15, 16. (a) Yika una mbasi a Yave kavevolwela Petelo muna pelezo. (Tala foto va yanda.) (b) Ekuma dinina dia lukasakeso mu zaya una Yave kavevolwela Petelo?

¹⁵ E diambu dia Petelo aweyi dia sobela? Ekolo kakala kuna tulu vana kati kwa ayingidi wole muna fuku wansuka kakala mu pelezo, Petelo masivi mayingi kamona. (Tanga Mavangu 12:7-11.) Yindula dina diabwa: Vana vau, o ntemo watema mun’esuku. Mbasi mosi yatelama vana kakala, kansi kamoneka ko kw’ayingidi, wasikamesa Petelo. Luvambu lwakangwa muna moko mandi, luna lwamonekanga vo ke lulendi danuka ko, lwasotoka. I bosi, mbasi wavaikisa Petelo mun’esuku, yo viokela vana vakala ayingidi batelama kuna mbazi ye van’evitu diatadi dina diaziuka “diau kibeni.” Vava bavaika muna pelezo, mbasi ovididi. Petelo wavevolwa!

BAZINDALALA SIA UMBANGI KANA UNA VO BAWANANA YE NKAKALAKANI

17. Paulu aweyi kasisila mbandu ambote muna sia umbangi mu nzaki ye unkabu?

¹⁷ Vena ye diambu di’etatu tulenda longoka muna lulungalalu lwa ntumwa: Bazindalala sia umbangi, kana una vo bawanana ye nkakalakani. O sia umbangi mu nzaki ye unkabu mfunu dina mu zindalala yingila. Paulu wa ntumwa wasisa mbandu ambote muna diambu diadi. Wasalanga yo vema kwawonso, kangala mu fulu yandá yo sikidisa nkutakani zayingi. Kana una vo wazizidila mpasi zayingi, kasidi kulula etima diandi ko, ngatu yambula sila umbangi mu nzaki.—2 Kor. 11:23-29.