Sambu Kia Nsuka Kia Yesu Muna Suku Dia Ntandu

Mu kuma kia zola muna ntumwa zandi, Yesu ubakubikidi mu kuma kia ngiend’andi. Yesu osengwele meso kuna zulu, osambidi kwa Se diandi, oku vo: “Kembesa o mwan’aku, kimana o mwan’aku mpe kakembesa, wauna wamvanina e wisa muna wantu awonso, kimana kavana o moyo a mvu ya mvu kw’awonso ana wamvana.”—Yoane 17:1, 2.

E diadi disongele vo, Yesu ozeye wo vo, ovana o nkembo kwa Nzambi mfunu kikilu dina. Dialufiaulwisu mu zaya vo o Yesu okutuvananga e lau dia vua moyo a mvu ya mvu. Wau vo Yesu wavewa “e wisa muna wantu awonso,” wantu awonso balenda vua e nluta mia lukûlu. Kansi, akete kaka bevua e nluta miami. Ekuma? Ekuma kadi, Yesu otwasa e nluta mia lukûlu lwandi kwa awana kaka bezingilanga e ngwizani ye mvovo emi: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi yo Yesu Kristu ona watuma.”—Yoane 17:3.

O muntu kafwete longoka o mambu ma Nzambi ye ma Yesu yo vanga yau e kikundi kia sikila. Kafwete vangila o mambu una oyau bezolanga. Kafwete mpe tanginina e fu yau muna mpila kekadilanga ye akwandi. Kafwete zaya diaka vo, muna kembelela Nzambi o wantu i bevuila o moyo a mvu ya mvu. Owau Yesu ovutukidi e diambu diadi muna mvovo emi:

“Omono ikembese ova nza, wau mbanisi e salu kina wampana yasala. Dianu vo, e Tata, yambula yakala vana ndambu aku, umpana o nkembo una yakala wau vana ndambu aku una e nza ke yakedi ko.” (Yoane 17:4, 5) Muna mvovo miami, Yesu olombele vo Nzambi kamfutumuna yo kumvana o nkembo una kakala wau kuna zulu.

Kansi o Yesu ka vilakene ko e salu kavangidi ova ntoto. Osambidi, oku vo: “Nsengomwene nkumbu aku kwa wantu ana wampana ova nza. Wantu aku bakala, wabavana kwa mono, e diambu diaku balundidi dio.” (Yoane 17:6) Muna salu kiandi kia umbangi, Yesu kavovanga kaka nkumbu a Yave ko. Wasadisa ntumwa zandi mu zaya e nsas’a nkumbu Yave, e fu ya Nzambi ye mpila kekadilanga yo wantu.

Owau antumwa bazeye Yave, bazeye fulu kia Mwan’andi muna kani dia Nzambi yo mambu mana Yesu kabalongele. Yesu ovovele kuna lulembamu lwawonso vo: “Ibavene mambu mana wampana, batambwidi mo ye bazeye wo kieleka vo ngeye yayiza sunzula, bakwikidi mpe vo ngeye wantuma.”—Yoane 17:8.

I bosi, Yesu osongele e nswaswani vana vena alongoki andi yo wantu a nza, ovovele vo: “Idodokele mu kuma kiau; kidodokele mu kuma kia nza ko, kansi mu kuma kia awana wampana, kadi i baku . . . E Tata Avelela, ubatanina mu kuma kia nkumbu aku ina wampana, kimana bakala mosi wauna oyeto twinina mosi. . . . Yabatanina mu kuma kia nkumbu aku ina wampana; yakubatanina, ke mosi ko muna yau ovididi, nanga mwan’a lufwasu kaka, kimana e sono kialungana.”—Yoane 17:9-12.

Yesu okwamanene muna sambu kiandi, ovovele diaka vo: “E nza ibamengene. Kidodokele ko vo wabakatula ova nza, kansi wabatanina mu kuma kia ndiona wambi. Ke ba nza ko, wauna omono kinina wa nza ko.” (Yoane 17:14-16) Antumwa ye alongoki ankaka ova nza bezingilanga, iyalwanga kwa Satana. Kansi bafwete kuyivambula ye nza ye fu yandi yambi. Aweyi bevangila wo?

Bafwete kwamanana kala aveledi, bafwete kivambula ye nza muna sadila Nzambi, bafwete mpe lemvokela malongi mena muna Sono ya Kiyibere ye mambu mana o Yesu kabalongele. Yesu osambidi, oku vo: “Ubavaula muna ludi; e diambu diaku i ludi.” (Yoane 17:17) Kuna kulanda, akaka muna ntumwa za Yesu besoneka nkanda mikoteswa muna diambu dia “ludi” kimana miasadisa wantu bakala bavelela.

Kansi vena mpe yo wantu ankaka besinga tambulwila e “ludi” kiaki. Ekiaki i kuma o Yesu kasambidi vo, “ke mu kuma kia awaya kaka ko, kansi mu kuma ki’awana mpe bekwikilanga omu mono muna diambu diau.” Adieyi o Yesu kalombele muna sambu mu kuma kia yau awonso? “Kimana yau awonso bakala mosi, wauna ngeye, e Tata, una yame ntwadi, omono mpe ngina yaku e ntwadi, oyau mpe bakala yeto e ntwadi, kimana e nza yakwikila vo ngeye wantuma.” (Yoane 17:20, 21) Yesu yo Se diandi ke bena muntu mosi ko. Bena ntwadi kadi yau awole bewizananga muna mambu mawonso. Yesu osambidi kimana alongoki andi mpe bakala ye kintwadi kia mpila yayi.

Vitila Yesu kasamba, wateka vovesa Petelo ye ntumwa zankaka vo okwenda kubakubikila e fulu kuna zulu. (Yoane 14:2, 3) Yesu ovutukidi e diambu diadi muna sambu kiandi, ovovele vo: “E Tata, nzolele mpe vo awana wampana bakala yame konso kuna ikala, kimana bamona o nkembo una wampana, e kuma kadi wanzola vava e nza ke yasemeno ko.” (Yoane 17:24) Muna mvovo miami Yesu osongele vo vitila e nza yasemwa, vitila Adami yo Eva bawuta wana, o Nzambi wazolanga o Mwan’andi amosi kaka ona wayiza kituka se Yesu Kristu.

Muna fokola e sambu kiandi, Yesu ovovele diaka e nkumbu a Se diandi ye nzola ina o Nzambi kazolele antumwa yo wantu ankaka ana betambulwila e ludi. Yesu ovovele vo: “Yabazayisa e nkumbu aku, izayisa yo mpe, kimana e nzola ina unzolele yakala muna yau, omono mpe yakala yau e ntwadi.”—Yoane 17:26.