Malongi Mekusadisa mu Kalanga mu Luvuvamu ye Akaka

‘Nulolokanga muntu yo nkwandi kuna mvevo, kana nkutu vo muntu obakidi nkwandi diambu.’—KOLOSAI 3:13.

Yeto awonso tuvanganga mambu mambi. Tulenda fungisa akaka makasi yovo oyau balenda kutufungisa makasi. Muna kuma kiaki, vekalanga ye ntangwa yeto awonso tuvavanga vo twaloloka akaka yovo akaka batuloloka. Vava tulolokanga, tuyambulanga kala ye kudi muna ntima kuna kwa ndiona utufungisi makasi. Ke tuvutula “mbi muna mbi ko,” ngatu kwamanana kunsungamesa e diambu kavangidi. (Roma 12:17) Kansi, adieyi tuvanga avo dina batuvangidi ditomene kutukendeleka ye tukwamanananga dio yindula? Tufwete mokena yo muntu kuna luzitu vana fulu kia yeto kaka. E kani dieto i vutulwisa o luvuvamu ke vava ndungidi ko.—Roma 12:18.

“Kuna lulembamu kaka nubadikila ankaka vo banusundidi.”—FILIPI 2:3.

Avo tu alembami ye akwa luzitu, o wantu beyangalela kala yeto entwadi. Bezaya wo vo tukadila yau kuna ngemba, tukubazitisa yo lembi kubavanga e mbi kuna lukanu. Kansi, avo tukuyimwenanga vo tusundidi akaka ye tuzolanga vo e mambu mavangamenanga kaka wauna tuzolele, tutwasa e nkindu ye ntantani. O wantu bekututina, ke tukala ye akundi ayingi ko yovo ke tukala nkutu ye nkundi ko.

“Nzambi ke sianga mpambula ko, kansi muna zula yawonso, ndiona okumvumina yo vanga mambu mansongi otondwa kwa yandi.” —MAVANGU 10:34, 35.

O Mvangi eto ke tondanga wantu ko mu kuma kia nsi ina bawutukila, ndinga bevovanga, mavua mau, ngatu mu kuma kia se kiau kia nitu. E kuma kadi “muna muntu mosi kavangila zula yawonso.” (Mavangu 17:26) Ediadi disongele vo wantu awonso wana-ngudi yovo ampangi. Avo tukadilanga ye wantu awonso kuna luzitu ye ngemba, bekala ye kiese, yeto kibeni mpe tukala ye kiese. Edi disundidi o wete, tuyangidika o Mvangi eto.

“Nuvuata . . . Lusakalalu.”—KOLOSAI 3:12.

Avo tuna yo lusakalalu lwa ntima, diasazu dikala kw’akaka mu kalanga yeto entwadi. Diasazu dikala mu mokena yeto yo kutusingika avo diambu diambi tuvangidi, kadi bazeye wo vo tukala wavuvama. Avo muntu utufungidi makasi, e mvutu zeto zalembama zikulula makasi mandi. E Ngana 15:1 ivovanga vo: “E mvutu za malembe nganzi zilembekanga, kansi, e mvovo milwekanga makasi misakisanga.”

“E diambu disundidi e kiese i vana, ke mu tambula ko.”—MAVANGU 20:35.

Wantu ayingi o unu akwa loko ye mambu ma yau kibeni kaka betokanenanga. Kansi, awana bena ye fu kia kayila kaka, yau bekalanga ye kiese kiakieleka. (Luka 6:38) Ana bekalanga ye fu kia kaya mu kiese bekalanga, kadi betoma zolanga wantu ke mu mavua ko. O zola kukubafilanga mu vutula matondo yo songa luyangalu kwa konso muntu ubakayidi. (Kolosai 3:15) Ukiyuvula: ‘Nani izolanga kala yandi, mwimi ye ntokozi yovo ndiona ozolanga kaya yo vutulanga matondo?’ Adieyi tulongokele? Vanganga mana ozolanga vo akaka bavanga kwa ngeye.—Matai 7:12.