Yesu Otumbidi Mbandu Yakondwa Lukwikilu

Yesu otoma zitisanga Yoane wa Mvubi, kansi aweyi wantu ankaka bebadikilanga Yoane? Yesu ovovele vo: ‘Mbandu yayi ina nze aleke bavuende vana zandu bebokanga kwa akw’au, oku vo: ‘Tunusikidi matutu, yeno ke nukini; tunubongele mbembo, yeno kenuyibundi ye dilu.”—Matai 11:16, 17.

Adieyi Yesu kazolele vova? Yandi kibeni osasidi vo: “Yoane wizidi, yandi kadie ngatu nua, wantu bavovele vo, ‘Nkuya kena wau.’ Mwan’a muntu wizidi, odidi, onuini, kansi wantu bavovele vo, ‘Tala o nkwa loko dia madia ye nduvu a vinyu, nkundi wa avakulwisi a mpaku ye asumuki.’” (Matai 11:18, 19) Wau vo Mvambuki, Yoane zingu kiavevoka kakala kiau. Kanuanga vinyu ko, kansi e mbandu yayi bavovele vo nkuya kena wau. (Ntalu 6:2, 3; Luka 1:15) Kuna diak’e sambu, e zingu kia Yesu kiafwanana ye zingu kia wantu awonso. Odianga yo nua lembi viokesa tezo, kansi, banyikidi vo nkwa loko ye nduvu a vinyu. Diampasi kikilu mu yangidika nkangu wau.

Yesu otezanese e tandu kiaki ye aleke ke bazolele kina ko ekolo akwau besikanga matutu vana zandu, ngatu dila ekolo akaka bebonganga e mbembo. Yesu ovovele vo: “Ngangu zilungisilu muna mavangu mandi.” (Matai 11:16, 19) Kieleka, e “mavangu” ma Yoane yo Yesu mesonganga vo mambu mana o wantu bavovele mu kuma kiau maluvunu kwandi.

Vava Yesu katumbidi e mbandu yayi yakondwa lukwikilu, otumbidi mpe mbanz’a Korazi, Betesaida ye Kafanau, kuna kavangila mavangu ma nkuma. Yesu ovovele vo, kele vo kavangila masivi mama muna mbanz’a Fenisia, Turo ye Sidone o nkangu a mbanza zazi wadi vilukw’e ntima. Oyikidi mpe Kafanau, mbanza ketoma sadilanga e salu kiandi mu kolo kiayingi. Kana nkutu mu mbanza yayi, ndonga ke betambulwilanga nsangu zambote ko. Yesu ovovele mu kuma kia mbanza yayi vo: ‘Muna Lumbu kia Lufundisu, nuvewa tumbu kisundidi kia esi Sodomo.’—Matai 11:24.

I bosi, Yesu okembelele Se diandi, ona wasweka tusâlu twa mwanda “kwa akwa ngangu ye alungaladi,” kansi wasengomona to kwa yingiana-ngiana. (Matai 11:25) Mu kuma kiaki, ovene e mboka ya kiese kwa wantu a mpila yayi, oku vo: “Nwiza kwa mono, yeno awonso nufuntukanga yo bimuka yo mazitu, ikunuvundisa. Nuvuata vangu kiame yo longwa kwa mono, kadi i nlembami yo ntim’anleka, nusolola vundu kia mioyo mieno. Kadi vangu kiame kiambote, e natu diame diavevoka.”—Matai 11:28-30.

Aweyi Yesu kevuvikilanga wantu? Afidi a nsambila bebangikanga o nkangu muna kubakomekena ulolo wa nsiku miampasi, nze nsiku wa lumbu kia Vundu. Kansi, Yesu ubavuvikidi muna kubalonga e ludi kia Nzambi, kia kondwa nsiku miampasi. Osongele mpe e nzila a luvevoko kw’awana bebundunwanga kwa ayadi, y’awana bebimukanga ye zitu dia sumu. Yesu ubasongele una masumu mau malenda lolokelwa ye una balenda kadila mu luvuvamu yo Nzambi.

Awonso ana betambulwilanga e vangu kia Yesu balenda kuyiyekola kwa Nzambi yo sadila Se dieto wina kuna zulu, wa nkwa nkenda yo walakazi. Ke diampasi ko mu vanga wo, kadi nkanikinu mia Nzambi ke miampasi ko.—1 Yoane 5:3.