Yoane Ozolele Zaya Kana Vo Yesu I Masia

Yoane wa Mvubi, tezo kia mvu amvimba se kena mu pelezo. Kansi, owidi e nsangu za masivi ma Yesu. Yindula una Yoane kamwene vava alongoki andi bamvovese vo Yesu ofutumwini mwan’a toko wa nkento wafwila yakala kuna Naini. Kansi Yoane ozolele wá mawonso mama muna nu’a Yesu. Dianu vo, Yoane otumini alongoki andi wole kwa Yesu. Nki bekwenda vanga? Benda yuvula Yesu vo: “Ongeye i Ndiona okwiza, yovo wankaka tuvingila?”—Luka 7:19.

E kiuvu kiaki kia sivi kikilu. Yoane selo kia Nzambi. Vava kavuba Yesu se vioka mvu miole, Yoane wamona mwand’a Nzambi wakulumukina Yesu yo wá nding’a Nzambi. Ke tuna ye ziku ko kilenda kutufila mu yindula vo lukwikilu lwandi luyoyele. Kele vo i wau, o Yesu kadi sanisina Yoane ko, wauna kavangidi owau. Avo Yoane kena yo lukatikisu ko, ekuma kayuvulwidi e diambu diadi mu kuma kia Yesu?

Nanga Yoane ozolele vo Yesu yandi kibeni kanzayisa kana vo yandi i Masia. Ediadi dikumika Yoane ekolo kena wakendalala muna pelezo. E kiuvu kia Yoane nanga nsasa ankaka kina. Otomene zaya ungunza wa Nkand’a Nzambi usonganga vo Kuswa kia Nzambi okala se ntinu ye mvuluzi. Kansi, se ngonde zayingi ziviokele kala tuka Yesu kavubilwa, Yoane wakinu mu pelezo. Dianu vo, Yoane oyuvuidi kana vo wankaka okwiza vinga vana fulu kia Yesu. I sia vo, ndiona okwiza lungisa mawonso masakulwa mu kuma kia Masia.

Vana fulu kia vovesa kaka alongoki a Yoane vo, ‘Omono i Ndiona okwiza,’ Yesu osongele e ziku vo Nzambi wamvana e wisa kia wuka wantu ayingi bena ye yimbevo ya mpila mu mpila. I bosi Yesu ovovese alongoki vo: “Nwenda samuna kwa Yoane mana nuwidi ye mana numwene: Ampofo bamwene, mbevo za malu zidiete, akwa wazi baveleleso, afwa-matu bawidi, mafwa mafulukidi ye asukami besamunwinwanga e nsangu zambote.”—Matai 11:4, 5.

E kiuvu kia Yoane kisongele vo Yesu ovanga mayingi vioka mana kevanganga owau. Nanga ovaikisa Yoane muna pelezo. Kansi, Yesu ovovese Yoane kalembi yindula vo masivi mayingi diaka kevanga.

Alongoki a Yoane vava bele, Yesu ovovese nkangu vo Yoane osundidi ngunza. Yandi i “nkunzi” a Yave ona wasakulwa muna Malaki 3:1. Yandi mpe i Eleya wa ngunza, nze una wasakulwa muna Malaki 4:5, 6. Yesu ovovele vo: “Kieleka inuvovese wo vo, vana vena awana bawutwa kw’akento, ke vena mosi ko osundidi Yoane wa Mvubi o nene, kansi ndiona wandwelo muna Kintinu kia zulu unsundidi o nene.”—Matai 11:11.

Wau kavovevele vo ndiona wandwelo muna Kintinu kia zulu osundidi Yoane o nene, Yesu edi kazolele vova vo Yoane ke yala muna Kintinu kia zulu ko. Yoane wakubikila Yesu e nzila, kansi wafwa vitila Yesu kaziula e nzil’a zulu. (Ayibere 10:19, 20) Ozevo, Yoane i ngunz’a Nzambi wa nkwa kwikizi, okala kumosi yo wantu beyalwa kwa Kintinu kia Nzambi ova ntoto.