Muna ngonde a Oktoba ya mvu 29 wa tandu kia Kristu, Yesu wayenda vubwa muna Nkoko a Yodani. Muna Nkand’a Nzambi tutanganga dina diabwa: “O Yesu, vava kavubilu, katombok’aka muna maza, ezulu dinziukìdi, omwene o mwand’a Nzambi okulumukini nga eyembe, yo kwiza vana yandi; ndinga itukidi kun’ezulu, oku vo, Ndioyu i Mwan’ame anzolwa, ona nyangalelanga.”a (Matai 3:​16, 17) Mvovo miami mia Yave mitoma songang’e mpil’e Se kena. Tala mambu matatu kavova o Yave kwa Mwan’andi.

Diantete, vava kavova vo “Ndioyu i Mwan’ame,” o Yave edi kavova, ‘Ikitundidikanga wau vo i S’aku.’ O wana bevavanga vo se diau kabazaya yo kubavwa o mfunu. O se una ye umbakuzi osianga e sungididi kia lungisa e nsatu zazi za wan’andi. Wana betoma yangalalanga vava bezayanga vo mfunu bena muna nzo. Kana una vo mbuta kakala, tulenda bakula una kamona o Yesu vava kawa e mvovo mi’e S’andi vo mfunu kekumvwanga!

Diazole, Yave wasonga zola kwandi kwa Yesu vava kanyikila vo Mwan’ame “anzolwa.” Muna mvovo miakía, o Se edi kavova, ‘Yitoma kuzolanga.’ E se diambote ovovesanga wan’andi vo otoma kubazolanga. E mvovo miami zola kwakieleka misonganga, milenda sadisa wana mu nungunuka una ufwene. Ekwe kiese kamona o Yesu vava kawa e mvovo mi’e S’andi vo otoma kunzolanga!

Diatatu, o mvovo “omu ngeye i ngyangalelanga” misongang’e dienga dia Yave kwa Mwan’andi. Muna mvovo miakía, o Se edi kavova, ‘Mwan’ame, nyangalele edi ovangidi.’ E se dianzodi ovavanga elau dia sanisina wan’andi kimana bazaya vo oyangalelanga dina diambote bavangidi yovo bavovele. O wana bekalanga yo unkabu yo kumama vava betondwanga kwa mase. Ekwe lukasakeso kabaka o Yesu vava kawa vo e S’andi wanyangalelanga!