadi nga difwete kutuvambula yo yandi? Badika una kamona o Yesaya vava kawa aserafi bayikanga o vauka kwa Yave. “Mpovele vo, Tâtu kwa mono! nsukidi, kadi i nkwa befo yafunzuka, nkalanga muna nkangu a befo yafunzuka: kadi meso mame mamwene Ntinu wa Yave a vu.” (Yesaya 6:5) Elo, o vauka kwa Yave kwalembi suka kwa sungamesa Yesaya vo oyandi nsumuki kikilu walembi lunga. Kuna lubantiku, o muntu ndioyo wa kwikizi wakendalala. Kansi, o Yave kanyambula ko yo lukendalalu lwalu.

¹⁸ Vana vau o ngunza wakasakeswa kwa nserafi. Mu nkia mpila? O nserafi ndioyo otimukini kun’eziku, obongele ekala dia tiya oviakese dio muna nu’a Yesaya. Ediadi nanga diampasi ka lukasakeso ko. Kansi, sungamena dio vo ekiaki mona-meso, kina ye nsasa. O Yesaya wa Nyuda akwikizi, wazaya wo vo lumbu yawonso yimenga yakelwanga van’eziku yalubakanisu lwa masumu muna tempelo. O nserafi ye zola kwawonso wasungamesa ngunza vo kana una vo nsumuki ye “befo yafunzuka,” olenda kala wavelela vana ndose a Nzambi.a Kana una vo mu tezo—o Yave wayangalela badikila nsumuki ndioyo se muntu avelela.—Yesaya 6:6, 7.