Ifi Mungeshiba Kani Fyefyo Musumiinemo Fya Cine

KANI na mwebo mulalabila ati muli baKlistu? Kani efi mulabila, ninshi muli pa bantu abacilile pali 2 bilyoni abalabila ati balalonda baKlistu. Ino mpindi, kuli amapempelo aengi aeshibikilwe ati abuKlistu. Nangabe’fyo, alipusenepusene muli fyefyo asambisha. Kanshi ifi musumiinemo fingaba ifipuseneko kuli fyefyo bambi abaKlistu basumiinemo. Kani ukusalululapo bwino ifi mungasuminamo kucindeme? Inya, kucindeme pakweba ati mube abaKlistu abacita ifi Baibolo ilabila.

Abasambile ba kutanga aba baYesu baalishibikilwe ati “bena-Klistu.” (Ifyacitilwe 11:26) Tabaalukupengelapo ukwishibikilwa kwi shina limbi ni pakuti kwali lukoso ubuKlistu bumo. AbaKlistu bonse lukoso baalisumiine ubusambishi buntu bumo ubwa baYesu Klistu, abo abatatikile ubuKlistu. Nga mu calici mwenu? Kani mulisumiine ati ifi bamusambisheni efi na baKlistu basambishe kabili ati efi ne basambile ba kutanga aba baKlistu basumiinemo? Mungeshiba shani kani ifi musumiinemo fya cine? Kuli inshila imo lukoso iingamofweniko, e kweba ati ukupyungisha Baibolo pa kwishiba ubusambishi bwa cinenene.

Langulukeni pali cici: BaYesu balicindikile makosa Amalembo. Baalukuabona ati Mashiwi abaLesa. Tabatemenwepo abacindikile makosa ifyakutantaka fya bantunshi ne kupufya ukufunda kwa mu Malembo. (Mako 7:9-13) Popele, tungalabila ati ifi abasambile ba baYesu basumiinemo fyali fya mu Malembo. Penka, umuKlistu umo umo alyelelwe ukulipusha ati, ‘Kani ifi nsambilila ku calici kwesu efi na Baibolo isambisha?’ Pa kwasuka ico icakwipusha, mwane palanyeni ifi basambisha ku calici kwenu kuli fyefyo Baibolo isambisha mu cinenene.

BaYesu balilabiile ati ukupempela kwesu kulyelelwe ukweyamina pali bucine, kabili ati ubu bucine bulasangwa mu Baibolo. (Yoane 4:24; 17:17) Kabili intangishi Paulu yalilabiile ati pakweba ati tupuluke tulyelelwe ukufika “ku kwishibisha bucine.” (1 Timote 2:⁠4) Popele, ifi tusumiinemo filyelelwe ukweyamina pali bucine bwa mu Baibolo. Ukucite’fi kucindeme ni pakuti kungalengesha fwebo ukupuluka!

IFI TUNGESHIBA KANI FYEFYO TUSUMIINEMO EFI NA BAIBOLO ILABILA

Mwane pendeni ifyakwipusha 6 ifili muli cicino iciputusha ne kubona ifyasuko fya mu Baibolo kuli fyefyo ifyakwipusha. Pendeni amalembo aaloshiwako, ne kwalakanyapo pa fyasuko. Eli mulipushe ati, ‘Kani ifi basambisha ku calici kwesu efi na Baibolo ilabila?’

Ifi ifyakwipusha fingamofweniko ukwishiba kani ifi musumiinemo e bucine. Kani mungafwaya ukwishiba kani ifi musambilila ku calici kwenu efi na Baibolo isambisha? Bamboni sha BaYawe bakomfwa bwino ukumofweniko ukusalaala bucine bwa mu Baibolo. Mwane, balombeni ati balukumusambisheni Baibolo apakubulo’kulipila. Neli mungapenda ifyebo ifili pali webusaiti yesu iya www.jw.org/lam.

1 ICAKWIPUSHA: Kani baLesa ni bani?

ICASUKO: BaYawe, baWishibo baYesu, ni baLesa ba muyayaya kabili e Balengeshi ba makosa aba fintu fyonse.

IFI BAIBOLO ILABILA:

“Tulukutota baLesa baWishibo baShikulu besu Yesu Klistu pa kulukumutembeleleni inshiku shonse.”—AbaKolosai 1:3.

