Nki i Kintinu kia Nzambi?

E Kintinu kia Nzambi i mbut’a diambu diyikwanga muna Bibila. Yave osadila Kintinu kiaki mu lungisa e kani diandi dia kitula o ntoto se Paradiso. Nki i Kintinu kia Nzambi? Aweyi tuzayidi wo vo mu yala se kina? Nkia mambu kivangidi kala? Nkia mambu kivanga kuna sentu? E longi diadi ye malongi mole melanda mevana e mvutu za yuvu yayi.

1. Nki i Kintinu kia Nzambi? Nani i Ntinu a Kintinu kiaki?

E Kintinu i luyalu lwasikidiswa kwa Yave wa Nzambi. Yesu Kristu i Ntinu oyalanga tuka kuna zulu. (Matai 4:17; Yoane 18:36) Bibila kivovanga mu kuma kia Yesu vo: “Okala se Ntinu . . . yakwele mvu.” (Luka 1:32, 33) Wau vo Yesu i Ntinu a Kintinu kia Nzambi, oyala e nza yawonso.

2. Aki nani beyala kumosi yo Yesu?

Yesu keyala yandi mosi ko. Wantu betuka ‘muna makanda mawonso ye ndinga ye nkangu ye zula, . . . beyala e nza.’ (Lusengomono 5:9, 10) Wantu kwa beyala kumosi yo Yesu? Tuka Yesu kayizila ova ntoto, wantu ayingi bekitukanga alandi andi. Kansi, 144.000 ma wantu kaka beyala kumosi yo Yesu kuna zulu. (Tanga Lusengomono 14:1-4.) Akristu akaka i nkangu uyalwa kwa Kintinu kiaki.—Nkunga 37:29.

3. E Kintinu kia Nzambi, aweyi kisundidi tuyalu twa wantu?

Kana nkutu vava ayadi a nza betezanga vanga e mambu mambote, ke belendanga vanga mawonso bazolele ko, kadi ke bena yo nkuma ko wavanga wo. Avo bakatwilu, awana bevinganga vana fulu yau, ezak’e ntangwa ke betokanenanga wete dia nkangu ko. Kansi, ke vena muntu ko ovinga vana fulu kia Yesu wa Ntinu a Kintinu kia Nzambi. O Nzambi “otongeka kintinu kina ke kifwaswa ko.” (Daniele 2:44) Yesu oyala e nza yawonso, kesia mpambula ko. Yesu nkwa zola, nkenda yo unsongi, olonga nkangu andi basongaziananga o zola, nkenda ye bakala akwa unsongi.—Tanga Yesaya 11:9.

4. Luyalu lwa nkuma luyala e nza yawonso

E wisa kia Yesu Kristu ke kilendi tezaneswa ko ye wisa kia konso nyadi muna lusansu lwa wantu. Tanga Matai 28:18, i bosi, vana e mvutu za kiuvu eki:

• E wisa kia Yesu, aweyi kisundidi e wisa kia konso nyadi mu nza?

Nkumbu miayingi tuyalu twa wantu tusobwanga ye konso nyadi nsi mosi kaka keyalanga. Adieyi tuvova mu kuma kia Kintinu kia Nzambi? Tanga Daniele 7:14, i bosi, vana e mvutu za yuvu eyi:

• Ekuma dinina diakiese mu zaya vo Kintinu kia Nzambi “ke kifwaswa ko”?

• Ekuma dinina diakiese mu zaya vo Kintinu kiaki kiyala e nza yawonso?

5. Kintinu kia Nzambi kivinga vana fulu kia tuyalu twa wantu

Ekuma Kintinu kia Nzambi kivingila vana fulu kia tuyalu twa wantu? Tala e VIDEO, i bosi, vana e mvutu za kiuvu kilende.

VIDEO: Nki i Kintinu kia Nzambi?—Findambu Kaka (1:41)

• Nkia mfwilu ayadi a nza betwasanga?

Tanga Kimpovi 8:9, i bosi, vana e mvutu za yuvu eyi:

• Aweyi omwene wau ozeye vo e Kintinu kia Nzambi kivinga vana fulu kia tuyalu twa wantu? Ekuma?

6. Awana beyala muna Kintinu kia Nzambi bekutubakula

Wau vo Yesu wa Ntinu eto wazinga kala ova ntoto se muntu, olenda “bakula lutovoko lweto.” (Ayibere 4:15) Akala ye akento akwa kwikizi, i sia vo, 144.000 ana beyala kumosi yo Yesu, besolwanga kwa Yave “muna makanda mawonso ye ndinga ye nkangu ye zula.”—Lusengomono 5:9.

• Nga dialufiaulwisu kwa ngeye mu zaya vo Yesu ye awana keyala yau bazeye mpasi zeto ye una tumonanga? Ekuma?

7. E nsiku mia Kintinu kia Nzambi misundidi o wete

Ayadi a nza besikidisanga e nsiku mina beyindulanga vo milenda twasa nluta yo tanina nkangu. Kintinu kia Nzambi mpe kina ye nsiku mina o nkangu andi bafwete lemvokela. Tanga 1 Korinto 6:9-11, i bosi, vana e mvutu za yuvu eyi:

• Aweyi obenze ukala e nza vava wantu awonso belemvokela e nsiku mia Nzambi?a

• Muna ngindu zaku, nga Yave una yo nswa walomba kwa nkangu uyalwa kwa Kintinu kiandi bazitisanga e nsiku miami? Ekuma?

• Nkia diambu disonganga vo awana ke belemvokelanga nsiku miami ko balenda soba?—Tala e tini kia 11.

MAMBU MASINA MA LONGI DIADI

Kintinu kia Nzambi i luyalu lwakieleka luna kuna zulu, olu luyala e nza yawonso.

Nkia Mambu Olongokele?

• Aki nani beyala muna Kintinu kia Nzambi?

• Aweyi Kintinu kia Nzambi kisundidi konso luyalu lwa wantu?

• Nkia diambu Yave kelombanga kwa nkangu uyalwa kwa Kintinu kiandi?

TALA MPE OMA MALENDE

E Kintinu kia Nzambi akweyi kina? Tala dina Yesu kalonga.

“Nga e Kintinu kia Nzambi mu Ntima aku Kina?” (Longi dina muna jw.org)

Ekuma Mbangi za Yave bemwenanga vo diambote mu sikila ye kwikizi muna Kintinu kia Nzambi ke muna tuyalu twa wantu ko?

Bakivana Emvimba Muna Kintinu kia Nzambi (1:43)

Tala mana Bibila kisasilanga mu kuma kia 144.000 ma wantu ana Yave kasola mu yala yo Yesu.

“Nani Okwenda Kuna Zulu?” (Longi dina muna jw.org)

Nkia diambu diasadisa nkento mosi mu kwikila vo Nzambi kaka otwasa nza ya unsongi?

“Minha Busca por um Mundo Sem Injustiça” (Sikama! Novemba, 2011)