Ungunza 4. Kondwa Zola

“Wantu . . . bekondwa zola kwa esi nzo zau.”—2 TIMOTEO 3:1-3, God’s Word Bible.

● Chris, mwisi Reino Unido, osadilanga mu nkubika ivananga lusadisu kwa akento ana bewandwanga kwa akazi au. Wavova vo: “Nsungamenanga lumbu kina yatambula nkento mosi watufunwa kwa nkaz’andi, kana una vo ntungi kakala, kia lenda diaka kunsungamena ko. Akento akaka bekendalalanga kikilu, ke belendanga kuntala va ndose ko.”

MAMBU MEBWANGA NKIA ZIKU MESONGANGA? Mu nsi mosi ya Afrika, vana vena akento tatu mosi muna yau walekwa kala mu kingolo vava kakala mwan’akete. Lufimpu lumosi lwavangama mu nsi yayi, lwasonga vo vana vena akala tatu, mosi muna yau okwikilanga vo ke diambi kwandi ko mu wanda o nkaz’andi. Kansi, akento ke yau kaka ko bewandwanga kwa akazi au. Muna bong’e nona, kuna nsi ya Canadá vana vena 10 dia akala 3 muna yau bawandwa kala yovo kotwa nsoki kwa akazi au.

WANTU ADIEYI BETOMA VOVANGA? Tuka kolo tuzeye wo vo akala ye akento bewandaziananga muna nzo zau. Tuvanganga mawonso mu singika e diambu diadi ke mu tandu yavioka ko.

NGA E MVOVO MIAU MIALUDI? Muna tandu kiaki, ayadi a nza bewokesanga e ngolo zau mu singika evangu dia nsoki muna nzo. Nga e ngolo bevanganga zikululanga e mpasi zitwasanga evangu diadi? Ve. O kondw’o zola mu wokela kaka kuna.

ADIEYI OBENZE? Nga sono kia 2 Timoteo 3:1-3 mu lungana kina? Wau vo ulolo wa wantu kebesonganga diaka nzola ungudi ko ina bafwete songa kwa esi nzo zau, nga i wau difwete kala?

[Mvovo mia Sina mina muna lukaya lwa 7]

“Evangu dia nsoki muna nzo ditomene zayakana, i mosi muna mavangu ma umpumbulu metoma vovelwanga muna lusansu lwa wantu. O lufimpu lusonganga vo o nkento nkumbu 35 keteka wandwanga kwa nkaz’andi, i bosi kekwenda fundanga kwa mapolisi.”​—U KAVOVA NKENTO MOSI UNA VO KIMPOVELA KIA AWANA BEKOTWANGA NSOKI KWA AKAZI AU.