“Mwebo ni mwe baYawe, e mwebo mwenka. Mwalilengele iulu, iulu lya maulu, ne bumba lya ako lyonse, ne calo ca panshi ne fintu fyonse ifilipo, ne fishiba na fyo fyonse ifilimo; mulukufilama fyonse; kabili ibumba lya mwiulu lilukumucindikeni.”—Neyamiya 9:6.

Boneni na Joeli 2:32; 1 Timote 1:17.

2 ICAKWIPUSHA: Kani baYesu Klistu ni bani?

ICASUKO: BaYesu e Bana ababele aba baLesa. BaYesu balilengelwe, na muli fyefyo balikwete icitati. BaYesu balakomekwa kuli baLesa kabili balacita ukufwaya kwa baLesa.

IFI BAIBOLO ILABILA:

“BaTata balincilile nebo ubukulu.”—Yoane 14:28.

“[BaYesu] cinshingwa ca baLesa abatababonwa, ba kutanga lukoso lomba tafingalengwa ifintu fyonse.”—AbaKolosai 1:15.

Boneni na Matayo 26:39; 1 AbaKolinto 15:28.

3 ICAKWIPUSHA: Kani umupashi uswetelele cindo?

ICASUKO: Umupashi uswetelele makosa baLesa bapyungisha pa kukonsha ukufwaya kwabo. Talipo muntu. Abantu bangapokelela umupashi uswetelele kabili ungabapeela amakosa.

IFI BAIBOLO ILABILA:

“Ili aumfwile Elisabeti ukusekela kwakwe Maliya, ne kana kalicilucile munda mwakwe; penka Elisabeti aliiswile umupashi uswetelele.”—Luku 1:41.

“Mukapoka amakosa, pa kumuselucileni umupashi uswetelele.”—Ifyacitilwe 1:8.

Boneni na Ifyakutanga 1:2; Ifyacitilwe 2:1-4; 10:38.

4 ICAKWIPUSHA: Kani Ubufumu bwa baLesa cindo?

ICASUKO: Ubufumu bwa baLesa buteko bwa kwiulu. BaYesu e Mfumu ya Bufumu bwa baLesa. Bukumo lukoso, ubu Ubufumu bukalengesha ukufwaya kwa baLesa ukucitwa pa calo conse.

IFI BAIBOLO ILABILA:

“Inkalamba ya bushisanu na shibili yalilishishe; eli mwabele amashiwi akulu mwiulu, alabile ati: Ubufumu ubwa mu calo ca panshi bulibele bufumu bwa baShikulu besu ne bwa baKlistu babo; nabo bakalukubwikalika inshiku shonse isha muyayaya.”—Ukufisulula 11:15.

Boneni na Danyeli 2:44; Matayo 6:9, 10.

5 ICAKWIPUSHA: Kani abantu bonse abaweme balaya kwiulu?

ICASUKO: Koku. Libumba ililini lukoso ilya bantunshi ba bucetekelo, iliitwa ati ‘itanga ilinini,’ lyelyo baLesa basalulwile ukuya kwiulu. Abali muli lili ibumba bakalukwikalika na baYesu koti ni mfumu pa bantunshi.

IFI BAIBOLO ILABILA:

“Tekulukutina, we tanga linini; pakuti ukumupeleni mwebo Ubufumu e kutemwa kwa baWishinwe.”—Luku 12:32.

“Bakalukuli bapapatilishi ba baLesa ne ba baKlistu; bakalukwikaliko’bufumu pamo nabo.”—Ukufisulula 20:6.

Boneni na Ukufisulula 14:1, 3.

6 ICAKWIPUSHA: Kani baLesa balafwaya icalo ne bantu ukulukuli shani?

ICASUKO: Ili Ubufumu bwa baLesa bukalukwikalika, icalo cikaba paladaiso kabili abantunshi ba bucetekelo bakalitemwesha umweo uwaminine, umutende wa cinenene, kabili bakekala umuyayaya.

IFI BAIBOLO ILABILA:

“Abatekenye mu mitima e bakapyane’calo; bakalukulitemwesha mu kufula kwa butende.”—Amasamo 37:10, 11.

“BaLesa bakabasumwina iminsoshi yonse ku menso abo; tapakalukuli imfwa libili, neli ni nsoni, neli kulila, neli kusomenwa konse, tau; pakuti ifintu ifya kutanga filipitilile.”—Ukufisulula 21:3, 4.

Boneni na Amasamo 37:29; 2 Petilo 3:13.